Sirag 47
47
David
1Den tempu di David, Natan#2 Samuel 7; 12:1-25 a sigui Samuel komo profeta.
2Manera ta apartá sebu for di sobrá di sakrifisio,
asina David a keda apartá for di e sobrá israelitanan.
3El a hunga ku leonnan komo si fuera nan tabata chubatu chikí
i ku osonan komo si fuera nan tabata lamchi.
4Den su hubentut e n' mata e gigante
i kita bèrgwensa di e pueblo
ora el a hisa su man ku e piedra den slengu
i kibra arogansia di Goliat?
5Pasobra el a invoká Señor Altísimo
i Señor a duna su brasa forsa
pa kaba ku e guerero potente ei
i logra viktoria pa su pueblo.#1 Samuel 17:22-54
6P'esei nan a honr'é pa 10.000
i elogi'é pa e bendishonnan di Señor,
miéntras nan tabata ofres'é un korona di honor.#1 Samuel 18:7-8
7Pasobra el a aplastá e enemigunan di tur banda
i destruí su atversarionan, e filisteonan,
kibra nan poder te dia djawe.#2 Samuel 5:1-7; 8:1-14
8Den tur su obranan e tabata honra
Esun Santu, e Altísimo,
ku palabranan di alabansa.
Di henter su kurason, el a kanta su himnonan
pa mustra su amor pa su Kreador.#2 Samuel 23:1
9El a pone kantornan dilanti di altá
pa laga kantikanan bunita resoná.#1 Krónikanan 16:4-7
10El a animá e fiestanan,
i duna dianan di fiesta grandi un bunitesa kompleto;
e ora ei nan tabata alabá nòmber santu di Señor,
mainta trempan ya kanto tabata resoná den santuario.
11Señor a kita su pikánan
i dun'é poder pa semper;
Señor a sera un aliansa real kuné
i a establesé un trono glorioso p'e den Israel.#2 Samuel 7; 12:13; 24:17-25
Salomon
12E yu hòmber sabí ku a sigui David
a biba den tur trankilidat, grásias na David.
13Salomon a bira rei den un tempu di pas.#1 Reinan 4:1,21-24; 6:1-38
Dios a dun'é trankilidat na tur parti
p'e konstruí un tèmpel pa Señor,
traha un santuario pa semper.
14Esta sabí bo tabata den bo hubentut:
manera riu Nilo, rebosante di sabiduria!
15Bo spiritu a kubri tera
i a yen'é ku proverbio ingenioso.
16Bo nòmber a yega te na islanan leu,
i bo tabata stimá pa bo pas.
17Pueblonan a keda asombrá
pa bo kantika-, proverbio-, komparashon- i splikashonnan.
18Den nòmber di Señor Dios,
di Esun ku yama Dios di Israel,
bo a kolekshoná oro manera staña,
montoná plata manera chumbu.#1 Reinan 10:21,27
19Pero bo a drumi banda di muhénan
i duna nan dominio riba bo kurpa;
20bo a mancha bo honor, profaná bo kama,
i asina yama desgrasia riba bo famia
i kastigu riba bo desendientenan.#1 Reinan 11:1-13
21E reino a sker na dos
i for di Efraim a sali un kas real rebelde.#1 Reinan 12:1-20
22Sinembargo Dios no ta kita su amor
ni ta keda sin kumpli ku loke El a primintí.
E no ta destruí desendientenan di esun ku El a skohe,
E no ta kaba ku yunan di esun ku ta stim'É.
El a duna Yakob un parti ku a sobra
i a laga pa David rais di su tronkon.#2 Samuel 7:15; Salmo 89:33-37
Ta parti e reino na dos
23Salomon a muri na edat altu,
su yu hòmber ku a siguié
tabata baké den hasimentu di kos di bobo
i pober na sintí:
Rehabeam ku su mal konseho
a trese un kiebro den e pueblo.#1 Reinan 11:43—12:16
24E ora ei Yerobeam, yu di Nebat, a bini
ku a pone Israel peka.#1 Reinan 12:20,28-33
El a hiba e hendenan di Efraim riba kaminda di piká.
Nan pikánan a bira asina tantu
te ku e pikánan akí a kore ku nan for di e pais.#2 Reinan 17:6,18,21-23
25Nan a entregá nan mes na tur loke tabata malu,
te dia kastigu a kai riba nan.
Currently Selected:
Sirag 47: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013