Sɛ́núnywɛ́ 4
4
1 È gbɔ bo gɔn vǐ ji bó wa ɖagbe ɔ́, é nyɔ́ hú. Mɛ e nɔ wa ɖagbe lɛ́ɛ nɔ́ jó flín e má ná bú gbeɖé ǎ é nyi ayǐ. Nǔgbó ɔ́, Mawu kpó gbɛtɔ́ lɛ́ɛ kpó nɔ́ mɔ ɖagbe yětɔn. 2Ɖo gbɛ hwenu yětɔn ɔ́, è nɔ xwedó nǔwiwa yětɔn lɛ́ɛ; nú yě má ká sɔ́ wá ɖě ǎ ɔ́, è nɔ jɛ do yětɔn. Ɖo gbɛ e ma nɔ vɔ gbeɖé ǎ é mɛ ɔ́, yě ná mɔ ɖuɖéjítɔ́ sín ajɔ yí. Yě ɖu ɖo ahwan e yě fun ɔ́ jí, bó ván kan bo yí ajɔ e nǔɖé má ná hɛn gblé gbeɖé ǎ é.
3Mɛ e nɔ xo Mawu nyi kɛ́n lɛ́ɛ sín vǐ lɛ́ɛ nɔ́ nɔ ali ɖé nu ǎ, yě ná bó sukpɔ́ ɔ́, ɖě nɔ́ hwɛ́n nǔ ɖo yě mɛ ǎ. Yě nɔ́ cí zuntín nyanya sín vǐ ɖɔhun. Ɖɔ yětɔn nɔ́ yi do ǎ, yě nɔ́ lí dǒ ǎ. 4Yě ná bó hɛn ala wǔ nú hwenu ɖé ɔ́, yě nɔ́ ɖó syɛ́nsyɛ́n ǎ. Jɔhɔn nɔ dán yě, bɔ jǐsin nɔ hɔn ɖɔ nú yě. 5Ala yětɔn yɔ̌yɔ́ lɛ́ɛ nɔ́ fɛ́n j'ayǐ mazin mazin cóbó nɔ́ wá nyɔ; sínsɛ́n yětɔn lɛ́ɛ nɔ́ ɖo xɛ́lú, bɔ è sixú ɖu ǎ; yě nɔ́ dó nǔɖé wa nú ǎ. 6Nǔgbó wɛ, ɖo hwɛɖɔzán gbe ɔ́, vǐ ɖěe è ji gbɔn kpɔ́jijɛ e ma xwedó Mawusɛ́n ǎ lɛ́ɛ gbla mɛ ɔ́, mɛjitɔ́ yětɔn lɛ́ɛ sín walɔ nyanya sín xlɛ́ wɛ yě nyí.
Mɛwínnyáwínnyá e nɔ́ wa nǔ ɖagbe lɛ́ɛ sín kú
7Mɛ e nɔ wa nǔ ɖagbe ɔ́, é ná bó kú ɖo wǐnnyáwínnyá mɛ ɔ́, é ná mɔ gbɔjɛ́. 8Mɛ e kpo nyɔ̌ɖaxó ɔ́, mɛ e è ɖǒ ná ɖó sísí ná é wɛ n'i; amɔ̌, xwe tɔn e sɛ yi é kpó gbɛjidɔ́ tɔn kpó wú wɛ ǎ. 9Nǔgbó wɛ, Sɛ́núnywɛ́ ɔ́ hɛn ɔ́, é ná nɔ hwa tɛnmɛ, bɔ gbɛ mímɛ́ blɔ̌máɖowǔ ɔ́ hɛn ɔ́, é ná yí tɛnmɛ ɖo gbɛjidɔ́ sí. 10 Bó ná dó ná xlɛ̌ ɔ́, dɔ̌nkpɛvú ɖé bló nǔ e nɔ́ nyɔ́ Mawu nukún mɛ ɔ́, Mawu nɔ yí wǎn n'i. É nɔ́ nɔ gbɛtɔ́ ahizinɔ e ma mɛ́ ǎ lɛ́ɛ mɛ, bɔ Mawu ɖe e sín gbɛ ɔ́ mɛ. 11É ɖe e sín fínɛ́ nú nǔ nyanya ma wa hɛn gbɛ tɔn gblé ó, bónú nǔvú lɛ́ɛ má