Tobíi 5
5
Tobiyási ɖidó Mɛdi
1Tobiyási yí gbe nú tɔ́ tɔn Tobíi ɖɔ: “Daá, un ná wa nǔ e a zɔ̌n mì é bǐ. 2Lo ɔ́, nɛ̌ un ná sixú mɔ akwɛ́ énɛ́ ɔ́ yí gbɔn, ɖó Gabayɛ́li tunwun mì ǎ, nyi lɔ ka tunwun i ǎ. Nɛ̌ un ka ná dó nyiɖée gesí n'i gbɔn bɔ é ná ɖi nǔ nú mì bó ná sɔ́ akwɛ́ ɔ́ nú mì? Hwɛ̌ lɔ ɔ́, un tunwun ali e yi Mɛdi é ǎ.” 3Tobíi yí gbe nú vǐ tɔn ɖɔ: “Gabayɛ́li kpó nyi kpó ɔ́, mǐ dó alɔ wěma ɖé mɛ. Un ka má wěma ɔ́ ɖó we, bɔ mǐ mɛ ɖokpó ɖokpó hɛn mǎɖówe tɔn; un sɔ́ éyɛ́ tɔn kpó akwɛ́ ɔ́ kpó ɖó kpɔ́. Akwɛ́ ɔ́ ɖo gɔ̌n tɔn sín xwe ko ɖíe. Din ɔ́, vǐ ce, ba mɛ e ɖó jiɖiɖe é ɖokpó, bónú é kplá we hɛn yi Mɛdi. Mi ma sú axɔ́ ɛ káká jɛ hwenu e a nǎ lɛ́ kɔ wá é ó. Hǔn, yi bo yi yí akwɛ́ énɛ́ ɖo Gabayɛ́li sí.”
4 Tobiyási tɔ́n sín tɔ́ tɔn xwé; é ba alixlɛ́mɛtɔ́ e tunwun ali e yi Mɛdi ganjí é ɖokpó. É kpé wɛnsagun Hlafayɛ́li ɖo kɔ́xo, bɔ é ɖo te ɖo nukɔn tɔn; é ká tunwun ɖɔ Mawu wɛnsagun wɛ ǎ. 5Tobiyási ɖɔ n'i ɖɔ: “Fítɛ́ a ka gosín xɔ́ntɔn ce?” Wɛnsagun ɔ́ yí gbe ɖɔ: “Nɔví towe Izlayɛ́linu lɛ́ɛ ɖokpó wɛ nú mì; azɔ̌ ba gbé wɛ un tɔ́n bó wá fí.” Tobiyási kanbyɔ́ ɛ ɖɔ: “A ka tunwun ali e yi Mɛdi é a?” 6Hlafayɛ́li yí gbe n'i ɖɔ: “Ɛɛn, un tunwun ali lɛ́ɛ bǐ dó tamɛ, ɖó hwɛhwɛ wɛ un nɔ yi dɔ̌n, bó tunwun ali lɛ́ɛ bǐ ganjí. Ényí un yi Mɛdi ɔ́, nɔví mǐtɔn Gabayɛ́li e nɔ nɔ Hlagɛ́si é xwé wɛ un nɔ yi jɛ. Azǎn we sín zɔnlin ɖiɖi wɛ to énɛ́ ɖó dó Ɛkibatáni; sókan mɛ wɛ to lɛ́ɛ bǐ ɖe.” 7Ée é ɖɔ mɔ̌ ɔ́, Tobiyási ɖɔ n'i ɖɔ: “Nɔ te kpɔ́n mì ɖo fí xɔ́ntɔn ce, nú má yi gba kpá nú tɔ́ ce; un ba ɖɔ a nǐ kplá mì yi to mɛ bɔ un ná sú axɔ́ tɔn we.” 8Wɛnsagun ɔ́ yí gbe ɖɔ: “Un ná nɔ te kpɔ́n we, lo ɔ́, ka hwlɛ́n dó!”
