Sɛ́núnywɛ́ 7
7
Lě e è nɔ ji gbɛtɔ́ bǐ gbɔn ɔ́ jɛ́n è nɔ ji axɔ́sú gbɔn
1Nyi ɖésú ɔ́, gbɛtɔ́ jɔmakú mɛ bǐ ɖɔhun wɛ un nyí, bó jɔ ɖo gbɛtɔ́ nukɔntɔn e è kán kɔ́ tɔn é sín kúnkan mɛ. Nyɔ̌nu ɖokpó xomɛ wɛ è blǒ agbaza nú mì ɖe. 2Gbɔn vǐví e nɔ́ tíin ɖo kpɔ́jijɛ súnnu kpódó nyɔ̌nu kpán tɔn mɛ é mɛ wɛ è dǒ kún ce ɖe, bɔ ɖo sun tɛ́nnɛ gbla mɛ ɔ́, un mɔ wǔsyɛ́n ɖo hunsin mɛ. 3Nyi ɖésú ɔ́, sín jiji hwenu ce ɔ́, jɔ e mɛ bǐ nɔ́ gbɔ́n dó gbɔjɛ́ ná é jɛ́n nyi lɔ gbɔ́n, bó wá ayǐ e jí mɛ bǐ nɔ́ mɔ wǔvɛ́ ɖe é; ɖi lě e é nɔ́ nyí gbɔn nú mɛ bǐ é ɖɔhun ɔ́, xósúsú ce nukɔntɔn ɔ́, avǐ wɛ é nyí. 4È sɔ́ nǔ nú mì, bó ná nǔɖuɖu mì, lobo tɔ́jú mì. 5Axɔ́sú ɖé wá gbɛ gbɔn alɔkpa ɖěvo ǎ. 6Alɔkpa ɖokpó ɔ́ mɛ jɛ́n mɛ bǐ nɔ́ jɔ gbɔn, bó ká nɔ́ gosín gbɛ ɔ́ mɛ gbɔn kú gbla mɛ.
Wǎn yíyí ɖó nú Sɛ́núnywɛ́
7 Nǔ e wú wɛ un byɔ́ bɔ Mawu ná mì nǔmɔjɛnǔmɛ é nɛ́; un sa vo bɔ Sɛ́núnywɛ́ sín ayi wá xo ce mɛ. 8Bɔ un ka yí wǎn ná hú axɔ́súzinkpo abǐ axɔ́súkpogɛ, bɔ un sɔ́ dɔkun dó mɔ nǔtí ɖo akpá tɔn ǎ. 9Un sɔ́ ɛ jlɛ́ dó akwɛ́nújɛ́ ɖěbǔ wú ǎ; nǔgbó ɔ́, siká e ɖo gbɛ ɔ́ mɛ é bǐ ɔ́, kɔ́ kpɛɖé kpowun ɖɔhun wɛ é cí ɖo akpá tɔn; kpatágan ɔ́, adu ɖɔhun wɛ é ná cí ɖo akpá tɔn. 10Un yí wǎn n'i hú lanmɛ ɖagbe kpódó agbaza ɖɛkpɛ ɖɛkpɛ kpán, bɔ un jó wěziza dó, bó yi sɔ́ ɛ, ɖó wěziza tɔn nɔ́ kú awi ǎ.
11É hɛn nyɔ̌ná lɛ́ɛ bǐ wá nú mì zɛ̌nzɛ̌n, bɔ dɔkun ma ɖó xixa ɔ́ bǐ ɖo alɔ tɔn mɛ. 12Nyɔ̌ná e ɖo Sɛ́núnywɛ́ mɛ lɛ́ɛ ɔ́, un ɖɔ́ bǐ kpɔ́n, ɖó é wɛ nɔ́ hɛn yě wá, có un ko tunwun ɖ'ayǐ lɔ ɖɔ é wɛ nyí nǔ énɛ́ lɛ́ɛ bǐ sín dodó ǎ.