wá dɔn ayi gblé n'i ó. 12Nǔgbó wɛ, nǔ nyanya nɔ dɔn gbɛtɔ́ lɛ́ɛ, bɔ yě sɔ́ nɔ́ mɔ nǔ ɖagbe ǎ. Jlǒ nyanya sín akpakpa nɔ dɔn ayi blú nú xomɛvɔ́nɔ. 13Dɔ̌nkpɛvú énɛ́ ɔ́ húzú mɛ ɖagbe ɖo hwenu kléwún ɖé mɛ, bɔ gbɛ tɔn gɔ́ nú nǔ ɖagbe, mɛ nɔ gbɛ gěgé ɖɔhun. 14-15Nǔ tɔn nyɔ́ Mawu nukún mɛ. Énɛ́ ɔ́ wú wɛ Mawu yá wǔ ɖe e sín gbɛ nyanya ɔ́ mɛ. Gbɛtɔ́ lɛ́ɛ nɔ́ mɔ nǔ énɛ́ ɔ́ ma tunwun. Mawu ɔ́ nɔ́ ɖe xomɛnyínyɔ́ tɔn kpó wǎn yíyí tɔn kpó xlɛ́ mɛ ɖěe é sɔ́ ɖó vo nú éɖée lɛ́ɛ, bó nɔ́ kpɔ́n mɛ e nyí étɔn lɛ́ɛ jí. Amɔ̌, ayi yětɔn nɔ́ wlí ǎ.
16Mɛwínnyáwínnyá e nɔ́ wa nǔ ɖagbe bó ká kú é ɔ́ nɔ́ dó hwɛ mɛ e kpo ɖo gbɛ ɔ́ mɛ, bó gbɛ́ wǎn nú Mawu, bó má nɔ́ ylɔ́ ɛ ɖɔ nǔɖé ǎ lɛ́ɛ. Dɔ̌nkpɛvú énɛ́ ɔ́ e byɔ́ gbɛ ɖagbe mɛ bléwún ɔ́ nɔ́ dó hwɛ mɛ e dɔ́ ji cí gbɛnyɔ́ná mɛ lɛ́ɛ. 17Gbɛtɔ́ lɛ́ɛ nɔ́ mɔ ɖɔ sɛ́núnywɛ́nɔ nɔ́ kú; amɔ̌, yě nɔ́ mɔ nǔ jɛ nǔ e Mawu jló nú yě ɔ́ wú ǎ, yě ká nɔ́ lɛ́ tunwun nǔ nyanya e mɛ è ɖe yě sín é ǎ. 18Yě nɔ́ mɔ nǔ énɛ́ ɔ́ bó nɔ́ ɖɔ lɔ̌ya wǔ tɔn, amɔ̌, yědɛɛ lɛ́ɛ wɛ Mawu ná wá ko. 19Ényí yě wá kú ɔ́, gbɛtɔ́ lɛ́ɛ ná sí agbaza yětɔn bó wlíbo ná ǎ. Ɖo kútomɛ ɔ́, winnyá wɛ ná vun blá yě ɖo tɛgbɛ gbe. Aklúnɔ ná ɖe yě sín tɛn e mɛ yě ɖe lɛ́ɛ é, bó ná fɔ yě nyi kɔ́ mɛ bɔ yě ná ɖɔ kpɛ́nkpɛ́n ǎ. Yě ná cɛ́ yě kplé, bó gbídí yě, bɔ yě ná ɖu aɖǔkún, bɔ mɛ ɖěbǔ sɔ́ ná flín yě ǎ.
Nǔnyanyawatɔ́ lɛ́ɛ sín vǐvɛ́ sise
20Mawu ná byɔ́ mɛ e nɔ wa nǔ nyanya lɛ́ɛ, bɔ yě ná ɖó hwɛ yětɔn lɛ́ɛ sín gbe n'i. Énɛ́ ɔ́, yě ná ɖo sísɔ́sísɔ́ wɛ, bó ná sɛkpɔ́ ɛ, bɔ nǔwanyido yětɔn lɛ́ɛ ná jlɔ́ ɖo nukɔn yětɔn bó ná ɖó hwɛ nú yě.
Currently Selected:
Sɛ́núnywɛ́ 4: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.