Sɛ́núnywɛ́ 8
8
1É nɔ́ vlɔ́n kan nú nǔwúkpíkpé tɔn sín wɛ̌kɛ́zo ɖě jí sɔ́ yi jɛ ɖěvo jí; é nɔ́ kpa acɛ nú nǔ bǐ kpódó xomɛnyínyɔ́ kpán.
Sɛ́núnywɛ́ wɛ nyí asi ɖagbe ɖokpó géé é tíin é
2 Sɛ́núnywɛ́ wɛ un yí wǎn ná, bó bɛ́ sín wǐnnyáwínnyá mɛ ce; un yí wǎn nú ɖɛkpɛ tɔn, bó jló ná sɔ́ ɛ dó ɖó asi ná. 3É nɔ́ ɖe lě e é jɔ kpó susu kpán gbɔn é xlɛ́ gannaganna, ɖó é má gbɛ ɖokpó ɔ́ xá Mawu, bɔ mɛ e kpa acɛ nú nǔ bǐ é ká yí wǎn n'i. 4 Nǔgbó ɔ́, è nǎ ɖɔ ɔ́, Mawu ɖe nǔnywɛ́ tɔn e ɖo hwlǎhwlá é xlɛ́ ɛ, bɔ é ɖe nǔ e wá gbé é ja é sín wě xá ɛ. 5Dɔkun ɔ́, nǔ ɖagbe wɛ é nyí, bɔ è nɔ jló ɖo gbɛ mɛtɔn mɛ. Lo ɔ́, dɔkun ɖé ká tíin, bó xɔ akwɛ́ hú Sɛ́núnywɛ́ e ɖó nǔ bǐ é a? 6Nǔmɔjɛnǔmɛ ɔ́ nɛ́ nɔ́ wa nǔ titewungbe nɛ́; lo ɔ́, Sɛ́núnywɛ́ e bló nǔ bǐ ɔ́, wa nǔ hu i ǎ cé? 7Mi ka yí wǎn nú nǔjlɔ́jlɔ́wiwa a? Éénɛ́, Sɛ́núnywɛ́ wɛ nyí tɔjɔtɛn walɔ ɖagbe nǔvɔɖéwú lɛ́ɛ bǐ tɔn. Nǔgbó ɔ́, é wɛ nɔ́ ná mɛɖéejíɖuɖe, sɔxwixwe, ayijlɔ́jlɔ́ɖíɖó, hwɛjijɔ kpódó akɔ́nkpinkpan kpán. Nǔ ɖěbǔ sɔ́ ɖo ta jí nú gbɛtɔ́ lɛ́ɛ ɖo gbɛ ɔ́ mɛ zɛ Sɛ́núnywɛ́ wú ǎ. 8Mi jló ná ɖu azɔ̌ nǔnywɛ́ tɔn sín le a? Sɛ́núnywɛ́ tunwun sɔ e wá yi é, bó ká lɛ́ mɔ nǔ jɛ sɔ e ja é wú. É tunwun xógɛ́dɛ́gɛ́dɛ́ lɛ́ɛ sín tínmɛ, lobo nɔ mɔ nǔ jɛ nǔ e vɛ́ wǔ lɛ́ɛ é mɛ. É nɔ́ ɖó kpasin nǔ ɖaxó ɖaxó e ná wá jɛ lɛ́ɛ é tɔn kpódó hwenu tají tají gbɛ ɔ́ tɔn lɛ́ɛ kpán.
