Sɛ́núnywɛ́ 5
5
1Hwe énɛ́ nu ɔ́, mɛ e wa nǔ ɖagbe é ná sí te kpódó jiɖiɖe kpó ɖo mɛ e ko dó ya n'i bó ná cá ɛ ko ɖó gǎndídó tɔn wú lɛ́ɛ é nukɔn. 2Hwenu e mɛ énɛ́ lɛ́ɛ ná wá mɔ ɛ é ɔ́, xɛsi ná jɛ yě jí. Hwlɛngán tɔn ná nyí nǔ bó kpácá yě taala, ɖó yě ɖó nukún tɔn ǎ. 3Ado ná hu yě ɖésú, bɔ yě ná xo kúsukpɔ; nǔ e yě wa nyi do lɛ́ɛ ná vɛ́ nú yě, bɔ yě ná ɖɔ ɖo yěɖée tɛ́ntin ɖɔ: 4“Ɖo xóxó ɖ'ayǐ ɔ́, mǐ kó ko nya énɛ́ ɔ́, bó kó cá ɛ ko, bɔ din ɔ́ lo, é nɛ́ ɖo fínɛ́ nɛ́ ǎ cé? Yɛyinɔgbɛ tɛ́ mǐ ká zán nɛ́? Mǐ nɔ́ mɔ ɖɔ ayimasɔgbenánɔ nú wa wɛ é ɖe hwe énɛ́ ɔ́ nu, bɔ kú tɔn cí winnyánú ɖɔhun nú mǐ. 5Lo ɔ́, Mawu ví lɛ́ɛ hwan mɛ wɛ é ɖe; yě mɛ e nyí Aklúnɔ tɔn lɛ́ɛ é. Nɛ̌ wɛ nǔ énɛ́ ɔ́ ká nyí gbɔn? 6Mǐ bú sín nǔgbó li ɔ́ jí bǐ dégbédégbé. Wěziza hwɛjijɔ tɔn ɖi wun ɖo gbɛ mǐtɔn mɛ ǎ. Hwe ká hun dó mǐ jí ǎ. 7Nǔ nyanya e nɔ hɛn nǔ gblé é mɛ wɛ mǐ wá yi dó ta. Mǐ yi xo axéko jí zlɛ́, fí e ali ɖě má ɖe ǎ é, bɔ mǐ yi xo Aklúnɔ li ɔ́ kpo.
8“Goyítɔ́ gbɛ e mǐ nɔ́ zán é ɔ́, le tɛ́ ká tɔ́n ɖ'é mɛ nú mǐ lo! Mǐ nɔ́ gó dó dɔkun mǐtɔn lɛ́ɛ jí. Ani wɛ é ká hɛn wá nú mǐ din? 9Nǔ énɛ́ lɛ́ɛ bǐ hɔn bú yɛ ɖɔhun, ɖi wɛn e è dǒ bɔ è wɔn tlóló é ɖɔhun. 10Mǐ cí tɔjíhún e nɔ́ xo tɔ e ɖo adǎn jí é zlɛ́ é ɖɔhun. È sɔ́ nɔ́ mɔ dǐndínwáyi xwi tɔn ǎ; akpá e ɖo wǔ tɔn é nɔ́ jó wuntun ɖé nyi sin nukún mɛ ǎ. 11Mǐ cí xɛ e ɖo zinzɔn gbɔn jɔhɔn mɛ wɛ é ɖɔhun; è nɔ mɔ zinzɔn tɔn sín xlɛ́ ɖě ǎ; é nɔ́ xo jɔhɔn kpó awa tɔn lɛ́ɛ kpó; é nɔ́ xo zlɛ́ kpó zǐngídi kpó, bó nɔ́ mɔ ali dó dín. Lo ɔ́, è sɔ́ nɔ́ wá mɔ dǐndínwáyi tɔn sín wuntun ɖěbǔ ǎ. 12Mǐ cí gǎ e è da dó nǔɖé é ɖɔhun, lobɔ jɔhɔn e é xo zlɛ́ é nɔ́ lɛ́ jɛ tɛn tɔn mɛ tlóló, bɔ è nɔ mɔ fí e gǎ ɔ́ gbɔn dín é ǎ. 13Lě e é ɖe gbɔn nú mǐ lɔ é nɛ́: din jɛ́n mǐ jɔ, bɔ azǎn ɖé jɛ ǎ, bɔ mǐ ká lɛ́ nyí fí gosín tɔ́. Mǐ jó ɖagbe ɖé nyi ayǐ ǎ, alǎnnúwiwa mǐtɔn wa nǔ dó mǐ wú.”
