Tobíi 7
7
Hlagwɛ́li sɔ́ vǐ tɔn nyɔ̌nu ɔ́ da nú Tobiyási
1Hwenu e yě wá Ɛkibatáni ɔ́, Tobiyási ɖɔ nú wɛnsagun ɔ́ ɖɔ: “Azaliya nɔví ce, kplá mì tlɔlɔ sɔ́ yi nɔví mǐtɔn Hlagwɛ́li gɔ́n.” Wɛnsagun ɔ́ kplá ɛ yi Hlagwɛ́li xwé. Éyɛ́ jínjɔ́n ayǐ ɖo kɔ́xo ta ɖo hɔn tɔn nukɔn. Tobiyási kpó wɛnsagun ɔ́ kpó dó gbe e jɛ nukɔn. Hlagwɛ́li yí gbe nú yě ɖɔ: “Un yí gbe nú mi nɔví ce lɛ́ɛ; un ɖi ɖɔ mi ɖo ganjí!” Bɔ é kplá yě byɔ́ xwé tɔn gbe. 2É ɖɔ nú asi tɔn Ɛdina ɖɔ: “Dɔ̌nkpɛvú élɔ́ ɖi hɛ̌nnumɔ ce Tobíi tawun!” 3Ɛdina kanbyɔ́ yě ɖɔ: “Fítɛ́ mi ka gosín nɔví ce lɛ́ɛ mi?” Yě yí gbe ɖɔ: “Sín Ninívu; mǐ mɛ Izlayɛ́li ví e tɔ́n sín akɔta Nɛfutalíi tɔn mɛ, bɔ è tún to ná gǎnnugǎnnu é wɛ.” 4É kanbyɔ́ yě ɖɔ: “Mi tunwun Tobíi e gosín hɛ̌n mǐtɔn nu é a?” Yě yí gbe ɖɔ: “Ɛɛn mǐ tunwun i.” 5É ɖɔ nú yě ɖɔ: “Nɛ̌ é ká ɖe gbɔn?” Yě yí gbe n'i ɖɔ: “É kpo ɖo gbɛ bo ɖo ganjí.” Bɔ Tobiyási lɛ́ ɖɔ d'é jí ɖɔ: “Tɔ́ ce wɛ.”
6Bɔ Hlagwɛ́li sí te azɔn ɖokpó, bó yi kplá así kɔ n'i kpó avǐ kpó. Bɔ é ɖɔ n'i ɖɔ: “Mawu ní xo ɖɛ nú we vǐ ce!” Tɔ́ ɖagbe wɛ a ɖǒ; gbɛtɔ́ hwɛjijɔnɔ wɛ, bó nɔ́ má nǔ tɔn lɛ́ɛ. Awěxomɛ tɛ́ ká xo wamamɔnɔ lɛ́ɛ nɛ́? Nɛ̌ hwɛjijɔnɔ, ɖagbewatɔ́ mɔ̌hun tɔn ná húzú nukúntíntɔ́nnɔ gbɔn? Hlagwɛ́li lɛ́ kplá así kɔ nú Tobiyási bó lɛ́ wlí avǐ. 7 Ɛdina asi tɔn ɔ́ kpó vǐ nyɔ̌nu tɔn Sala ɔ́ kpó flín Tobíi, bɔ yě lɔ jɛ avǐ ya jí. 8Énɛ́ gúdo ɔ́, Hlagwɛ́li zɔ́n bɔ è sɔ́ gbɔ̌ ɖokpó ɖo wutó tɔn mɛ bó hu, bɔ è yǐ mɛ e wá gɔ̌n tɔn lɛ́ɛ sín jǒnɔ ganjí.
