Hebreonan 4
4
1Dios su promesa pa por drenta su lugá di deskanso, ta konta ketu bai. P'esei ban tene kuidou, pa despues no resultá ku un di boso a keda atras. 2Nos tambe a risibí e bon notisia, meskos ku nan; pero e mensahe ku nan a tende, no a yuda nan, pasobra nan no a kompartí fe di esnan ku a obedesé e mensahe. 3Nos, ku ta kere, sí ta drenta e lugá di deskanso ei, pero nan nò, manera Dios ta bisa:
‘P'esei den mi rabia, Mi a hura pa Mi mes:
“E lugá di deskanso ku Mi a warda pa nan,
hamas i nunka nan lo no drent'é.” ’#Salmo 95:11
Tòg Dios su trabou tabata kla for di kreashon di mundu, 4pasobra un kaminda Skritura ta bisa di e di shete dia: ‘E di shete dia Dios a sosegá di tur su trabou.’#Génesis 2:2 5Pero ei nos ta lesa:
‘E lugá di deskanso ku Mi a warda pa nan,
hamas i nunka nan lo no drent'é.’#Salmo 95:11
6Esnan ku a tende e bon notisia promé, no a drenta e lugá di deskanso antó pa motibu di nan desobediensia, pero ainda e posibilidat pa hende drenta e lugá di deskanso ta keda eksistí. 7P'esei Dios ta bolbe fiha un dia, ku yama ‘awe’. Di esei El a bisa hopi tempu despues pa medio di David den e pasashi ku ya a sita:
‘Si boso tende su stèm awe,
no sera boso kurason.’#Salmo 95:7-8
8Si Yozue a hiba e pueblo na e lugá di deskanso di Dios,#Deuteronomio 31:7; Yozue 22:4 Dios lo no a papia despues mas di un otro dia. 9Ke men ku tin un tempu di deskanso ta warda pueblo di Dios ainda, manera Dios a sosegá riba e di shete dia. 10Pasobra esun ku drenta e lugá di deskanso di Dios, ta sosegá di su trabou, manera Dios a sosegá di djE. 11Ban hasi esfuerso antó pa drenta e lugá di deskanso ei, di manera ku ningun hende no ta muri dor di sigui mal ehèmpel di esnan den desierto, ku no a obedesé.
12Pasobra palabra di Dios ta bibu i poderoso. E ta kòrta mas skèrpi ku un spada ku ta kòrta tur dos banda.#Isaías 49:2; Efesionan 6:17 E ta penetrá te na e punta kaminda alma i spiritu, manteka di wesu i wesu ta mishi ku otro. E ta analisá deseo i pensamentu di hende. 13Pa Dios niun kriatura no ta skondí. Dios ta mira tur kos manera nan ta den realidat. T'E nos mester duna kuenta.
Hesus, gransaserdote
14Laga nos tene duru na e fe ku nos ta profesá. Pasobra nos tin un gransaserdote elevá, esta Hesus, Yu di Dios, ku a drenta shelu yega te serka Dios. 15Nos tin un gransaserdote ku ta kapas di kompadesé di nos debilidatnan; E mes tabata poné na prueba den tur sentido, presisamente meskos ku nos. Pero E no a peka. 16Ban aserká Dios su trono, antó ku konfiansa, kaminda por haña grasia, pa E tene mizerikòrdia ku nos i den su bondat yuda nos na ora di nesesidat.
Currently Selected:
Hebreonan 4: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013