Hebreonan 11
11
Fe
1Fe ke men ku nos ta sigur di e kosnan ku nos ta spera di risibí i ku nos ta konvensé di e realidat ku nos no ta mira.#11:1 Fe…mira; otro posibel tradukshon: Fe ta base firme pa e kosnan ku nos ta spera di risibí i ta duna prueba di e realidat ku nos no ta mira 2Debí na tal fe Dios a duna bon testimonio di hende di ántes.
3Pasobra nos tin fe, nos ta komprondé ku Dios a krea universo pa medio di su palabra:#Génesis 1:1; Salmo 33:6,9; 2 Makabeonan 7:28; Huan 1:3 ke men ku loke nos por mira a nase for di loke nos no por mira.
4Pasobra Abel tabatin fe, el a ofresé Dios un mihó sakrifisio ku Kain a ofresé. Pa motibu di su fe Dios a deklará ku Abel tabata hustu i Dios a aseptá su sakrifisionan.#Génesis 4:3-10 Pa medio di su fe Abel ta papia awor akí ainda, maske el a muri kaba.
5Pasobra Henok tabatin fe, Dios a kit'é for di e bida akí promé ku el a muri. No por a hañ'é mas, pasobra Dios a tum'é serka djE. Skritura ta bisa ku, promé ku Dios a tum'é serka djE, e tabata biba segun boluntat di Dios.#Génesis 5:21-24; Sirag 44:16; Sabiduria 4:10 6Si un hende no ta kere den Dios, ta imposibel pa e hasi loke Dios ke. Pasobra es ku ke bai serka Dios, mester kere ku E ta eksistí i ku E ta rekompensá esnan ku ta busk'É.
7Pasobra Noe tabatin fe, el a tuma Dios na serio, ora El a atvertié pa kos ku ainda no por a mira. El a konstruí un arka pa salba su famia.#Génesis 6:13-22 Su bida di fe a kondená e otro hendenan riba mundu, pero a pone ku Dios a aseptá é komo hustu.
8Pasobra Abraham tabatin fe, el a obedesé ora Dios a yam'é: el a sali bai un pais ku Dios a destiná p'e i su desendensia. El a sali bai sin sa unda e tabata bai.#Génesis 12:1-5 9I pa medio di e fe ku e tabatin, el a biba komo strañero na e pais ku Dios a primintié. El a biba den tènt, meskos ku Isak i Yakob, ku tambe a haña e promesa ei.#Génesis 35:27 10Pasobra Abraham tabata anhelá e siudat ku un fundeshi firme, di kual Dios mes tabata e arkitekto i konstruktor.#Hebreonan 13:14 11Pasobra Abraham tabatin fe, Dios a hasié kapas di engendrá un yu serka Sara, ounke e tabata bieu i Sara no por a konsebí.#11:11 Pasobra…konsebí; otro posibel tradukshon: Pasobra Sara tabatin fe, Dios a hasié kapas di haña un yu, ounke e tabata bieu i no por a konsebí Pasobra e tabata konfia ku Dios lo a kumpli ku su promesa.#Génesis 17:19; 18:11-14; 21:2; Romanonan 4:17-22 12P'esei tambe ésun hòmber ei, ku tabata yegando na fin di su bida, a haña desendiente, mes numeroso ku strea na shelu, inkontabel manera pipita di santu na playa di laman.#Génesis 15:5; 22:17; 32:12; Sirag 44:21
13Den fe nan tur a muri sin haña loke Dios a primintí nan. Pero esei nan a mira for djaleu i nan a keda kontentu kuné. Nan a rekonosé ku na mundu nan tabata strañero i habitante pasahero.#Génesis 23:4; 1 Krónikanan 29:15; Salmo 39:12 14Esnan ku ta papia asina, ta duna bon kla di konosé ku nan ta en buska di un patria. 15Si nan a sinti nostalgia pa e pais ku nan a bandoná, nan por a bolbe fásilmente. 16Pero nan tabata anhelá un mihó patria, esun selestial. P'esei Dios no ta sinti bèrgwensa di ta yamá nan Dios; pasobra ta pa nan El a konstruí un siudat.
17Pasobra Abraham tabatin fe, el a ofresé Isak komo sakrifisio ora Dios a pon'é na prueba. E tabata dispuesto pa ofresé su úniko yu#Génesis 22:1-14 komo sakrifisio, ounke Dios a hasié un promesa: 18‘Dor di Isak bo ta haña e desendientenan ku Mi a primintí.’#Génesis 21:12 19Abraham a pensa ku Dios tabatin asta poder pa laga morto resusitá; p'esei el a haña su yu hòmber bèk,#Génesis 22:13 loke tabata un prefigurashon di e kosnan benidero.
