Tobíi 6
6
Hweví ɖaxó ɖokpó
1Dɔ̌nkpɛvú ɔ́ jɛ ali kpó wɛnsagun ɔ́ kpó. Cukú xwé ɔ́ gbe tɔn lɔ xwedó yě. Gbadanu nukɔntɔn ɔ́, yě jɛ agban nyi tɔ e è nɔ ylɔ́ ɖɔ Tígli é tó. 2Tobiyási byɔ́ tɔ ɔ́ mɛ bó ná yi klɔ́ afɔ, lo ɔ́, hweví ɖaxó ɖokpó lɔ́n sín sin ɔ́ mɛ, bó jló ná vún afɔ tɔn ɖokpó.
Tobiyási jɛ xó sú jí. 3Bɔ wɛnsagun ɔ́ ɖɔ n'i ɖɔ: “Wlǐ i, bó má jó e dó ó.” Tobiyási kpé wú bó wlí hweví ɔ́, bó dɔn ɛ wá agě jí. 4Wɛnsagun ɔ́ ɖɔ n'i ɖɔ: “Kɛ xo tɔn mɛ, bó ɖe vǐvɛ́ ɔ́, hǔn tɔn kpó alǐn tɔn kpó; bɛ̌ yě ɖó kɛ́n ɖokpó, bó bɛ́ adɔví lɛ́ɛ kɔn nyi gbě. Nǔgbó ɔ́, vǐvɛ́ ɔ́, hǔn ɔ́ kpó alǐn ɔ́ kpó ɔ́, azɔngblénú wɛ bɔ è nǎ zán.” 5Dɔ̌nkpɛvú ɔ́ kɛ hweví ɔ́, bó ɖe vǐvɛ́ ɔ́, hǔn ɔ́ kpó alǐn ɔ́ kpó. É kán hweví ɔ́ sín lan kpɛɖé bó mɛ ɖu, bó dó jɛ e kpo é, nú é ná dó nɔ ayǐ.
6Énɛ́ gúdo ɔ́, Tobiyási kpó wɛnsagun ɔ́ kpó lɛ́ mlɛ́ ali ɖidó káká wá yi jɛ Mɛdi sín dogbó ɔ́ jí. 7Nyaví ɔ́ kanbyɔ́ wɛnsagun ɔ́ ɖɔ: “Nɔví ce Azaliya, nɛ̌ hweví sín hǔn, alǐn tɔn kpó vǐvɛ́ tɔn kpó ká sixú gbɔ azɔn gbɔn?” 8Wɛnsagun ɔ́ yí gbe n'i ɖɔ: “Nú yɛ nyanya ɖé zɔn súnnu ɖé abǐ nyɔ̌nu ɖé jí ɔ́, è nɔ fyɔ́ hweví ɔ́ sín hǔn kpó alǐn tɔn kpó ɖo myɔ mɛ, ɖo mɛ énɛ́ nukɔn. Azɔ e nɔ tɔ́n sín mɛ ɔ́ nɔ́ nya yɛ nyanya ɔ́ tlóló, bɔ azɔn mɛ ɔ́ tɔn nɔ́ gbɔ nú tɛgbɛ gbe. 9Ényí wuntun wěwé ɖo nukún jí nú mɛɖé ɔ́, è nɔ gbídí vǐvɛ́ tɔn dó nukún lɛ́ɛ jí, bɔ nukún zɔn ɔ́ nɔ́ gbɔ.”
Hlafayɛ́li kplɔ́n nǔ Tobiyási ɖɔ é ní da Sala
10Hlafayɛ́li kpó Tobiyási kpó wá Mɛdi. Ée yě jɛ Ɛkibatáni sɛ yá jí ɔ́, 11Hlafayɛ́li ɖɔ nú Tobiyási ɖɔ: “Tobiyási nɔví ce.” Tobiyási yí gbe n'i ɖɔ: “Étɛ́ wɛ?” Wɛnsagun ɔ́ lɛ́ ɖɔ: “Zǎn élɔ́ mɛ ɔ́, Hlagwɛ́li hɛ̌nnumɔ towe ɔ́ xwé wɛ mǐ ná jɛ adɔ̌ ɖó. É ɖó vǐ nyɔ̌nu ɖokpó bɔ é nyí Sala. 12É sɔ́ ɖó vǐ súnnu kpó nyɔ̌nu kpó ɖě zɛ éyɛ́ wú ǎ. Hwi wɛ nyí hɛ̌nnumɔ Sala tɔn hú mɛ bǐ, bó hɛn ɔ́, a nǎ da ɛ, bó ɖu tɔ́ tɔn sín gǔ. Ɖyɔ̌vǐ nǔnywɛ́tɔ́ ɖé wɛ, bó kpan akɔ́n, bó ká nyɔ́ ɖɛkpɛ ɖésú. Tɔ́ tɔn ɔ́, súnnu e è nǎ ɖó sísí ná é wɛ. 13Hwi wɛ ɖó ná da ɛ. Ɖǒ tó mì nɔví. Un ná ɖɔ ɖyɔ̌vǐ ɔ́ xó nú tɔ́ tɔn gbadanu din, bónú é ná yí gbe bo sɔ́ ɛ ɖó te nú we, bɔ hwenu e mǐ ná lɛ́ kɔ sín Hlagwɛ́li ɔ́, mǐ ná kplá asi. Un ɖeji ɖɔ Hlagɛ́si kún sixú tɛ ɛ we ó, é kún ká sɔ́ lɛ́ sixú sɔ́ ɛ ná mɛ ɖěvo ó. Ényí é bló mɔ̌ ɔ́, lě e Mɔyízi sɛ́n ɔ́ zɔ́n gbɔn ɔ́, è nǎ ɖó kúhwɛ n'i; nǔgbó ɔ́, é ɖésú tunwun ɖɔ ɖo sɛ́n énɛ́ xwi jí ɔ́, hwi jɛ́n jɛ nukɔn nú mɛ bǐ bó hɛn ɔ́, a nǎ da vǐ émítɔn; hǔn, bo ɖótó mì nɔví ce: gbadanu din ɔ́, nyi kpó Hlagɛ́si kpó ná ɖɔ xó dó ɖyɔ̌vǐ ɔ́ wú, bɔ un ná byɔ́ ɛ nú we ɖo tɔ́ tɔn sí. Nú mǐ lɛ́ kɔ sín Hlagwɛ́li ɔ́, mǐ nǎ kplá ɛ hɛn yi xwé towe gbe.” 14Tobiyási ɖɔ nú Hlafayɛ́li ɖɔ: “Azaliya nɔví ce, nǔ e è ɖɔ nú mì é ɖíe: è ko sɔ́ Sala ná asú azɔn tɛ́nwe, bɔ asú tɛ́nwe lɛ́ɛ bǐ wɛ kú jɛ asikplákplá sín xɔ ɔ́ mɛ. Zǎn mɛ hwenu e yě nɔ́ jló ná sɛkpɔ́ ɛ ɔ́, yě nɔ́ kú. È tlɛ ɖɔ nú mì ɖɔ yɛ nyanya ɖé wɛ nɔ́ hu yě. 15Énɛ́ wɛ zɔ́n bɔ xɛsi ɖo ɖiɖi mì wɛ. Yɛ nyanya ɔ́ nɔ́ wa nǔ ɖěbǔ nú ɖyɔ̌vǐ énɛ́ ǎ, lo ɔ́, é nɔ́ hu súnnu e nɔ́ jló ná sɛkpɔ́ ɛ lɛ́ɛ é bǐ. Vǐ ɖokpónɔ wɛ nú mì; nú un wá yi kú ɔ́, tɔ́ ce kpó nɔ ce kpó ná mɔ wǔvɛ́ káká bó kú ɖó nyɛ wú; yě ká sɔ́ ɖó vǐ ɖé bɔ é ná ɖi yě ǎ.”
16Hlafayɛ́li ɖɔ n'i ɖɔ: “A ka wɔn nǔ e tɔ́ towe ɖɔ nú we é wɛ a? É ɖe gbe nú we ɖɔ hwi ní da asi ɖo hɛ̌nnu émí ɖésúnɔ tɔn mɛ. Hǔn, bo ɖótó mì, xɔ́ntɔn ce; ma nú ado hu we dó awǒvi énɛ́ xó wú ɖěbǔ ó; da Sala. Un ɖeji ɖɔ è nǎ sɔ́ ɛ jó nú we din gbadanu élɔ́. 17Hwenu e a byɔ́ asisúnɔ xɔ ɔ́ mɛ ɔ́, sɔ́ hweví ɔ́ sín hǔn, bó kán alǐn tɔn kpɛɖé; bɛ̌ yě ɖó myɔkán jí fí e è nɔ fyɔ́ célu ɖe é, bɔ wǎn tɔn ná gba kpé; yɛ nyanya ɔ́ gbɔ́n wǎn énɛ́ dó awɔntín mɛ ɔ́, é ná hɔn tɔ́n; é sɔ́ ná ɖe éɖée xlɛ́ gbeɖé ɖo akpá tɔn ǎ. 18Cóbónú mi ná jɛ kpɔ́ ɔ́, mi mɛ we lɛ́ɛ bǐ ní sí te bó xo ɖɛ sɛ́ dó Aklúnɔ e ɖó jǐxwé é; mi byɔ́ ɛ ɖɔ é ní kú nǔbláwǔ nú émí, bó cyɔ́n alɔ émí jí. Ma ɖi xɛsi ó, sín tɛgbɛ ɖokpóó wɛ é kó sɔ́ Sala ɖó te nú we; hwi wɛ ná hwlɛ́n ɛ gán. É kpó hwi kpó ná yi, bɔ un ɖeji ɖɔ é ná ɖó vǐ nú we; yě ná cí nɔví ɖɔhun nú we. Hǔn ado ma hu we ó!” 19Mɔ̌ wɛ Tobiyási ɖo sise wɛ gbɔn ɖo Hlafayɛ́li nu ɖɔ Sala ɔ́, hɛ̌nnumɔ émítɔn wɛ, bó tɔ́n sín tɔ́ tɔn sín akɔta mɛ. Bɔ Tobiyási jɛ wǎn yí n'i jí kpódó ayi tɔn bǐ kpán, bó sɔ́ sixú ɖe éɖée sín wǔ tɔn ǎ.
Currently Selected:
Tobíi 6: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.