Sirag 46
46
Yozue
1Yozue,#46:1 Yozue ta nifiká: Señor ta salba. yu di Nun, a sigui Moises komo lider#Yozue 1—11 di e pueblo.
E tabata tremendo den bataya, i manera su nòmber ta bisa
e tabata un gran hòmber den salbashon di esnan ku Dios a skohe;
el a tuma vengansa riba su atversarionan
i duna Israel e tera komo propiedat.
2Kon glorioso e tabata, ora el a hisa su man
i saka su lansa kontra siudatnan!
3Ken lo por a resistié?
Di pursi ta gueranan di Señor e tabata bringa.
4N' ta su man a pone solo para ketu
i un dia no a para bira dos?
5El a invoká Dios Altísimo
ora su enemigunan a hink'é den pèrtá di tur banda
i Señor grandi a skuch'é
i manda pipitanan di eis ku forsa tremendo.
6El a ranka bai riba e pueblo enemigu
i kaba ku su atversarionan den nan spelònk,
pa e pueblonan ku e israelitanan a derotá
lo haña sa ku nan guera ta guera di Señor.
E spiòn Kaleb
7Enberdat Yozue tabata sigui e Señor.
Tambe den tempu di Moises, el a mustra fieldat,
e i Kaleb, yu di Yefune.
Nan a resistí kontra komunidat,
stroba e pueblo di hasi piká
i stòp nan di murmurá.#Numbernan 14:6-10
8P'esei ta nan dos so Señor a laga na bida
di e 600.000 hende den desierto,
El a hiba nan dos e tera ku tabata nan herensia,
e pais ku ta mana lechi i miel.#Numbernan 11:21; 14:26-38; 26:65
9Señor a duna Kaleb forsa,
el a keda fuerte te na su behes:
Señor a lag'é subi bai region di serunan,#Yozue 14:6-15
i su desendientenan a poderá di e region ei pa semper.
10Asina tur israelita por a komprondé
ku ta bon pa sigui Señor.
Huesnan
11I e Huesnan un pa un,#Huesnan 2—16
ku no a sigui diosnan falsu
i ku no a bira lomba pa Señor.
Laga nan keda biba semper den nos memoria!
12Stèk nobo spreit for di nan restunan,
nòmber di e hòmbernan ilustre ei
biba di nobo den nan desendientenan!
Samuel
13Samuel, kerí pa Señor, profeta#1 Samuel 1:11,24-28; 3:19—4:1 di Señor,
a instituí poder real
i a konsagrá gobernadornan pa su pueblo.#1 Samuel 10:1; 16:13
14Segun lei di Señor el a parti hustisia den komunidat#1 Samuel 7:3-17
i Señor a tene mizerikòrdia ku nan.
15Pasobra e tabata papia bèrdat,
el a proba di ta un berdadero profeta
i pa su palabranan nan a asept'é
komo un berdadero vidente.
16Ora su enemigunan tabata pèrt'é di tur banda
el a sklama na Señor Todopoderoso,
miéntras e tabata ofresé un lamchi na lechi.
17Señor a laga bos ronka na shelu
i a laga su stèm resoná ku forsa.
18El a kaba ku e komandantenan di Tiro
i tur e prínsipenan filisteo.
19I promé ku el a bai sosegá pa semper,
el a duna testimonio dilanti di Señor
i dilanti di e rei ku el a konsagrá:
‘Nunka mi no a aseptá ni plaka
ni asta un sandalia di niun hende!’
Ningun hende no por a desmentí esei.#1 Samuel 12:3-5
20Asta despues di su morto, rei a konsult'é
i el a bisa rei kon rei su fin lo ta;
el a alsa su stèm for di bou di tera#1 Samuel 28:3-19
pa kita piká di e pueblo
pa medio di su kontesta.
Currently Selected:
Sirag 46: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013