13Nǔ e un kplɔ́n kpódó ayi ɖo wɛn kpán ɖo gɔ̌n tɔn é ɔ́, un vɛ́ dó mɛɖé wú ǎ, un ka sɔ́ dɔkun tɔn hwlá ǎ. 14Nǔgbó ɔ́, Sɛ́núnywɛ́ ɔ́, dɔkun maɖuvɔ wɛ é nyí nú gbɛtɔ́ lɛ́ɛ bǐ. Mɛ e mɔ yí lɛ́ɛ é bǐ wɛ Mawu nɔ́ yí wǎn ná, lobɔ nyɔ̌ná e nɔ́ tɔ́n sín kplɔ́n ɖagbe mɛ lɛ́ɛ é nɔ́ zɔ́n bɔ nǔ yětɔn nɔ́ nyɔ́ nukún tɔn mɛ.
Mawu wɛ nyí tɔjɔtɛn nǔtunwuntunwun bǐ tɔn
15Mawu wɛ nɔ́ xlɛ́ ali Sɛ́núnywɛ́ ɔ́ bó ká nɔ́ ɖe nǔnywɛ́tɔ́ lɛ́ɛ ɖó ali jí; hǔn, é ní bó bló nú má nɔ́ dó ayi do dó ɖɔ xó, lobo lin tamɛ titewungbe lě e é jɛ xá acɛ e un mɔ yí lɛ́ɛ gbɔn é. 16Nǔgbó wɛ, nǔ bǐ wɛ ɖo acɛ tɔn mɛ; mǐ ɖésúnɔ kpó xó mǐtɔn lɛ́ɛ kpán, nǔmɔjɛnǔmɛ mǐtɔn kpódó kanbíbí mǐtɔn kpán lɔmɔ̌. 17Mawu wɛ ná nǔnywɛ́ nǔgbó tɔn mǐ dó nǔ e kó tíin lɛ́ɛ bǐ wú. É kplɔ́n mǐ lě e è to gbɛ ɔ́ gbɔn é kpódó lě e jɔhɔn, sin, myɔ kpódó ayǐkúngban kpán nɔ́ wa nǔ gbɔn é. 18É lɛ́ vɔ́ kplɔ́n mǐ tito hwenu lɛ́ɛ tɔn, lě e hwe nɔ́ sɛ sín tɛn ɖě mɛ yi jɛ tɛn ɖěvo mɛ gbɔn é, lě e jǐ hwenu kpódó alǔun hwenu kpán nɔ́ jɛ yěɖée gúdo gbɔn é, 19lě e xwe lɛ́ɛ ɖě nɔ́ jɛ ɖě gúdo gbɔn é, alɔ e xwé sunví ɖokpó ɖokpó ɖe é. 20Nǔ e kanlin lɛ́ɛ ɖokpó ɖokpó nyí é kpódó ninɔmɛ gběkanlin lɛ́ɛ tɔn kpán. É lɛ́ kplɔ́n mǐ nǔwúkpíkpé yɛ lɛ́ɛ tɔn kpódó tamɛ linlin gbɛtɔ́ lɛ́ɛ tɔn kpán, ama tɛnmɛ tɛnmɛ lɛ́ɛ kpódó azɔn gbɔ nú mɛ sín acɛ e ɖɔ yětɔn lɛ́ɛ ɖó é kpán. 21Un tunwun nǔ e nukún má mɔ ǎ é kpódó nǔ e nukún hɛn ɔ́, é ná mɔ lɛ́ɛ é bǐ kpán. Nǔgbó ɔ́, Sɛ́núnywɛ́ e ɖó nǔ bǐ é ɖésú kplɔ́n nǔ énɛ́ lɛ́ɛ bǐ mì.