20Pasobra Isak tabatin fe, el a duna Yakob i Esou#Génesis 27:27-29,39-40 un bendishon relashoná ku futuro.
21Pasobra Yakob tabatin fe, el a bendishoná e dos yunan di Jozef na su kama di morto. I ilèn riba su bastòn, el a adorá Dios.#Génesis 47:31—48:20
22Pasobra Jozef tabatin fe, el a papia na fin di su bida di e salida di e israelitanan for di Egipto i a duna instrukshon tokante su restunan mortal.#Génesis 50:24-25; Éksodo 13:19
23Pasobra e mayornan di Moises tabatin fe, nan a skond'é tres luna largu despues di su nasementu,#Éksodo 2:2 pasobra nan a mira ku e tabata un yuchi bunita. Nan no tabatin miedu di e òrdu di rei.#Éksodo 1:22
24Pasobra Moises tabatin fe, el a nenga, dia el a bira grandi, di pasa pa yu di e yu muhé di fárao.#Éksodo 2:10-12 25El a preferá di haña maltrato huntu ku e pueblo di Dios na lugá di gosa di plaser di piká pa un ratu so. 26P'e e deshonra ku Kristu mester a pasa, tabata un rikesa mas grandi ku e tesoronan di Egipto. E tabata fiha su bista riba e rekompensa di den futuro. 27Pasobra e tabatin fe, el a sali bai for di Egipto sin tabatin miedu di rei.#Éksodo 2:15 El a perseverá, manera un hende ku tabata mira e Dios invisibel. 28Pasobra e tabatin fe, el a instituí fiesta di Pésag i a laga hunta sanger na kozein di porta, di manera ku e angel di morto lo no a mata e yu mayónan di e famianan di Israel.#Éksodo 12:21-30
29Pasobra e israelitanan tabatin fe, nan a pasa dor di Laman Kòrá komo si fuera tabata tera seku; ora e egipsionan a purba, nan a hoga.#Éksodo 14:21-31
30Pasobra e israelitanan tabatin fe, e murayanan di Yériko a basha aden, despues ku e israelitanan a kana shete dia largu rondó di nan.#Yozue 6:12-21
31Pasobra e prostituta Rahab tabatin fe, el a risibí e spiònnan kariñosamente#Yozue 2:1-21 i e no a muri huntu ku esnan ku tabata desobedesidu na Dios.#Yozue 6:22-25
32I kiko mas mi mester menshoná? Mi no tin tempu pa para konta di Gideon,#Huesnan 6:11—8:32 Barak,#Huesnan 4:6—5:31 Samson#Huesnan 13:2—16:31 i Yefta,#Huesnan 11:1—12:7 di David#1 Samuel 16:1—1 Reinan 2:11 i Samuel#1 Samuel 1:1—25:1 i e profetanan. 33Pasobra nan tabatin fe, nan a konkistá reino, mantené derecho i risibí loke Dios a primintí; nan a sera boka di leon,#Daniel 6 34paga kandela grandi#Daniel 3 i a skapa di morto pa spada; nan debilidat a bira forsa, nan a bira fuerte den guera i a pone ehérsito enemigu hui. 35Muhé a haña nan famianan bèk, resusitá for di morto.#1 Reinan 17:17-24; 2 Reinan 4:25-37 Otro a muri despues di a torturá nan; nan a nenga libertat pa por resusitá den un bida mihó.#2 Makabeonan 6:18—7:42 36Otro a soportá chèrchè i bòftá,#Yeremías 20:2; 37:15 asta soportá bui i prizòn.#1 Reinan 22:26-27; 2 Krónikanan 18:25-26; Yeremías 20:2; 37:15; 38:6 37A piedra nan,#2 Krónikanan 24:21 zag nan na dos#11:37 Tin manuskrito ku ta añadí: hinka nan den tentashon. i mata nan ku spada.#Yeremías 26:23 Nan a dualu rònt, bistí na lana di karné i kueru di kabritu. Nan tabata pasa mizeria, keda persiguí i maltratá. 38Nan tabata muchu bon pa e mundu akí! Nan tabata dualu den desierto i seru, i tabata biba den spelònk i buraku.
39Ounke Dios ta duna bon testimonio di tur e hendenan akí, nan no a risibí loke El a primintí. 40E tabatin un mihó plan ku nos i E no tabata ke pa nan a yega na perfekshon sin ku nos yega.
Currently Selected:
Hebreonan 11: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