9Ée yě lɛ wǔ bó slá wǔ é ɔ́, yě yi távo jí, bɔ Tobiyási ɖɔ nú Hlafayɛ́li ɖɔ: “Azaliya nɔví ce, byɔ̌ ɖo Hlagwɛ́li sí ɖɔ é ní ná Sala nɔví ce mì nú má da.” 10Hlagwɛ́li se xó énɛ́ ɔ́, bó ɖɔ nú dɔ̌nkpɛvú ɔ́ ɖɔ: “To ɖu nǔ, bó nu sin din hwɛ̌ nú gbadanu ní nyɔ́ nú we. Mɛ ɖé sɔ́ ɖó acɛ bo ná da vǐ nyɔ̌nu ce Sala zɛ hwi nɔví ce ɔ́ wú ǎ. Un sixú wa jlǒ ce bó sɔ́ ɛ jó nú mɛ ɖěvo ǎ, towe wɛ, ɖó hwi wɛ nyí hɛ̌nnumɔ ce e sɛkpɔ́ mì hú mɛ bǐ é. Lo ɔ́, un ná ɖɔ xó ɔ́ bǐ nú we. 11Nɔví mǐtɔn Izlayɛ́linu tɛ́nwe wɛ un ko sɔ́ ɛ da ná, ɖě bɔdó ɖě wú, bɔ nú yě mɛ ɖěbǔ kplá ɛ yi xɔ azɔn nukɔntɔn ɔ́, yě nɔ́ kú. É ná bó ka nyí gbɔn ɖěbǔ hǔn vǐ ce, ɖu nǔ bó nu sin. Aklúnɔ ɔ́ ná ɖe xomɛnyínyɔ́ tɔn xlɛ́ mi.” 12Tobiyási ka yí gbe ɖɔ: “Éeǒ, un ja nǔ ɖu gbé ǎ, un ka lɛ́ ja sin nu gbé káká jɛ hwenu e a nǎ ɖe gbeta ɖé tɔ́n dó Sala wǔ é ǎ.” Bɔ Hlagwɛ́li yí gbe ɖɔ: “É nyɔ́; un ná bló lě e a ɖɔ gbɔn é. Ɖo Mɔyízisɛ́n ɔ́ xwi jí ɔ́, Sala ɔ́, towe wɛ; yǐ i bó sɔ́ ɛ dó ɖó asi ná. Hǔn, Mawu wɛ sɔ́ ɛ ná we. Bɛ́ sín din ɔ́, a nyǐ asú tɔn, bɔ é nyí asi towe. É nyí towe bɛ́ sín égbé káká sɔ́yi. Zǎn ɔ́ ná nyɔ́ nú mi, bɔ Aklúnɔ e ɖó jǐxwé é ná cyɔ́n alɔ mi jí. Ní ɖe xomɛnyínyɔ́ tɔn xlɛ́ mi, bó hɛn mi ɖó fífá mɛ.”
13Énɛ́ gúdo ɔ́, Hlagwɛ́li ylɔ́ vǐ nyɔ̌nu tɔn Sala. Hwenu e é wá ɔ́, é sɔ́ alɔ tɔn dó Tobiyási tɔn mɛ bó ɖɔ: “Yǐ i dó ɖó asi ná ɖi lě e Mɔyízisɛ́n ɔ́ zɔ́n gbɔn é! Kplá ɛ hɛn yi tɔ́ towe xwé. Mawu sɛ́xwé tɔn ní kplá mi hɛn yi, bó hun nyɔ̌ná li nú mi!” 14Hlagwɛ́li ylɔ́ Sala sín nɔ, bó ɖɔ n'i ɖɔ: “Yi sɔ́ nǔwlánnú ɖé wá. Lě e è wlǎn vǐnású wěma ɔ́ gbɔn é ɖíe” Hlagwɛ́li sɔ́ vǐ nyɔ̌nu tɔn Sala da nú Tobiyási lě e Mɔyízisɛ́n ɔ́ zɔ́n gbɔn é. Énɛ́ gúdo ɔ́, yě jɛ nǔ ɖu jí bó jɛ ahan nu jí.
Asikplákplá sín xɔ yiyi
15Hlagwɛ́li ylɔ́ asi tɔn Ɛdina; é ɖɔ n'i ɖɔ: “Nɔví nyɔ̌nu ce, yi bló xɔ ɖě ɔ́ mɛ ɖó nú Sala, bó kplá ɛ yi fínɛ́.” 16Ɛdina yi bló akánma ɔ́ ɖó ɖo xɔ ɔ́ mɛ lě e asú tɔn zɔ́n gbɔn é. É kplá vǐ nyɔ̌nu tɔn byɔ́ xɔ ɔ́ mɛ, bó jɛ linlin i kpɔ́n jí bó bɛ́ avǐ. É súnsún ɖasin tɔn lɛ́ɛ, bó ɖɔ n'i ɖɔ: 17“Kpan akɔ́n vǐ ce; Aklúnɔ e ɖó jǐxwé é sɔ́ nǔxámɛ towe lɛ́ɛ bǐ dó húzú awǎjijɛ nú we. Kpan akɔ́n vǐ ce!” Ée é ɖɔ mɔ̌ ɔ́, é tɔ́n.
Currently Selected:
Tobíi 7: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.