Hebreonan 3
3
Hesus ta superior na Moises
1P'esei, rumannan, boso ku ta pertenesé na Dios i ku El a yama pa ta di djE, paga bon tinu na Hesus, Apòstel i Gransaserdote di e fe ku nos ta profesá. 2E tabata fiel na Dios ku a nombr'É, meskos ku Moises tambe a kumpli fielmente ku su tarea den henter kas di Dios.#Numbernan 12:7 3Pero Hesus ta digno di un honor mas grandi ku Moises, pasobra esun ku ta konstruí un kas meresé mas honor ku e kas mes. 4Tur kas ta hende a traha. Pero Esun ku a traha tur kos, ta Dios. 5Moises tabata fiel komo sirbidó den henter kas di Dios; asina el a duna testimonio di loke Dios lo a bisa despues. 6Pero Kristu ta fiel komo e Yu nombrá riba kas di Dios. I e kas ei ta nos mes, si a lo ménos nos keda tene ku kurashi i konvikshon na loke nos ta spera.#3:6 Tin manuskrito ku ta añadí: te na final.
Un lugá di deskanso pa pueblo di Dios
7Ta manera Spiritu Santu a bisa antó:
‘Si awe boso tende su stèm,
8no sera boso kurason,
manera promé aya tempu di e lantamentu,
manera e dia ku boso a pone Dios na prueba den desierto,
9ora boso grandinan a tenta i provoká Mi,
ounke nan a mira mi obranan,
10kuarenta aña largu.
P'esei Mi a rabia ku e pueblo ei
i Mi di: “Esta un pueblo solo birá!”
Nan no kièr a konosé mi kamindanan.
11P'esei den mi rabia, Mi a hura pa Mi mes:
“E lugá di deskanso ku Mi a warda pa nan,
hamas i nunka nan lo no drent'é.” ’#Salmo 95:7-11
12Mi rumannan, paga tinu pa ningun di boso, pa medio di un aktitut robes, no bira infiel na Dios bibu i bira lomba p'E. 13Pero tanten e ‘awe’ ku Skritura ta menshoná dura, boso mester animá otro tur dia, di manera ku ningun di boso no ta laga piká gañ'é i sera su kurason. 14Pasobra nos tin parti na Kristu, si nos mantené e konfiansa ku nos tabatin na prinsipio, te na final. 15Skritura ta bisa:
‘Si awe boso tende su stèm,
no sera boso kurason,
manera promé ayá tempu di e lantamentu.’#Salmo 95:7-8
16Ta ken tabata esnan ku a skucha i rebeldiá? Tabata tur esnan ku bou di guia di Moises a sali for di e pais Egipto. 17I ku ken Dios tabata rabiá kuarenta aña largu? Tabata ku esnan ku a peka i di kende e kadaver a keda bentá den desierto. 18Di ken El a hura, ku nan lo no drenta e lugá di deskanso? No tabata di nan, ku a nenga di obedesé?#Numbernan 14:1-35 19Ta kla, ku nan no por a drenta e lugá di deskanso pasobra nan no tabatin fe.
Currently Selected:
Hebreonan 3: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013