Tobíi 10
10
Ado hu Tobíi kpó Ana kpó
1É ɖo mɔ̌ có, ayǐhɔ́ngbe ayǐhɔ́ngbe ɔ́, Tobíi nɔ ɖo azǎn nabí e è nǎ dó yi Hlagɛ́si ná bó lɛ́ kɔ wá é xa wɛ. Azǎn énɛ́ kó wá yi, bɔ vǐ tɔn ká kó lɛ́ kɔ wá ǎ. 2Bɔ é ɖɔ nú éɖée ɖɔ: “Abǐ nǔɖé wɛ ka hɛn ɛ ɖó te ɖo dɔ̌n a? Abǐ Gabayɛ́li kú, bɔ mɛ ɖěbǔ sixú sɔ́ akwɛ́ ɔ́ jó n'i ǎ?” 3Bɔ Tobíi wá jɛ nǔ lin kpɔ́n jí. 4Bɔ asi tɔn Ana ɔ́ sú xó bó ɖɔ: “Vǐ ce ɔ́, kú wɛ é kú! É sɔ́ kpo ɖo mɛ e ɖo gbɛ lɛ́ɛ mɛ ǎ.” É flín i sɛ́ dó bó jɛ avǐ ya jí, bó jɛ gbɛvíhan dó jí ɖɔ: 5“Vǐ ce, awě tɛ́ ká ɖíe xo mì e! Un jó we dó, bɔ a yi, hwi mɛ e nyí awǎjijɛ nukún ce tɔn é!” 6Lo ɔ́, Tobíi ɖɔ n'i ɖɔ: “Nɔ abwɛ̌, nɔví ce! Ma sɔ́ lin nǔ ɖěbǔ kpɔ́n ó, é ɖo ganjí; nǔɖé jɛ́n hɛn yě ɖó dɔ̌n dandan. Mɛɖójiɖiɖe wɛ nyí mɛ e kplá ɛ hɛn yi é; nɔví mǐtɔn ɖokpó wɛ. Ma dó ayimɛya nú hwiɖée ɖó vǐ towe wú ó, nɔví ce, é ná lɛ́ kɔ wá ɖo malín málín mɛ.” 7Lo ɔ́, Ana yí gbe n'i ɖɔ: “Ma sɔ́ ɖɔ xó ɖé nú mì ó! Ma blɛ́ mì ó! Vǐ ce kó kú!”
Ana sɔ́ ɖeji dó mɛɖé wú ǎ. Ayǐhɔ́ngbe ayǐhɔ́ngbe ɔ́, é nɔ́ yá wǔ tɔ́n sín xwé gbe, bó nɔ́ yi ɖo ali e Tobiyási gbɔn bo yi ɔ́ kpɔ́n sɛ́ dó wɛ ma ɖe kɔ; é ba ná se xó ɖé ɖo mɛ ɖěbǔ nu ǎ. Nú hwe yi xɔ ɔ́, é nɔ́ lɛ́ kɔ wá yi xwé gbe, bó nɔ́ ɖo gbɛvíhan kɛ́ɖɛ́ dó wɛ; é nɔ́ ba amlɔ kpo, bó nɔ́ ɖo avǐ ya wɛ zǎn mɛ káká bɔ ayǐ nɔ́ hɔ́n.
Tobiyási ba ná lɛ́ kɔ yi tɔ́ tɔn xwé
8Ée azǎn wɛ̌nɛ e jí Hlagwɛ́li xwlé nǔ dó ɖɔ émí ná sɔ́ ɖó te nú agbanɖuɖu vǐ émítɔn tɔn ɔ́ sɔgbe é ɔ́, Tobiyási yi ɖɔ nú asi tɔn tɔ́ ɖɔ: “Jǒ mì dó má yi. Un gán jɛ wú ɖɔ tɔ́ ce kpó nɔ ce kpó ná ɖo linlin wɛ ɖɔ émí kún sɔ́ ná mɔ mì ó. Kɛnklɛ́n, jǒ mì dó má lɛ́ kɔ yi tɔ́ ce xwé. Lě e é ɖe gbɔn có un jó e dó ɔ́, un ko tínmɛ nú we.” 9Lo ɔ́, Hlagwɛ́li lɛ́ yí gbe nú Tobiyási bó ɖɔ: “Nɔ gɔ̌n ce bó vǐ ce! Un ná sɛ́ wɛnsagun dó tɔ́ towe Tobíi ɔ́ gɔ́n, bɔ yě ná ɖɔ lě e a ɖe gbɔn ɔ́ n'i.” Tobiyási yí gbe n'i ɖɔ: “Éeǒ, kɛnklɛ́n jǒ mì dó nú má yi mɔ tɔ́ ce.”