9Tobiyási byɔ́ xwé gbe, bó gba kpá nú tɔ́ tɔn, bó ɖɔ n'i ɖɔ: “Un mɔ mɛ ɖokpó; nɔví mǐtɔn Izlayɛ́linu lɛ́ɛ ɖě wɛ.” Tobíi yí gbe n'i ɖɔ: “Kplá ɛ wá fí vǐ ce. Un jló ná tunwun hɛ̌nnu e mɛ é gosín é, akɔta e mɛ nu wɛ é, bó ná kpɔ́n ɖɔ è sixú gán jɛ wǔ tɔn nú é ní kplá we yi a jí.” 10Tobiyási tɔ́n, bó yi ylɔ́ Hlafayɛ́li, bó ɖɔ n'i ɖɔ: “Tɔ́ ce ɖo biba ná mɔ we wɛ xɔ́ntɔn ce.”
Wɛnsagun ɔ́ byɔ́ xɔ ɔ́ mɛ, bɔ Tobíi dó gbe n'i jɛ nukɔn, bɔ wɛnsagun ɔ́ yí gbe n'i ɖɔ: “Un xo nyɔ̌ná gěgé ɖɛ nú we.” Lo ɔ́, Tobíi yí gbe ní ɖɔ: “Nyɔ̌ná tɛ́ un ka sɔ́ sixú ɖó nukún din? Nyi ɖíe tɔ́n nukún bǐ e. Un sɔ́ nɔ́ mɔ wěziza hwesivɔ́ tɔn ǎ; zǐnflú mɛ wɛ un ɖe; un cí mɛkúkú e má sɔ́ sixú mɔ wěziza kéze tɔn ǎ lɛ́ɛ ɖɔhun. Un kpo ɖo gbɛ cóbó ká kó ɖo nyiɖée mɔ wɛ ɖo mɛkúkú lɛ́ɛ mɛ. Un nɔ se mɛ lɛ́ɛ nɔ́ ɖo xó ɖɔ wɛ, lo ɔ́, un ka nɔ mɔ yě ǎ.” Wɛnsagun ɔ́ ɖɔ n'i ɖɔ: “Kpan akɔ́n, malín málín mɛ din ɔ́, Mawu ná gbɔ azɔn nú we.” Tobíi yí gbe n'i ɖɔ: “Vǐ ce Tobiyási ɖó ná yi Mɛdi. A hɛn ɔ́, a nǎ nɔ gǔdo tɔn bó ná kplá ɛ hɛn yi a? Nɔví ce, nǎ sú azɔ̌kwɛ́ we.” Wɛnsagun ɔ́ yí gbe ɖɔ: “Un hɛn ɔ́, un ná kplá ɛ hɛn yi. Un tunwun ali e yi Mɛdi lɛ́ɛ é bǐ, ɖó azɔn mɔ̌kpán nɛ́ un ko yi dɔ̌n nɛ́. Fí ɖé nyí jǒnɔ nú mì ɖo dɔ̌n ǎ: ayǐkúngban wɛnjɛ jí wɛ a, sókan mɛ wɛ a, fí bǐ wɛ un gbɔn ɖo to énɛ́ mɛ, bó tunwun ali e ɖo to ɔ́ wú lɛ́ɛ bǐ.”
11Tobíi kanbyɔ́ ɖɔ: “Nɔví ce, hɛ̌n tɛ́ nu a gosín? Akɔhɛ́nnu tɛ́ mɛ wɛ a ka tɔ́n sín? Ɖɔ nú mì.” 12Wɛnsagun ɔ́ ɖɔ: “Akɔhɛ́nnu ce wɛ nyí nǔ e ɖo tají é ǎ!” Tobíi ɖɔ n'i ɖɔ: “Xó nǔgbó ba ná tunwun wɛ un ɖe. Mɛ̌ ví wɛ ká nú we? Nɛ̌ a ka nɔ nyí?” 13Wɛnsagun Hlafayɛ́li yí gbe n'i ɖɔ: “Un nɔ nyí Azaliya; Ananiyasi Ɖaxó ɔ́ éé nyí Izlayɛ́linu hwi ɖɔhun é ví wɛ nú mì.” 14Tobíi ɖɔ n'i ɖɔ: “Doo nú we nɔví ce! Ma sin xomɛ dó mì ó; un jló ná mɔ nǔ jɛ hɛ̌nnu e mɛ a gosín é wú kpowun wɛ. Nɔví ce tawun tawun wɛ nú we, bɔ tɔ́gbó tɔgbo towe lɛ́ɛ nyí mɛ bɔ sísí jɛ xá. Un tunwun Ananiyasi kpó Natáan kpó, kpódó Semɛliyasi ɖaxó ɔ́ sín vǐ lɛ́ɛ kpán céɖécéɖé. Ɖ'ayǐ xóxó ɔ́, mǐ nɔ́ zɔn kpɔ́ yi Jeluzalɛ́mu, bó nɔ́ yi sɛn Mawu. Yě zɛ sín ali jlɔ́jlɔ́ ɔ́ jí ǎ. Gbɛtɔ́ jɔ gbɛtɔ́ wɛ nyí tɔ́ towe kpódó tɔ́ towe nɔví kpán; hɛ̌nnu ɖagbe mɛ wɛ a jɔ ɖe. Hǔn, doo nú we.” 15Bɔ Tobíi ɖɔ d'é jí ɖɔ: “Azɔ̌kwɛ́ e sɔgbe é wɛ un ná sú we, gankwɛ́ ɖokpó gbe ɖokpó; nú akwɛ́zínzán ɖě lɛ́ɛ ɔ́, nǔ e un ná ná vǐ ce é wɛ un ná ná hwi lɔmɔ̌. 16 Ényí mi lɛ́ kɔ wá ɔ́, un ná lɛ́ ba nǔɖé gɔ́ ná.” 17Wɛnsagun ɔ́ ɖɔ n'i ɖɔ: “É nyɔ́, nyi kpó vǐ towe kpó ná zɔn yi to ɔ́ mɛ; ma ɖi xɛsi ó; mǐ ná yi ɖagbe, bó ná lɛ́ kɔ ɖagbe, ɖó ali ɔ́ ɖó adohu ɖěbǔ ǎ.” Tobíi ka ɖɔ: “Mawu ní xo ɖɛ dó jǐ we nɔví ce.”
Énɛ́ gúdo ɔ́, é ylɔ́ vǐ tɔn bó ɖɔ n'i ɖɔ: “Vǐ ce, sɛ tomɛyinú lɛ́ɛ xwe, bó jɛ ali xá nɔví towe Azaliya. Mawu e ɖo jǐxwé é ní cyɔ́n alɔ mi jí ɖo dɔ̌n, bó lɛ́ kplá mi wá nú mì wǔyɛ́yɛ́ afɔyɛ́yɛ́! Wɛnsagun tɔn ní zɔn ali xá mi, bó cyɔ́n alɔ mi jí vǐ ce!”
Tobiyási dó agban tɔn lɛ́ɛ, bó kplá así kɔ nú tɔ́ tɔn kpó nɔ tɔn kpán; tɔ́ tɔn lɛ́ xo ɖɛ n'i ɖɔ ali ná nyɔ́. 18Tobiyási sín nɔ jɛ avǐ ya jí, bó ɖɔ nú Tobíi ɖɔ: “Étɛ́wú a ka ɖɔ bɔ vǐ ce ɖidó? É wɛ nyí gǎnjɛwú mǐtɔn hwenu e é ɖo kpɔ́ xá mǐ ɖo fí é. 19Étɛ́wú akwɛ́ ká ná myá nukún nú we sɔ mɔ̌? È sixú sɔ́ vǐ mǐtɔn sín gbɛ jlɛ́ dó akwɛ́ wú ǎ. 20Nǔ e Mawu ná mǐ nú mǐ ná dó nɔ gbɛ ná ɔ́ kó kpé!” 21Tobíi ɖɔ nú asi tɔn ɖɔ: “Ma sɔ́ énɛ́ dó lin nǔ kpɔ́n ó, nǔ bǐ ná yi lyɛ̌ngbe lyɛ̌ngbe. Vǐ mǐtɔn ná lɛ́ kɔ wá ɖagbe lě e é zɔn bó yi é. Hwi ɖésú ná sɔ́ nukún towe dó mɔ ná hwenu e é ná lɛ́ kɔ wá gɔ̌n towe é. 22Hǔn ado ní bó má hu we ó. Ma nú xɛsi sɔ́ ɖi we ɖó yě wú ó, nɔví nyɔ̌nu ce. Wɛnsagun ɖagbe ɖokpó ná kplá ɛ hɛn yi; é ná yi to ɔ́ mɛ ganjí, bó ná lɛ́ lɛ́ kɔ wá wǔyɛ́yɛ́ afɔyɛ́yɛ́.” 23Énɛ́ ɔ́, Tobíi sín asi xwɛ, bó jó avǐ dó.
Currently Selected:
Tobíi 5: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.