Sirag 45
45
Moises
1For di dje El a laga sali un hòmber deboto,
ku a gana simpatia di tur,
kerí serka Dios i serka hende.#Éksodo 11:3
Moises, di felis memoria.
2El a dun'é gloria igual na esun di angelnan,
su enemigunan tabatin mashá miedu di dje.
3Riba su palabra mesora Dios a hasi milager,
Dios a hasié grandi den bista di reinan,
dun'é mando riba su pueblo
i mustr'é algu di su Gloria.#Éksodo 7—10; 33:20-22
4Pa su fieldat i humildat#Numbernan 12:3
El a skoh'é riba tur hende.
5El a lag'é tende su stèm,
hib'é den e nubia skur
i kara kara a dun'é su mandamentunan,#Éksodo 19:7—20:21; 24:18; Deuteronomio 6:1-2
lei di bida i di konosementu,
p'e instruí Israel den e aliansa
i siña pueblo di Yakob su desishonnan.
Aaron
6Señor a alsa ruman hòmber di Moises
Aaron,#Éksodo 4:14; 28 un santu meskos ku Moises, di tribu di Levi.
7El a sera un aliansa eterno kuné
i hasié gransaserdote di pueblo.
El a dun'é gloria ku splendor
i bistié un paña luhoso.
8El a bisti Aaron ku beyesa perfekto
i dòrn'é ku señalnan di su poder;
El a dun'é e túnika, e toga
i e mantel yamá efod.
9El a kologá granatapel rònt di e efod
i hopi bèl chikitu na tur banda,
esakinan mester a zona ora Aaron tabata kana,
mester por a tende e zonido den tèmpel
komo señal pa e yunan di su pueblo.
10El a bistié e paña sagrado, koló di oro, blou i kòrá püs,
obra di man di un artista,
i e pechero di desishon ku urim i tumim.
11E pechero akí tabata trahá di hilu kòrá bibu, obra di un eksperto,
ku piedranan presioso, kòrtá manera seyo,
montá den oro, obra di un platé,
nan mester a sirbi komo rekordatorio;
piedranan ku nòmber grabá aden
segun e kantidat di tribu di Israel.
12El a pone un korona di oro rondó di e tùlbant
ku e seyo sagrado,
un kondekorashon di honor, un obra mahestuoso,
riku dòrná, un deleite pa bista.
13No tabatin algu bunita asina promé kuné
i niun hende ku no tabata pertenesé na su tribu
no a bistié nunka,
solamente Aaron su yu hòmbernan
i su desendientenan.
14Su ofrendanan lo kima kompletamente,
dos be pa dia, semper bai.
15Moises a nombr'é saserdote
i konsagr'é ku zeta sagrado;
esei a bira un aliansa pa semper p'e
i pa su desendientenan tambe,
pa tanten ku shelu ta eksistí
nan sirbi Señor komo saserdote
i bendishoná e pueblo den Nòmber di Señor.#Éksodo 29; Levítiko 8; Numbernan 6:23-27
16Moises a skoh'é for di tur hende
pa ofresé sakrifisio na Señor,
perfume i holó dushi, pa hala atenshon di Señor,
pa haña pordon pa e pueblo di Israel.#Levítiko 1—2; 16
17Moises a entreg'é su mandamentunan
i a dun'é poder den asuntunan di derecho i lei,
p'e siña e pueblo Dios su palabranan
i instruyé su leinan.
18Hendenan no outorisá a lanta kontra Aaron,
nan a bira yalurs riba dje den desierto;
rabia a drenta kurpa di e hendenan di Datan i Abiram
i di e aliadonan di Korag.#Numbernan 16
19Señor a ripará i E no a gusta e kos,
den su furia El a destruí nan.
El a hasi milager kontra nan
i a destruí nan den kandela.
20El a oumentá honor di Aaron
i a dun'é un herensia:
El a regal'é e promé parti di kosecha#Numbernan 18:1-20
i a reservá e pannan sagrado pa e saserdotenan.#Levítiko 24:5-9
21Nan tabata por kome di e sakrifisionan, ofresé na Señor;
esei El a duna Aaron i su desendensia.
22Pero a pèrmitié haña un parti
den e tera ku e pueblo a haña,
‘pasobra Señor mes ta bo parti i bo herensia.’#Numbernan 18:20
Pinhas
23Pinhas, yu di Eleazar, ta bini na di tres lugá den e famosonan,
pasobra e tabatin zelo pa tur loke ta di Señor,
el a keda fiel, ora e pueblo a bira lomba.
El a mustra balor i zelo
i a logra rekonsiliashon pa Israel.#Numbernan 25:7-13; Salmo 106:30-31
24P'esei Dios a sera un pakto di amistat kuné,
pon'é na kabes di e santuario i di e pueblo
pa e funshon di gransaserdosio pertenesé n'e
i na su generashon te den eternidat.
25Tambe Dios a sera un aliansa ku David,
yu di Ishai, di tribu di Huda;
pero dignidat di rei ta pasa di tata pa un yu hòmber,
miéntras e herensia di Aaron ta pasa pa tur su desendientenan.
Bendishon riba e gransaserdotenan
Anto awor, alabá Señor ku ta bon,
ku a koroná boso ku gloria.
26Señor duna boso kurason sabiduria
pa goberná su pueblo ku hustisia,
pa felisidat no bandoná boso nunka
i boso outoridat dura pa tur eternidat.
Currently Selected:
Sirag 45: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013