Sɛ́núnywɛ́ 1
1
SƐ́NÚNYWƐ́ KPÓ NǓ E ƉO TE NÚ GBƐTƆ́ LƐ́Ɛ É KPÓ
(1—5)
Wǎn yí nú nǔ e nyí nǔ ɖagbe é
1 Mi mɛ e kpa acɛ ɖo ayǐkúngban jí lɛ́ɛ, mi yí wǎn nú nǔ e nyí ɖagbe é. Mi lin nǔ jlɔ́jlɔ́ dó Mawu wú. Mi sɔ́ ayi e ɖo wɛn ɔ́ dó ba ɛ ná. 2Ɖó mɛ e ma nɔ dó xomɛsin n'i ǎ lɛ́ɛ wɛ é nɔ́ jó éɖée dó ná bɔ yě nɔ́ mɔ ɛ. É nɔ́ zé éɖée xlɛ́ mɛ e ma nɔ gbɛ́ nǔ ɖi n'i ǎ lɛ́ɛ. 3Linlin gɛ́dɛ́gɛ́dɛ́ wɛ nɔ́ ɖó gbɛtɔ́ zɔ nú Mawu. Bɔ xlonɔ lɛ́ɛ ká dó xomɛsin n'i ɔ́, nǔwúkpíkpé tɔn nɔ́ dó winnyá yě.
4Éeǒ, Sɛ́núnywɛ́ nɔ́ byɔ́ ayi e nɔ lin nǔ nyanya é mɛ ǎ. Nú hwɛ ɖu ɖo mɛɖé jí ɔ́, é nɔ́ nɔ gɔ̌n tɔn ǎ. 5Nǔgbó ɔ́, Yɛsinsɛn e nɔ kplɔ́n nǔ gbɛtɔ́ lɛ́ɛ nɔ́ hɔn nu nǔvú. É nɔ́ hɔn nú gbɛtɔ́ e ɖó xlonɔyi lɛ́ɛ. É nɔ́ ɖó wǔ zɔ nú mɛ e nɔ ɖó linlin nyanya lɛ́ɛ é. É nɔ́ gbɛ́ wǎn nú nǔnyanyawatɔ́.
6Sɛ́núnywɛ́ ɔ́, yɛ ɖé wɛ é nyí, bó nɔ́ yí wǎn nú gbɛtɔ́ lɛ́ɛ; amɔ̌, é nɔ́ jó mɛ e nɔ zun Mawu gbɔn xóɖiɖɔ tɔn gbla mɛ ɔ́ dó ma dɔn tó n'i ǎ. Nǔgbó ɔ́, Mawu nɔ́ mɔ nǔ káká yi jɛ gbɛtɔ́ sín ayi gɔngɔn mɛ. É nɔ́ tunwun nǔ e é nɔ́ lin é bǐ, bó nɔ́ se nǔ e é nɔ́ ɖɔ lɛ́ɛ bǐ ganjí. 7Nǔgbó wɛ, yɛ Mawu tɔn ɔ́ gɔ́ gbɛ ɔ́ bǐ sésé. É nɔ́ dɔn nǔ e é ɖó lɛ́ɛ bǐ ɖó bǔ; é nɔ́ tunwun xógbe ɖokpó ɖokpó e nɔ́ tɔ́n sín mɛ nu mɛ é. 8Ényí mɛɖé ɖɔ xó nyanya ɖé ɔ́, é ná nɔ́ ɖe mɛ ɔ́ gba tɛgbɛ, bɔ mɛ énɛ́ ɔ́ ná sixú gló hwɛɖɔtɔ́ e nɔ dɔn tó nú mɛ kpó hwɛjijɔ kpó ɔ́ ǎ. 9Mawu ná zɔ́n bɔ è nǎ ba do nú tito mɛ e nɔ gbɛ́ wǎn n'i lɛ́ɛ tɔn. Xó e yě nɔ́ ɖɔ lɛ́ɛ ná hun káká yi Aklúnɔ gɔ́n nú é ná dɔn hwɛ yětɔn lɛ́ɛ sín tó nú yě. 10Nǔgbó ɔ́, tó tɔn e ɖo jɛ lɛ́ɛ nɔ́ se nǔ bǐ, káká jɛ mɛnúɖiɖɔ wínníwínní lɛ́ɛ bǐ jí. 11Hǔn, mi bo jó mɛnúɖiɖɔ majɛtó e ma hwɛ́n nǔɖé ǎ lɛ́ɛ dó, bó nɔ́ ɖu ɖo ɖɛ̌ mitɔn jí, bó má nɔ́ ɖɔ nyanya mɛ ɖě lɛ́ɛ tɔn ó. Xó e è ɖɔ ɖo kpá é nɔ́ wá gɔn gbigba ǎ. Adingbanɖótɔ́ sín nukikɛ ɔ́ kú wɛ é nɔ́ dɔn wá nú adingbannɔ.
12Mi ma nɔ ba kú nú miɖée lɛ́ɛ gbɔn gbɛ ɖé ján zínzán gbla mɛ ó. Mi ma vɔ miɖée lɛ́ɛ gbɔn nǔwiwa mi ɖésú lɛ́ɛ tɔn gbla mɛ ó. 13 Éeǒ, Mawu ɔ́ ɖó kú ǎ; mɛ e ɖo gbɛ lɛ́ɛ sín fí gosín ɔ́ nɔ́ jló e ǎ. 14É ɖo nǔɖíɖó lɛ́ɛ bǐ nu; yě ná nɔ gbɛ tɛgbɛ wú wɛ. Nǔ e ko ɖo gbɛ ɔ́ mɛ lɛ́ɛ bǐ ná hɛn gbɛ wá. Ɖo nǔ e é bló ɔ́ mɛ ɔ́, aɖǐ e ná dɔn kú wá ɔ́ ɖ'é mɛ ǎ. Kú ɔ́ ɖu ɖo ayǐkúngban ɔ́ jí ǎ, 15ɖó nǔ e nyí hwɛjijɔnú é ɖě nɔ́ kú ǎ.
Mɛ e gbɛ́ wǎn nú Mawu lɛ́ɛ nɔ́ lin nǔ nyanya
16 Mɛ e nɔ gbɛ́ wǎn nú Mawu lɛ́ɛ é nɔ́ ylɔ́ kú dó yěɖée jí gbɔn nǔwiwa yětɔn lɛ́ɛ kpó xóɖiɖɔ yětɔn kpó gbla mɛ. Yě nɔ́ vɛ́ dó sín ɖɔ kú ɔ́, xɔ́ntɔn émítɔn wɛ é nyí sín, yě nɔ́ ɖo biba ɛ wɛ magbokɔ, bó nɔ́ jɛ akɔ xá ɛ. Nǔgbó wɛ, yě ká jɛ xá kú ɔ́ sín mɛ nyínyí nǔgbó.
Currently Selected:
Sɛ́núnywɛ́ 1: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.