9Hǔn, un wá sɔ́ Sɛ́núnywɛ́ dó ɖó alizɔnxámɛtɔ́ gbɛ ce tɔn ná. Nǔgbó ɔ́, un tunwun i; é ná ɖe wě xá mì bɔ un ná wa ɖagbe, lobo ka ná dó wǔsyɛ́n lanmɛ nú mi ɖo wǔvɛ́ ce lɛ́ɛ kpódó aluwɛ hwenu ce lɛ́ɛ kpán mɛ. 10Un nɔ ɖɔ nú nyiɖée ɖɔ: “Sɛ́núnywɛ́ ná zɔ́n bɔ un ná húzú nǔsúɖaxó ɖo ahwan lɛ́ɛ mɛ, bɔ un na bo kpo ɖo dɔ̌nkpɛvú mɛ ɔ́, mɛxó lɛ́ɛ ná nɔ́ ɖó sísí nú mi. 11Hwenu e un ná wá ɖo hwɛ ɖɔ gbo wɛ ɔ́, è nǎ wá mɔ fí e hwɛɖiɖɔ ce gɔ́ngɔ́n yi jɛ ɔ́ wú, lobɔ mɛjɔmɛ lɛ́ɛ mɔ mì ɔ́, yě ná nɔ́ kpa mì. 12Hwenu e un ná nɔ numakɛ é ɔ́, yě ná ɖó nukún xóɖiɖɔ ce. Hwenu e un ka ná wá jɛ xó ɖɔ jí ɔ́, yě ná ɖótó, bó sɔ́ ayi ɖó jǐ ce. Ényí xó ce wá ɖo ga ɖi wɛ ɔ́, yě ná sú alɔ nu, bó ɖótó kpódó sísí kpán. 13Gbɔn Sɛ́núnywɛ́ núwiwa gbla mɛ ɔ́, kú ná ɖu ɖo jǐ ce ǎ, lobɔ gbɛtɔ́ e ná wá jɔ lɛ́ɛ é ná nɔ́ flín mì tɛgbɛ. 14Un ná wá ɖu gǎn nú togun gěgé, lobɔ akɔta gěgé ná wá nɔ acɛ ce mɛ. 15Ényí axɔ́sú dídá lɛ́ɛ wá ɖo xó ce se wɛ ɔ́, xɛsi ná nɔ́ jɛ yě jí. Un ná nɔ́ nyɔ́ xomɛ dó togun ce wú, lobo ná nɔ́ kpan akɔ́n ɖo ahwangbénu. 16Un lɛ́ kɔ wá xwé gbe ɔ́, un ná nɔ́ bɛ yɛ ɖo Sɛ́núnywɛ́ kpá, ɖó nǔɖé nɔ́ vlɛ́ nu ɖo kpɔ́ nɔ xá ɛ mɛ ǎ. Mɛ e ɖo kpɔ́ xá ɛ é ɖě nɔ́ nɔ aluwɛ mɛ ǎ; é nyɔ́ wa ɔ́, mɛ bǐ wɛ nɔ́ mɔ awǎjijɛ kpódó xomɛhunhun kpán.”
Salomɔ́ɔ ɖó nǔnywɛ́ sín hu dó
17Un lin tamɛ dó nǔ énɛ́ lɛ́ɛ bǐ wú ɖo ayi mɛ, bó mɔ ɖɔ è ɖo bǔ xá Sɛ́núnywɛ́ ɔ́, è nɔ bú nyǐ gbeɖé ǎ. 18Ényí é zun xɔ́ntɔn xá mɛɖé ɔ́, nyɔ̌ná nǔvɔɖéwú wɛ mɛ ɔ́ nɔ́ mɔ. Ényí é ɖo nǔ wa wɛ ɔ́, dɔkun ɖumavɔ wɛ é nɔ́ dó ayǐ. È ɖo biba ɛ kpɔ́n wɛ hwɛhwɛ ɔ́, è nɔ wá húzú nǔnywɛ́tɔ́. È ɖo xó ɖɔ xá ɛ wɛ ɔ́, è nɔ húzú nǔsúɖaxó. Énɛ́ ɔ́ wú wɛ un jɛ gbě tɔn mɛ, bó ná sixú mɔ ɛ sɔ.
19Yɔkpɔ́vú ɖɛkpɛ ɖɛkpɛ ɖé wɛ un ko nyí, bɔ sɛ́ ɖagbe we dó jǐ ce. 20È nǎ ɖɔ nǔgbó tɔn ɔ́, ée un ko nyɔ́ ɖɛkpɛ é wú ɔ́, é ná mì agbaza blɔ̌máɖowǔ. 21Lo ɔ́, un wá mɔ ɖɔ un kún sixú ɖó Sɛ́núnywɛ́ Mawu mɛ vo ó. Nǔnywɛ́tɔ́ kuzú wɛ nyí ɖɔ è nǐ tunwun mɛ e nɔ ná é. Énɛ́ wú wɛ un kpan nukɔn Aklúnɔ ɔ́, bó sa vo n'i syɛ́nsyɛ́n dó byɔ́ ɛ Sɛ́núnywɛ́ ɔ́ kpódó ayi ce bǐ kpán.
Currently Selected:
Sɛ́núnywɛ́ 8: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.