Jujɔ e ɖo Sɛ́núnywɛ́ sí é
22Sɛ́núnywɛ́ ɔ́ ɖó nǔmɔjɛnǔmɛ yixa mímɛ́ ɖé; é ɖóɖó wɛ é ká ɖe cóbó ká ɖó nǔwiwa alɔkpa alɔkpa. É dó gɛdɛ bó bí kan; é nɔ́ xo mɛ zlɛ́; é nɔ́ mɔ nǔ jɛ nǔ bǐ mɛ, lobo ɖo séwéséwé, bɔ nǔ ɖěbǔ va dó wǔ tɔn ǎ; é nɔ́ yí wǎn nú nǔ ɖagbe, bó bí kan. 23Nǔ ɖěbǔ nɔ́ syɛ́n dɔn ɖo nukɔn tɔn ǎ; é nɔ́ wa ɖagbe nú mɛ, lobo nɔ yí wǎn nú gbɛtɔ́; é nɔ́ hɛn nǔ syɛ́nsyɛ́n, bó nɔ́ ɖeji dó éɖée wú, lobo ka nɔ xosu ǎ. É kpé nǔ bǐ wú, lobo ka nɔ nya xɛ ɖo nǔ bǐ jí; é nɔ́ xo nǔmɔjɛnǔmɛ sín ayi mímɛ́ lɛ́ɛ bǐ zlɛ́ káká yi jɛ éé sɛ́ hú bǐ lɛ́ɛ é jí. 24Ɖó wǔ nɔ́ yá Sɛ́núnywɛ́ hú nǔ e nɔ́ kó dán wǔ lɛ́ɛ é bǐ. Lě do e é mɛ́ sɔ é zɔ́n bɔ é nɔ́ xo nǔ bǐ zlɛ́. 25Nǔgbó ɔ́, nǔwúkpíkpé Mawu tɔn sín jɔhɔn ɖé wɛ, bó gosín susu Mawu Nǔbǐwúkpétɔ́ ɔ́ tɔn mɛ télélé; énɛ́ wú wɛ nǔ kwíji kwíji ɖěbǔ nɔ́ sixú yi mɛ ǎ. 26Wěziza mavɔ mavɔ sín ɖiɖe wɛ é nyí, bó lɛ́ nyí nǔkpɛ́n maɖóblɔ̌ɖowǔ e mɛ è nɔ kpɔ́n Mawu núwiwa lɛ́ɛ ɖe é, bó lɛ́ nyí xomɛnyínyɔ́ Mawu tɔn sín nukún mɛ. 27É ɖokpónɔ wɛ ɖe cóbó ká nɔ́ kpé nǔ bǐ wú. É nɔ́ xa ji ɖyɔ́ wunmɛ gbeɖé ǎ; nǔ ká ɖo mɔ̌ có, é nɔ́ húzú nukún mɛ nú nǔ bǐ. É nɔ́ ɖo éɖée ɖe xlɛ́ gbɛtɔ́ e nyí Mawu tɔn lɛ́ɛ wɛ, sín kúnkan ɖě jí sɔ́ yi jɛ ɖě jí, bó nɔ́ sɔ́ yě dó húzú gbeyíɖɔ Mawu tɔn kpódó mɛ e Mawu yí wǎn ná lɛ́ɛ é kpán. 28Nǔgbó ɔ́, mɛ e nɔ zán gbɛ tɔn ɖo kpɔ́ xá Sɛ́núnywɛ́ é kɛ́ɖɛ́ jɛ́n Mawu nɔ́ yí wǎn ná.
29Nǔgbó wɛ, Sɛ́núnywɛ́ ɔ́ nyɔ́ ɖɛkpɛ taala hú hwe, lobo nɔ za wě titewungbe hú sunví lɛ́ɛ bǐ. Nú è sɔ́ ɛ jlɛ́ dó wěziza kéze tɔn wú ɔ́, è nɔ mɔ ɖɔ é hú gǎn ɛ. 30Ɖó kéze nɔ́ wá jó tɛn nú zǎn, lo ɔ́, Sɛ́núnywɛ́ nɔ́ bú nu ɖo nǔ nyanya ɖěbǔ nukɔn ǎ.
Currently Selected:
Sɛ́núnywɛ́ 7: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.