Tobíi 11
11
Lě e azɔn gbɔ nú Tobíi gbɔn é
1Yě sɛkpɔ́ Kaselinu, toxo e kpan nukɔn Ninívu é, bɔ Hlafayɛ́li yí xó bó ɖɔ: 2“A tunwun lě e tɔ́ towe ɖe gbɔn có mǐ jó e dó ɔ́. 3Wǎ mǐ ní jɛ nukɔn nú asi towe bo ɖo xwé gbe jlá ɖó wɛ nú é kpó mɛ ɖě lɛ́ɛ kpó ná wá.” 4Bɔ ée yě mɛ we lɛ́ɛ ɖo yiyi wɛ ɔ́, Hlafayɛ́li ɖɔ nú Tobiyási ɖɔ é ní hɛn hweví sín vǐvɛ́ ɔ́ ɖó alɔ jí. Tobiyási sín cukú ká ɖo gǔdo yětɔn. 5Hwenɛ́nu ɔ́, Ana jínjɔ́n xwé ɔ́ nukɔn, bó ɖo ali e vǐ tɔn ná gbɔn wá é kpɔ́n sɛ́ dó wɛ vóéé. 6Tlóló ɔ́, é mɔ ɛ sɛ́ dó jǎwe, bó ɖɔ nú asú tɔn ɖɔ: “Vǐ towe nɛ́ jǎwe kpó mɛ e kplá ɛ hɛn yi é kpó nɛ́!” 7Cóbónú Tobiyási ná yi tɔ́ tɔn gɔ́n ɔ́, Hlafayɛ́li ɖɔ n'i ɖɔ: “Un gán jɛ wú ɖɔ nukún ná hun nú tɔ́ towe. 8Sá hweví sín vǐvɛ́ ɔ́ dó nukún tɔn lɛ́ɛ jí. Amasin ɔ́ ná wa nǔ ɖo wuntun wěwé lɛ́ɛ wú, bɔ bǐ ná bú. Énɛ́ ɔ́, tɔ́ towe ná lɛ́ jɛ nǔ mɔ jí, bó ná mɔ wěziza.”
9Yɛdo énɛ́ mɛ ɔ́, Ana dó wezun bó yi. É kplá así kɔ nú vǐ tɔn, bó ɖɔ n'i ɖɔ: “Un mɔ we lo vǐ ce! Un hɛn din ɔ́, un ná kú ɖo nyɔ̌ná mɛ.” É jɛ avǐ ya jí. 10Tobíi sí te, bo zun zɔnlin kíjɛ́ kíjɛ́, bó tɔ́n gbɔn hɔntogbó ɔ́ nu. 11Vǐ tɔn yi kpé e, bɔ hweví sín vǐvɛ́ ɔ́ ɖo alɔ tɔn mɛ. É fún funfún dó nukún jí n'i, bó hɛn ɛ bó ɖɔ: “Kpan akɔ́n tɔ́ ce!” É sá amasin ɔ́ dó nukún jí n'i, bó jó dó nú é ná wa azɔ̌. 12 Énɛ́ gúdo ɔ́, é sɔ́ alɔ tɔn we lɛ́ɛ dó ɖe hwevízá wěwé ɖé lɛ́ɛ kɔn nyi ayǐ sín nukún swe tɔn we lɛ́ɛ jí. 13Bɔ tɔ́ ɔ́ dɔn ɛ dó wǔ syɛ́nsyɛ́n kpó avǐ kpó bó sú xó ɖɔ: “Un ɖo mimɔ we wɛ vǐ ce, hwi mɛ e nyí wěziza nukún ce lɛ́ɛ tɔn é!” 14Bó lɛ́ ɖɔ d'é jí ɖɔ:
“È nǐ kpa Mawu!
È nǐ kpa nyǐkɔ tɔn susunɔ ɔ́!
È nǐ kpa wɛnsagun mímɛ́ tɔn lɛ́ɛ bǐ!
Mawu nyǐkɔ susunɔ ɔ́ ní cyɔ́n alɔ mǐ jí tɛgbɛ!
È nǐ kpa susu nú wɛnsagun mímɛ́ tɔn lɛ́ɛ tɛgbɛ káká sɔ́yi!
Aklúnɔ sɛ́ wǔvɛ́mimɔ élɔ́ dó mì,
amɔ̌, din ɔ́, un lɛ́ ɖo vǐ ce Tobiyási mɔ wɛ!”
15Tobiyási byɔ́ xwé ɔ́ gbe. É ɖo awǎjijɛ mɛ, bó ɖo Mawu xomlá wɛ gbe lélé. É ɖó lě e é yi gbɔn ɔ́ sín gbe nú tɔ́ tɔn ɖɔ: “Hwɛ e un zɛ é ɔ́, un mɔ nu tɔn ganjí. Un yí akwɛ́ e ɖo Gabayɛ́li sí é wá. Un da Sala Hlagwɛ́li ví ɔ́. É ná wá din. É sɔ́ lín dó Ninívu sín hɔntogbó ɔ́ ǎ.”
16Tobíi ɖidó Ninívu sín hɔntogbó ɔ́ nukɔn, bó ná yi kpé vǐ tɔn si kpó xomɛhunhun kpó, bó ɖo Mawu xomlá wɛ. Ninívunu lɛ́ɛ mɔ ɛ wá xweyǐgbe afɔmadlávi, mɛ ɖěbǔ ká hɛn kpogɛ n'i ǎ, bɔ é kpácá yě. Tobíi ɖɔ ɖo yě bǐ nukɔn ɖɔ Mawu kú nǔbláwǔ nú émí bó hun nukún nú émí. 17Ée é jɛ Sala vǐ tɔn si ɔ́ nukɔn é ɔ́, é xo ɖɛ n'i bó ɖɔ: “Doo nú we, vǐ nyɔ̌nu ce! È nǐ xomlá Mawu towe e kplá we wá mǐ gɔ́n é! Vǐ ce, é ná cɛ nú hwi lɔmɔ̌! Byɔ́ xwé towe gbe. Doo nú we, Mawu ní kɔn nyɔ̌ná tɔn kpódó awǎjijɛ tɔn kpán dó jǐ we! Vǐ ce, byɔ́ xwé gbe!”
18Gbe énɛ́ gbe ɔ́, Judéenu e ɖo Ninívu lɛ́ɛ hun xomɛ. 19Ayikáa kpó Nadábu Tobíi sín nɔví ví lɛ́ɛ kpó wá j'awǎ xá ɛ.
Currently Selected:
Tobíi 11: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.