Tobíi 12
12
Hlafayɛ́li ɖe mɛ e é nyí é xlɛ́
1Ée asikplákplá sín agɔ̌ lɛ́ɛ fó ɔ́, Tobíi ylɔ́ vǐ tɔn, bó ɖɔ n'i ɖɔ: “Vǐ ce, a ɖǒ ná sú axɔ́ mɛ e kplá we yi tomɛ é, bó ná ná ɛ ajɔ kpɛɖé d'é jí.” 2Tobiyási yí gbe nú tɔ́ tɔn ɖɔ: “Azɔ̌kwɛ́ nabí un ka ná sú i? Nǔ e é dó alɔ mì bɔ un yí lɛ́ɛ ɔ́, un na bo sɔ́ vlɔ̌ɖówe bo ná ɛ ɖokpó ɔ́, un ná lɛ́ kpo ɖo le ɖu wɛ. 3Ɖó é kplá mì lɛ́ kɔ wá wǔyɛ́yɛ́ afɔyɛ́yɛ́; é hwlɛ́n asi ce gán ɖo awǒvinú ɖé mɛ; é dó alɔ mì bɔ un mɔ akwɛ́ ɔ́ yí, bɔ é ká lɛ́ gbɔ azɔn nú we. Azɔ̌kwɛ́ tɛ́ un ka sixú ná ɛ nú nǔ énɛ́ lɛ́ɛ bǐ?” 4Tɔ́ ɔ́ yí gbe bo ɖɔ: “É hɛn ɔ́, é ná yí nǔ e é hɛn wá ɔ́ bǐ sín mǎɖówe.” 5Bɔ é ylɔ́ Hlafayɛ́li bó ɖɔ n'i ɖɔ: “Yǐ nǔ e a hɛn wá lɛ́ɛ bǐ sín mǎɖówe nú azɔ̌kwɛ́ towe. Din ɔ́, a hɛn ɔ́, a nǎ lɛ́ kɔ yi xwé ɖo fífá mɛ.”
6Énɛ́ ɔ́, Hlafayɛ́li ylɔ́ Tobíi kpó vǐ tɔn kpó jɛ vo, bó ɖɔ nú yě ɖɔ: “Mi dó kú nú Mawu, bó ɖɔ ɖagbe e é wa nú mi lɛ́ɛ é bǐ, ɖo nǔ e kó nyí gbɛɖowǔnánɔ lɛ́ɛ bǐ nukɔn, nú yě ná jɛ xixomlá ɛ jí, bó ná jɛ han ji dó kpa susu n'i jí. Mi jlá nǔwiwa Mawu tɔn lɛ́ɛ bǐ nú gbɛtɔ́ lɛ́ɛ, lě e yě jɛ xá gbɔn é. Mi ma nɔ gbɔ sísɔ́ ɛ su gbeɖé ó. 7É sɔgbe ɖɔ nǔ e nyí nǔglɔ́nú nú axɔ́sú ɖé ɔ́, è nǐ hɛn ɖó bibɛ jí; lo ɔ́, é ká jɛ ɖɔ è nǐ ɖe nǔwiwa Mawu tɔn lɛ́ɛ xlɛ́, bó jlá yě. Mi ji han dó jlá yě lě e é jɛ xá yě gbɔn é.
“Mi wa nǔ ɖagbe énɛ́ ɔ́, awě ɖěbǔ ná xo mi ǎ. 8 Ɖɛ xo ɖo nǔgbó mɛ kpó ɖagbe wa nú mɛ kpó hwɛjijɔ kpán xɔ akwɛ́ hú dɔkun e è jɛ kpó ahizi kpán lɛ́ɛ é. È nyɔ̌ xomɛ dó ná nǔ wamamɔnɔ lɛ́ɛ nyɔ́ hú è nǐ kplé siká. 9 Ɖó xomɛnyínyɔ́ mɔ̌hunkɔ nɔ́ hwlɛ́n mɛ sín kú sí, bó nɔ́ slá wǔ nú mɛ bɔ hwɛ bǐ nɔ́ gosín kɔ nú mɛ. Mɛ e nɔ ná nǔ wamamɔnɔ lɛ́ɛ ɔ́, gbɛjidɔ́ kún kplá nú yěɖée wɛ yě ɖe. 10Lo ɔ́, mɛ e nɔ hu hwɛ bo nɔ wa nǔ agɔ lɛ́ɛ ɔ́, yěɖée wú wa nǔ dó wɛ yě ɖe.
