Sɛ́núnywɛ́ 6
6
MI XO MLÁ SƐ́NÚNYWƐ́
(6—9)
Axɔ́sú lɛ́ɛ ɖó ná ba ná ɖó Sɛ́núnywɛ́
1Axɔ́sú lɛ́ɛ e mi, mi ɖótó bó se! Mi yí nǔkplɔ́nmɛ se. Togunkplátɔ́ gbɛ ɔ́ tɔn lɛ́ɛ e mi! 2Mi tɛ́ tó bó se mi nǔkplɔ́nmɛtɔ́ agun wɔ̌buwɔ́bú lɛ́ɛ tɔn, mi mɛ e gǎn ɖu ɖo togun gěgé nu nɔ́ víví ná lɛ́ɛ é. 3 Nǔgbó ɔ́, Aklúnɔ wɛ ná mi acɛkpikpa. Mawu Ajalɔ̌nlɔn wɛ ná mi gǎnnyínyí. É wɛ ná gbéjé nǔwiwa mitɔn lɛ́ɛ kpɔ́n, bó ná kpɔ́n linlin mitɔn lɛ́ɛ mɛ xéɖéxéɖé. 4Nǔgbó wɛ, axɔ́súɖuɖu tɔn sín kannu wɛ mi ɖe. Nǔ ɖo mɔ̌ có, mi ka ɖɔ hwɛ kpódó hwɛjijɔ kpán ǎ. Mi nyi sɛ́n ɔ́ ǎ, mi ka lɛ́ wa nǔ xwedó jlǒ Mawu tɔn ɔ́ ǎ. 5Éénɛ́! Aklúnɔ ná fɔ́n gǔ dó mi jí hwenu e mi ma ná ɖó nukún tɔn ǎ é, bɔ xɛsi ná jɛ mi jí; é ná wá ɖó hwɛ nú yě mɛ e nyí tonukún lɛ́ɛ é, bɔ é ná syɛ́n ɖésú. 6Ɖó é nɔ́ sɔ́ hwɛ kɛ mɛ e nɔ sɔ́ yěɖée hwe lɛ́ɛ kpódó xomɛnyínyɔ́ kpán, bó nɔ́ dɔn tó nú gǎnhúnǔtɔ́ lɛ́ɛ syɛ́nsyɛ́n. 7Ɖó Mawu nǔbǐnɔ ɔ́ nɔ́ dó gǔdofɔ ɖo mɛɖé nukɔn ǎ; gǎnhúnǔɖé ká nɔ́ dó xɛsi n'i ǎ. É wɛ ɖó gǎnmaɖowǔnánɔ lɛ́ɛ kpódó gǎnhúnǔtɔ́ lɛ́ɛ kpán, bó nɔ́ kpé nukún yě bǐ sésé wú gbɔn alɔkpa ɖokpó ɔ́. 8Lo ɔ́, Aklúnɔ nɔ́ ba do nú gǎnhúnǔtɔ́ lɛ́ɛ xéɖéxéɖé.
9Hǔn, mi axɔ́sú lɛ́ɛ, mi nú ɖɔ wɛ un ɖe. Mi bo kplɔ́n Sɛ́núnywɛ́ ɖíɖó, bó má wá jɛ hwɛ mɛ ó. 10Yě mɛ e nɔ nyi sɛ́n mímɛ́ lɛ́ɛ bɔ nǔ bǐ nɔ vɔ ɖ'é wú é ɔ́, è nǎ sɔ́ yě dó mɔ Mawu sín mɛ lɛ́ɛ. Lobɔ mɛ e nɔ yí nǔkplɔ́nmɛ sɛ́n énɛ́ lɛ́ɛ tɔn se lɛ́ɛ é ná sixú ɖe tɔ yěɖée ɖo hwɛɖiɖɔzán gbe. 11Nǔ nyí mɔ̌ hǔn, mi bo ɖótó nǔkplɔ́nmɛ ce céɖécéɖé; mi dlɔ́n dó e kpódó ayi mitɔn bǐ sésé kpán, énɛ́ ɔ́ mi ná ɖó ayi ɖagbe.
