Hebreonan 2
2
Mensahe di salbashon
1P'esei nos mester paga mas tantu atenshon na loke nos a tende, pa nos no pèrdè kaminda. 2E palabranan ku Dios a papia pa medio di e angelnan, ya tabata konfiabel, di manera ku kada hende ku tabata aktua kontra nan i no tabata obedesé nan, tabata haña su kastigu meresí. 3Kon nos por keda sin haña kastigu, si nos no paga atenshon na e mensahe di un salbashon grandi asina? Pasobra Señor mes a anunsiá e salbashon ei promé i esnan ku a tende e mensahe akí a konfirmá esei pa nos. 4Ademas Dios a konfirmá nan testimonio pa medio di señal, milager i tur sorto di echo poderoso i dor di parti don di Spiritu Santu, tur kos segun su boluntat.
Yu di Dios ta hiba na salbashon
5Dios no a someté e mundu futuro, di kua nos ta papiando, na angelnan. 6Al kontrario, un kaminda den Skritura ta pará:
‘Kiko hende ta pa Bo kòrda riba dje,
kiko e ta pa Bo sinti p'e?
7Pa poko tempu Bo a hasié ménos ku e angelnan,
Bo a koron'é ku gloria i honor;#2:7 Tin manuskrito ku ta añadí: Bo a pon'é manda riba obra di bo man.
8tur kos Bo a pone bou di su pia.’#Salmo 8:4-6
Ku Dios a someté tur kos n'E, ta nifiká, ku E no a hasi eksepshon pa nada. Awor akí nos no ta mira ainda ku tur kos ta someté n'E. 9Pero sí nos ta mira Hesus, ku korto tempu a haña un posishon mas abou ku e angelnan, pero ku awor ta koroná ku gloria i honor pa motibu di su morto. Dios, den su bondat, tabata ke pa E lo a muri pa tur hende.#Filipensenan 2:6-11; Hebreonan 12:2
10Dios, meta final i Kreador di tur kos, ker a laga hopi yu partisipá den su gloria. P'esei tabata kumbiniente ku E lo a hiba Hesus, nan guia riba e kaminda di salbashon, pa medio di sufrimentu na perfekshon. 11Esun ku ta konsagrá hende na Dios, i tur esnan ku El a konsagrá na Dios, tin mesun Tata. P'esei E no ta sinti bèrgwensa pa yama nan su ruman, 12ora E bisa Dios:
‘Lo Mi konta mi rumannan di bo Nòmber
i alabá Bo den presensia di nan tur.’#Salmo 22:22
13Tambe E ta bisa:
‘Lo Mi pone mi konfiansa den Dios.’#Isaías 8:17
I:
‘At'Ami aki ku e yunan ku Dios a duna Mi.’#Isaías 8:18
14Komo e yunan akí ta hende di karni i wesu, El a bira hende manera nan, pa, medio di su morto, E kaba ku esun ku tabatin poder riba morto, esta diabel.#Sabiduria 2:24 15Asina El a liberá esnan, ku pa miedu di morto a biba henter nan bida manera katibu. 16Pasobra no ta bai E pa e angelnan, pero, manera Skritura ta bisa: pa e desendientenan di Abraham. 17P'esei E mester a bira den tur sentido pareu na su rumannan, di manera ku E por a bira un gransaserdote mizerikordioso i fiel dilanti di Dios i asina paga pa e pikánan di e pueblo. 18Komo E mes a pasa den prueba i a sufri, E por yuda tur esnan ku ta pasa den prueba.
Currently Selected:
Hebreonan 2: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013