Filipensenan 3
3
1Mi rumannan, pa konkluí: keda kontentu den Señor!
Konfia den Kristu so
No ta molèster pa mi ripití loke ya mi a skibi boso kaba i esei ta duna boso mas seguridat. 2Tene kuidou ku e hasidónan di maldat! Tene kuidou ku e kachónan ei! Warda boso kurpa for di esnan ku ta insistí ku mester kòrta kurpa! 3Pasobra ta nos ta esnan ku a risibí e sirkunsishon berdadero;#Yeremías 4:4; Romanonan 2:28-29 nos ku ta adorá Dios pa medio di su Spiritu i ta basa nos orguyo riba Kristu-Hesus, sin konfia riba kosnan eksterno. 4Ounke ta klaro ku mi tin motibu pa pone mi konfiansa den kos asina. Pasobra si tin kualke hende ta pensa ku e por konfia den su mes, ami sigur por hasié: 5Mi ta israelita di nasementu, sirkunsidá riba e di ocho dia; mi ta pertenesé na tribu di Benhamin#Romanonan 11:1 i ta hebreo di pura sepa. Mi a biba segun lei di akuerdo ku e reglanan di e grupo di fariseo.#Echonan 23:6; 26:5 6Mi a mustra mi zelo dor di persiguí iglesia;#Echonan 8:3; 9:1-2; 22:4; 26:9-11 pa loke ta trata kumplimentu ku lei, niun hende no tin nada di remarká.
7Ma awor tòg mi ta konsiderá tur e kosnan akí, ku na mi pareser tabata ganashi, un pèrdida pa motibu di Kristu. 8Ma mas ku esei, no solamente e kosnan ei, sino tur kos mes mi ta konsiderá di ta un pèrdida, kompará ku konosé Kristu-Hesus, mi Señor. Esei ta mas balioso ku tur otro kos! Pa su motibu mi a entregá tur kos i mi ta konsiderá tur e kosnan ei bagas, pa asin'ei mi por gana Kristu 9i ta uní kunÉ. Ku Dios ta aseptá mi komo hustu no ta basá riba mi kumplimentu ku lei. Ma esei ta bini pa medio di fe den Kristu; esei ta bini di Dios i ta basá riba fe. 10Mi ke konosé Kristu, eksperensiá poder di su resurekshon i kompartí su sufrimentu; mi ke bira manera E den su morto.#Romanonan 6:11-13; 8:29; 2 Korintionan 3:18; Galatanan 4:19 11Anto asin'ei mi ta spera ku lo mi resusitá for di morto.
Pusha bai dilanti pa yega na e meta
12Mi no ta bisa ku mi a alkansá esei òf ta perfekto kaba. Ma mi ta sigui pusha bai dilanti, pa mi gar'é; ta pa e motibu ei Kristu-Hesus a gara mi. 13Rumannan, mi mes no ta pensa ku mi a gar'é kaba; ma un kos sí: mi ta lubidá tur loke ta tras di lomba i ta rèk pa gara loke ta mi dilanti. 14Mi ta pusha bai dilanti pa mi yega na e meta i asina gana e premio ku Dios, pa medio di Kristu-Hesus, ta yama nos bin risibí ayariba.#Sabiduria 4:2; 5:16
15P'esei antó, laga nos ku ta kreyente madurá pensa meskos, ma si boso ta pensa otro tokante un ke otro, Dios mes lo revelá boso kiko ta bèrdat. 16Ma en todo kaso, laga nos sigui riba e kaminda ku nos a rekoré kaba.
17Rumannan, boso tur huntu, imitá mi#1 Korintionan 4:16; 11:1 i fiha boso bista riba esnan ku den nan andá ta sigui ehèmpel ku nos a duna. 18Pasobra mi ta bolbe ripití, ku awa na wowo, loke mi a bisa boso hopi bia kaba: tin hopi hende ta biba manera ta enemigu di Kristu su krus nan ta. 19Nan lo kaba den pèrdishon; nan barika a bira nan dios; nan ta orguyoso di nèt e kosnan ku mester ta un bèrgwensa pa nan! Ta riba kos di mundu so nan ta pensa! 20Ma nos patria ta den shelu; fo'i djei nos ta warda nos Salbador, Señor Hesu-Kristu, bini! 21E lo transformá nos kurpa mizerabel den kurpa glorioso, meskos ku esun di djE. Pa hasi esei lo E usa e poder ku E tin pa someté tur kos na su outoridat.
Currently Selected:
Filipensenan 3: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013