Hebreonan 10
10
1Lei di Moises ta laga mira únikamente un sombra di e benefisionan ku lo bini, no e benefisionan mes. P'esei nunka lei lo no por hasi e hendenan ku aña aden aña afó ta ofresé e mesun sakrifisio, perfekto pa medio di e sakrifisionan akí. 2Si nan a keda purifiká un bia i pa semper di nan pikánan, nan lo no a sinti nan mes kulpabel mas i nan lo a stòp di ofresé sakrifisio. 3Pero en realidat e sakrifisionan akí ta sirbi pa rekordá hende nan pikánan aña aden aña afó. 4Pasobra ta imposibel ku sanger di toro i chubatu por kita piká.
5P'esei Kristu ta bisa na e momento ku E ta bai mundu:
‘Bo no tabata ke ni sakrifisio ni ofrenda,
sino Bo a duna Mi un kurpa.
6Bo no gusta bestia kimá riba altá
ni sakrifisio di pordon.
7E ora ei Mi a bisa: “At'Ami aki
manera ta skibí den bo buki tokante Mi:
pa hasi bo boluntat, o mi Dios.” ’#Salmo 40:6-8
8Promé E ta bisa: ‘Bo no tabata ke ni gusta sakrifisio ni ofrenda, ni bestia kimá riba altá ni sakrifisio di pordon,’ ounke lei ta preskribí nan. 9Despues E ta bisa: ‘At'Ami aki pa hasi bo boluntat.’ Ke men, Dios ta abolí e sakrifisio bieunan i remplasá nan pa Kristu su sakrifisio. 10Dios a konsagrá nos n'E, pasobra Kristu a kumpli ku boluntat di Dios i a ofresé su mes kurpa un bia i pa semper komo sakrifisio.
11Kada saserdote hudiu diariamente ta para hasi su trabou saserdotal; kada be atrobe e ta ofresé e mesun sakrifisionan, ku no por kita piká.#Éksodo 29:38 12Kristu sinembargo a ofresé un solo sakrifisio pa piká i despues a kai sinta pa semper na man drechi di Dios. 13Einan E ta keda warda te ora Dios lo a hasi su enemigunan un banki pa su pia sosegá.#Salmo 110:1 14Pa medio di un solo sakrifisio El a hasi esnan ku ta keda konsagrá na Dios, pa semper perfekto.
15Spiritu Santu ta konfirmá esei. Promé E ta bisa: 16‘E aliansa nobo ku Mi ta bai sera ku pueblo di Israel lo ta asin'akí,’ Señor ta bisa, ‘Mi ta bai pone mi leinan den nan kurason i graba nan den nan mente.’#Yeremías 31:33 17Despues E ta añadí: ‘Lo Mi pordoná nan maldatnan i no kòrda mas riba nan pikánan.’#Yeremías 31:34 18Awor ku eseinan ta pordoná, no tin nesesidat mas di un sakrifisio pa piká.
Stimulashon pa perseverá
19Asina ta, rumannan, ku pa medio di sanger ku Kristu a drama nos tin entrada liber pa e santuario.#10:19 nos tin…santuario; otro posibel tradukshon: nos por drenta e santuario sin temor 20El a habri un kaminda nobo pa nos, un kaminda ku ta hiba na bida, un kaminda ku ta pasa dor di e kortina dilanti di e lugá santísimo; El a hasié ofresiendo su mes kurpa. 21Awor ku nos tin un gransaserdote ku ta para na kabes di Dios su kas, 22laga nos aserká Dios ku un kurason sinsero i un fe firme, ku un kurason purifiká di un mal konsenshi i ku un kurpa labá ku awa puru.#Levítiko 8:30; Ezekiel 36:25 23Nos mester tene duru na loke nos ta spera i konfesá, pasobra Dios ku a hasi nos e promesanan ei, lo kumpli. 24Laga nos paga tinu na otro i stimulá otro pa demostrá amor i hasi bon obra. 25Nos no mester hasi un kustumber di keda sin bai nos reunionnan, manera tin hende ta hasi. Nos mester kurashá otro, i esei mas tantu ainda, segun boso ta mira dia di Señor ta aserká.
26Si nos a siña konosé e bèrdat, i deliberadamente keda hasi piká, no tin ningun sakrifisio mas ku por kita nos pikánan. 27Pa nos ta keda e ora ei solamente un perspektiva horibel di huisio i di e kandela ardiente ku lo devorá enemigu di Dios.#Isaías 26:11 28Si un hende violá lei di Moises, i dos òf tres testigu konfirmá esaki, ta mat'é sin tene mizerikòrdia.#Deuteronomio 17:6; 19:15 29Kiko lo sosodé antó ku esun ku ta despresiá Yu di Dios? Ku ta menospresiá sanger di e aliansa ku Dios a santifik'é kuné?#Éksodo 24:8; Hebreonan 13:20 Ku ta ofendé Spiritu ku a dun'é grasia? Boso no ta kere ku lo e haña un kastigu muchu mas pisá? 30Nos sa tòg ken a bisa: ‘Ami lo tuma vengansa,#Deuteronomio 32:35 Ami lo paga bèk.’ I tambe: ‘Señor lo husga su pueblo.’#Deuteronomio 32:36 31Ta algu teribel pa kai den man di Dios bibu!
32Kòrda promé aya, tempu boso a haña lus di Dios i mester a sufri tantu asina. Pero boso a sobrebibí e lucha. 33Tin bia a ofendé i oprimí boso mes públikamente, tin bia boso a sostené otro ku tabata haña e trato ei. 34Boso a sinti ku esnan ku nan a kohe prezu i boso a soportá kontentu, ora a hòrta boso kosnan. Boso tabata sa ku boso tabata poseé algu mihó i permanente. 35No pèrdè konfiansa antó, pasobra Dios lo rekompens'é rikamente. 36Pa kumpli ku boluntat di Dios i pa haña loke E ta primintí, boso mester di perseveransia. Pasobra Skritura ta bisa:
37‘Ainda un korto, korto tempu mas,
i Esun ku mester bini, lo bini
i no warda mas.
38Mi hende hustu lo keda na bida pa medio di fe.
Pero si e no perseverá
e no por agradá Mi mas.’#Habakuk 2:3-4
39Pero nos no ta pertenesé na esnan ku ta hala atras i ta bai pèrdí, pero na esnan ku tin fe i p'esei ta keda biba.
Currently Selected:
Hebreonan 10: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