14Nǔgbó wɛ, nǔɖónukún mɛ e gbɛ́ wǎn nú Mawu lɛ́ɛ tɔn cí Sɛ́núnywɛ́ e jɔhɔn sɔ́ yi é ɖɔhun, ɖi aɖǐfún maɖózin e jɔhɔnsin ɖaxó kplɔ́ hɛn yi é ɖɔhun. É bú ɖi azizɔ e jɔhɔn zé yi é ɖɔhun; é nɔ́ dín ɖi lě e jǒnɔ gbe ɖokpó tɔn sín nǔ nɔ bú sín ayi mɛtɔn mɛ é ɖɔhun.
Aklúnɔ wɛ nyí ɖuɖéjítɔ́
15Nǔjlɔ́jlɔ́watɔ́ lɛ́ɛ nɔ́ nɔ gbɛ nú tɛgbɛ gbe. Mawu Ajalɔ̌nlɔn nɔ́ dó ajɔ yě, Ajalɔ̌nlɔn nɔ́ kpé nukún yě wú. 16Énɛ́ ɔ́ wú wɛ é ɖésú ná sɔ́ gǎngbákún ɖagbe ɖagbe ɖé sɔ́ xwe nú yě, é wɛ ná nyí xlɛ̌ susu e ɖo axɔ́súɖuto mɛ é tɔn. Nǔgbó ɔ́, Aklúnɔ ná sɔ́ gǎnhúnǔ lɔ tɔn cyɔ́n yě jí, bɔ awa tɔn lɛ́ɛ ná nyí gǎglónú nú yě. 17 Hlɔ̌nhlɔ́n Aklúnɔ tɔn ná nyí ahwanlyánnú, bɔ nǔɖíɖó tɔn lɛ́ɛ ná nyí ahwanfunnú e è nǎ dó gba kɛntɔ́ tɔn lɛ́ɛ dó é. 18É ná sɔ́ hwɛjijɔ dó ganwu ɖɔhun, bɔ hwɛjlɔ́jlɔ́ ɖiɖɔ ná nyí ahwanfuntɔ́gbákún ɖo ta n'i. 19Mǐmɛ́ nyínyí tɔn ná nyí gǎglónú e jí nǔɖé má nɔ́ ɖu ɖe ǎ é ɖo alɔ mɛ n'i. 20Xomɛsin tɔn e ma nɔ vɔ́ da ǎ é ná nyí dɛnkpe ɖíɖá ɖo alɔ tɔn mɛ, bɔ gbɛ ɔ́ bǐ kpódó é kpán ná wá yi tɔ́n ahwan mɛ e ma ɖó Sɛ́núnywɛ́ ǎ lɛ́ɛ é. 21Ɖi gǎ e è kpɔ́n tlítlí bó da é ɖɔhun ɔ́, so ná jɛ nǔ e è sɛ́ ɛ dó é. 22Kɛ́njí ná ja kpódó adǎn kpó hwǎn e è sɔ́ kannakanna dó da é ɖɔhun. Agbetɔ awoyó ná mlí kpódó zǐngídi kpán yi gba mɛ nyanya lɛ́ɛ, bɔ tɔsisa ná ɖi bó yi bú yě, ma kú nǔbláwǔ nú yě. 23Jɔhɔn baɖabaɖa ɖé ná nyi gba yě, lobo ná kplɔ́ yě axásáxásá jɔhɔn ɖaxó ɖé ɖɔhun.
Gbɔn mɔ̌ ɔ́, ayǐkúngban ɔ́ bǐ ná wá cí axéko jí ɖé ɖɔhun, ɖó nǔwanyido gbɛtɔ́ lɛ́ɛ tɔn wú. È nǎ flí acɛkpikpa axɔ́sú lɛ́ɛ tɔn xwe ɖó nǔ nyanya wiwa yětɔn lɛ́ɛ wú.
Currently Selected:
Sɛ́núnywɛ́ 5: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.