Sɛ́núnywɛ́ ɖésú wɛ nɔ́ wa xo go mɛ e nɔ ba ɛ lɛ́ɛ é
12Sɛ́núnywɛ́ nɔ́ kɔ́n, bɔ wěziza tɔn nɔ́ kú awi ǎ. É nɔ́ jó éɖée dó, bɔ mɛ e yí wǎn n'i lɛ́ɛ é nɔ́ kpɔ́n ɛ magbokɔ. É nɔ́ jó éɖée dó bɔ mɛ e ɖo biba ɛ wɛ lɛ́ɛ é nɔ́ mɔ ɛ. 13É ɖésú wɛ nɔ́ dó afɔ nú mɛ e jlǒ tɔn ɖo ayi mɛ ná lɛ́ɛ é jɛ nukɔn, bó nɔ́ sɔ́ éɖée xlɛ́ yě. 14Mɛ e jɛ gbě tɔn mɛ dó hwenu é ɔ́, nǔ nɔ́ cikɔ n'i ǎ. É ná mɔ ɛ ɖo ayǐjínjɔ́n, ɖo hɔn tɔn ta. 15Mɛ e nɔ lin tamɛ dó Sɛ́núnywɛ́ ɖokpó wú ɔ́, nǔmɔjɛnǔmɛ titewungbe wɛ é ɖó. Mɛ e nɔ nɔ amlɔ ma dɔ́ ɖó ta tɔn mɛ é sɔ́ ná ɖó nǔlinkpɔ́n ɖé ǎ. 16Nǔgbó ɔ́, é ɖésú nɔ́ gbɔn fí bǐ, bó nɔ́ jɛ mɛ e jɛ xá ɛ lɛ́ɛ gbé mɛ. É nɔ́ ɖe éɖée xlɛ́ yě kpódó xomɛnyínyɔ́ kpán ɖo ali yětɔn lɛ́ɛ xo, bó nɔ́ wá d'alɔ yě hweɖěbǔnu e yě nɔ́ ɖo tamɛ lin dó wǔ tɔn wɛ é.
17Fí e Sɛ́núnywɛ́ ɖíɖó bɛ́ sín é nɛ́ nyí jlǒ titewungbe ɖó dó yí nǔkplɔ́nmɛ tɔn se nɛ́. 18Nǔkplɔ́nmɛ Sɛ́núnywɛ́ tɔn sín jlǒ ɖíɖó ɔ́, wǎn yíyí nú Sɛ́núnywɛ́ wɛ. Wǎn yí nú Sɛ́núnywɛ́ ɔ́, tó nú se nú sɛ́n tɔn lɛ́ɛ wɛ, lobɔ sísí ɖó nú sɛ́n tɔn lɛ́ɛ ɔ́, jiɖiɖe ɖɔ è kún ná kú gbeɖé ó wɛ. 19Bɔ manakú ɔ́ ká nyí kpɔ́ nɔ xá Mawu. 20Gbɔn mɔ̌ ɔ́, jlǒ Sɛ́núnywɛ́ ɖíɖó tɔn ɔ́ nɔ́ sɔ́ mɛ axɔ́sú. 21Axɔ́sú akɔta lɛ́ɛ tɔn e mi, ényí acɛkpikpa mitɔn kpódó gǎnhúmɛ mitɔn kpán vɛ́ nú mi hǔn, mi bo nɔ wlí yɛ̌yi nú Sɛ́núnywɛ́; énɛ́ ɔ́, mi ná nyí axɔ́sú tɛgbɛ gbe.
Ani wɛ ka nyí Sɛ́núnywɛ́ ɔ́?
22Sɛ́núnywɛ́ ɔ́, ani wɛ ka nyí tawun? Fítɛ́ é ká gosín tawun? Un ná ba nǔ do ɖěbǔ cóbó ɖɔ nú mi lɔ ǎ. Un ná bɛ́ Sɛ́núnywɛ́ xó ɔ́ ɖiɖɔ sín lě e é jɔ gbɔn é jí. Wěxo agbawungba wɛ un ná sɔ́ nǔ e è hɛn ɔ́, è ná tunwun dó wǔ tɔn lɛ́ɛ é ɖó, bó ɖɔ nǔgbó tɔn xéɖéxéɖé. 23Un ka ná jó nyiɖée dó nú nǔjlódíngan e nɔ́ hɛn nǔ gblé é ǎ; nǔgbó ɔ́, nǔ jlǒ zɛ xwé wú kpódó Sɛ́núnywɛ́ kpán nɔ́ jɛ kpɔ́ ǎ. 24Sɛ́núnywɛ́ɖótɔ́ gěgé nɔ́ hwlɛ́n gbɛ ɔ́ gán, bɔ axɔ́sú nǔnywɛ́tɔ́ ɔ́ nɔ́ hɛn nyɔ̌ná wá nú togun tɔn. 25Mi yí nǔkplɔ́nmɛ ce se; énɛ́ ɔ́, mi ná wá ɖu le tɔn.
Currently Selected:
Sɛ́núnywɛ́ 6: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.