10Énɛ́ ɔ́, Hlagwɛ́li sɔ́ Sala dó así nú Tobiyási, bó má dɔkun tɔn lɛ́ɛ bǐ ɖó we bó bɛ́ n'i: mɛsɛntɔ́ súnnu kpó nyɔ̌nu kpó, nyibú kpó gbɔ̌ kpó, tócí kpó lǎkúnmí kpó, avɔ, nǔzínzán tɛnmɛ tɛnmɛ kpódó akwɛ́ kpán. 11É jó yě dó bɔ yě yi ɖo nyɔ̌ná ɖaxó mɛ. É dó yibowá nú Tobiyási bo ɖɔ: “Un xo lanmɛ ɖagbe sín ɖɛ nú we, bó lɛ́ xo ɖɛ nú we ɖɔ ali ná nyɔ́ nú we vǐ ce. Aklúnɔ e ɖo sɛ́xwé é ní hɛn alɔ nú mi, hwi kpó asi towe Sala ɔ́ kpó! Un ɖi ɖɔ un ná mɔ vǐ mitɔn lɛ́ɛ cóbó ná kú.”
12Énɛ́ gúdo ɔ́, é ɖɔ nú vǐ tɔn Sala ɔ́ ɖɔ: “Yi asú towe tɔ́ xwé. Bɛ́ sín din ɔ́, asú towe sín mɛjitɔ́ lɛ́ɛ ná húzú mɛjitɔ́ nú hwi lɔmɔ̌. Yi ɖó fífá mɛ vǐ ce! Ɖo gbɛ ce hwenu bǐ ɔ́, un ɖo nukún ɖó wɛ ɖɔ xó towe ɖagbe jɛ́n ná nɔ́ wá gɔ̌n ce.”
Ée é ɖɔ mɔ̌ ɔ́, é dó gbe yě, bó jó yě dó bɔ yě yi. 13Ɛdina ɖésú ɖɔ nú Tobiyási ɖɔ: “Vǐ vívɛ́ná ce, Aklúnɔ ní kplá we yi xwé ɖagbe! É ní ná mì gbɛjidɔ́, bónú má mɔ vǐ e hwi kpó Sala kpó ná ji lɛ́ɛ é cóbó ná kú. Ɖo Mawu nukɔn ɔ́, un sɔ́ vǐ nyɔ̌nu ce dó alɔ mɛ nú we; kpé nukún wǔ tɔn ganjí, bó má ká dó ya n'i gbeɖé ɖo gbɛ towe mɛ bǐ ó. Yi ɖó fífá mɛ vǐ ce! Bɛ́ sín din ɔ́, mɔ mì dó mɔ nɔ towe ná, bó mɔ Sala dó mɔ nɔví towe nyɔ̌nu ná. Un byɔ́ nú mǐ bǐ ní sixú mɔ nyɔ̌ná ɖokpó ɔ́ ɖo gbɛ mǐtɔn bǐ mɛ!”
Ɛdina kplá así kɔ nú yě mɛ we lɛ́ɛ, bó jó yě dó bɔ yě yi ɖo awǎjijɛ mɛ. 14Énɛ́ ɔ́, Tobiyási gosín Hlagwɛ́li gɔ́n ɖo xomɛhunhun kpó awǎjijɛ kpán mɛ; é dó kú nú Aklúnɔ jǐxwé kpódó ayǐkúngban kpán tɔn, axɔ́sú wɛ̌kɛ́ ɔ́ tɔn, ɖó é bló bɔ tomɛ yiyi tɔn kpa ɛ. Hlagwɛ́li lɛ́ ɖɔ nú Tobiyási ɖɔ: “Aklúnɔ ní ná nyɔ̌ná e a ná dó wlí yɛ̌yi nú mɛjitɔ́ towe lɛ́ɛ ná ɖo gbɛ towe bǐ mɛ ɔ́ we!”
Currently Selected:
Tobíi 10: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.