Hebreonan 12
12
Perseverá den tempu di prueba
1P'esei nos, rondoná di un multitut asina grandi di hende ku a demostrá nan fe, mester benta tur peso, esta, e pikánan ku ta molestiá nos asina fásil, un banda, i partisipá ku perseveransia na e kareda ku nos tin nos dilanti. 2Laga nos tene nos bista fihá riba Hesus, ku a bai nos dilanti riba e kaminda di fe i ku lo hiba nos tambe na final di e kaminda. Hesus a sufri na krus, sin a sinti bèrgwensa di e morto akí, pasobra E tabata sa ku despues di e sufrimentu akí lo El a haña alegria; i awor E ta sintá na man drechi di trono di Dios.#Filipensenan 2:6-11; Hebreonan 2:9 3Meditá riba Esun ku mester a soportá tantu resistensia di pekadó; ya boso lo no kansa ni desanimá.
4Den boso lucha kontra piká, boso no tabatin nodi ainda di lucha te na morto. 5Ya boso a lubidá loke Dios a bisa boso, su yunan, pa kurashá boso. Den Skritura E ta bisa:
‘Mi yu, no despresiá korekshon ku bini di Señor,
i no pèrdè kurashi ora E kastigá bo.
6Pasobra Señor ta koregí esun ku E ta stima,
E ta kastigá tur esnan ku E ta aseptá komo yu.’#Job 5:17; Proverbionan 3:11-12
7Soportá loke boso ta sufri, komo korekshon: Dios ta trata boso manera yu. 8Si Dios no koregí boso manera e otro yunan, boso no ta su yu di bèrdat. 9Ademas, tempu nos tabata mucha, nos mayornan aki na mundu a koregí nos i nos tabata respetá nan. Pakiko no someté nos ku mas rason na nos Tata selestial pa haña bida? 10Nos mayornan aki na mundu a koregí nos durante e bida kòrtiku akí, segun a parse nan mas kumbiniente; pero Dios ta koregí nos pa nos berdadero probecho, pa hasi nos santu manera E. 11Na e momento ku un hende ta haña kastigu, e no ta gusta; al kontrario, e kastigu ta hasié tristu. Pero esnan ku a keda formá dor di e kastigu, despues lo disfrutá di su fruta, esta pas, pasobra nan ta biba di akuerdo ku boluntat di Dios.#Deuteronomio 8:5; 1 Samuel 7:14; 1 Korintionan 11:31-32
12Hisa bo mannan slap anto i rèk bo rudianan tembloroso.#Isaías 35:3 13Kana riba kaminda règt; e ora ei loke ta lam lo no sali for di lugá, pero kura.
No rechasá Dios su grasia
14Hasi esfuerso pa biba na pas ku tur hende i trata di biba santu. Es ku no biba santu, no ta mira Señor nunka. 15Tene kuidou pa ningun hende no bira lomba pa grasia di Dios. Tene kuidou pa amargura#Deuteronomio 29:18 no krese manera yerba shimaron, kousa inkietut i venená henter komunidat. 16Tene kuidou pa niun hende no kometé inmoralidat seksual ni ta indiferente pa kosnan sagrado, manera Esou, ku pa un solo kuminda a bende su derechonan di yu mayó.#Génesis 25:29-34 17Despues di tempu e ker a haña bendishon di su tata tòg, pero e ora ei a rechas'é. E no a haña un manera pa kambia loke el a hasi, ounke el a busk'é ku awa na wowo.#Génesis 27:30-40
18Boso no a yega, manera e israelitanan, un seru ku boso por a mishi kuné, un seru tur na kandela, yen di skuridat, tiniebla i tempestat, 19kaminda zonido di tròmpèt i stèm di Dios tabata resoná. Esnan ku a tende e stèm, a roga pa E no papia mas ku nan.#Éksodo 19:16-22; 20:18-21; Deuteronomio 4:11-12; 5:22-27 20Pasobra nan no por a soportá e òrdu: Mester piedra asta un bestia ku mishi ku e seru.#Éksodo 19:12-13 21I loke nan a mira tabata asina teribel, ku Moises a grita: ‘Mi ta tembla di miedu!’#Deuteronomio 9:19
22Pero boso a yega seru di Sion i e siudat di Dios bibu, e Herusalèm selestial, ku míles i míles di angel. Boso a yega e reunion festivo 23i e asamblea di e yunan privilegiá di Dios, ku ta inskribí den shelu. Boso a yega serka Dios, ku ta hues riba tur hende, i serka e spiritunan di hende hustu, ku Dios a hasi perfekto. 24Boso a yega serka Hesus, e Mediador di un aliansa nobo, i serka e sanger ku El a drama, ku ta papia di algu mihó ku e sanger di Abel.#Génesis 4:10
25Tene kuidou pa boso no nenga di skucha Esun ku ta papia ku boso. Esnan ku a nenga di skucha dia Dios a papia ku nan na mundu, no a skapa; muchu ménos chèns di skapa nos tin, si nos bira lomba pa Esun ku ta papia ku nos for di shelu!#Éksodo 20:22 26E tempu ei su stèm a pone mundu sakudí, pero awor El a primintí: ‘Lo Mi no laga mundu so sakudí un bia mas, pero shelu tambe.’#Hagai 2:6 27E palabranan ‘un bia mas’ ta mustra ku e kosnan ku por tambaliá, ke men kos ku ta kreá, lo disparsé, di manera ku loke no por tambaliá, lo keda. 28Nos ta haña serka Dios un reino ku no por tambaliá; p'esei laga nos gradisí Dios p'esei i sirbiÉ manera E ke, ku rèspèt i temor. 29Pasobra nos Dios ta un kandela ku ta devorá tur kos.#Deuteronomio 4:24; 9:3; Mateo 3:12; 2 Tesalonisensenan 1:7-8
Currently Selected:
Hebreonan 12: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