11“Din ɔ́, un ná ɖɔ xó nǔgbó ɔ́ bǐ nú mi ma sɔ́ nǔ ɖěbǔ hwlá dó mi. Ɖi lě e un ɖɔ gbɔn nú mi din ɔ́, nǔ e nyí nǔglɔ́nú nú axɔ́sú ɖé ɔ́, é nyɔ́ ɖɔ è nǐ hɛn ɖó hwlǎhwlá jí; lo ɔ́, é ká jɛ ɖɔ è nǐ ɖe nǔwiwa Mawu tɔn lɛ́ɛ xlɛ́, bó jlá yě ɖo susu yětɔn bǐ mɛ. 12 Hǔn, mi ní bó tunwun: hwenu e hwɛ Tobíi ɖo ɖɛ xo wɛ, bɔ Sala lɔ ɖo ɖɛ xo wɛ é ɔ́, nyi wɛ sɔ́ ɖɛ mitɔn xwlé ɖo Aklúnɔ susunɔ ɔ́ nukɔn. Un lɛ́ sɔ́ nǔwiwa towe lɛ́ɛ xwlé e hwenu e a nɔ ɖo cyɔ lɛ́ɛ ɖi wɛ é. 13Hwenu e a ma xokpɔ́n cóbó sí te sín távo tó ǎ, bó jó nǔɖuɖu towe dó bó yi ɖi cyɔ ɖokpó ǎ é ɔ́, hwe énɛ́ nu wɛ Mawu sɛ́ mì dó nú má wá tɛ́n we kpɔ́n. 14Lo ɔ́, é ká lɛ́ sɛ́ mì dó ɖɔ má wá gbɔ azɔn nú hwi kpó Sala vǐ towe si ɔ́ kpó. 15 Hlafayɛ́li wɛnsagun tɛ́nwe e nɔ ɖo te ɖo Aklúnɔ susunɔ ɔ́ sín nukɔn bó nɔ́ sɛn ɛ lɛ́ɛ é ɖokpó wɛ nú mì.”
16Tobíi kpó vǐ tɔn kpó sín ayi gbadó, bɔ xɛsi jɛ yě jí, bɔ yě xwe agbɔ̌nnusú do. 17Wɛnsagun ɔ́ ká ɖɔ nú yě ɖɔ: “Mi ma ɖi xɛsi ó; mi nɔ fífá mɛ; mi nɔ dó kú nú Mawu hwebǐnu! 18Nyɛ ɖésú sín ninɔmɛ wɛ zɔ́n bɔ un wá nɔ mi tɛ́ntin ǎ, Mawu ɖésú sín jlǒ wɛ. É wɛ mi ná dó kú ná, bó ná nɔ́ xomlá ɛ ayǐhɔ́ngbe ayǐhɔ́ngbe ɖo gbɛ mitɔn bǐ mɛ. 19Hwenu e mi vɛdó ɖɔ un ɖo nǔ ɖu wɛ sín ɔ́, é nyí nǔ ɖu wɛ un ɖe ǎ; mɔ̌ wɛ é cí nú mì ɖo wějí kpowun. 20Hǔn, mi bo xomlá Aklúnɔ ɔ́ ɖo ayǐkúngban élɔ́ jí; mi jlá susu Mawu tɔn ɔ́. Din ɔ́, nyɛ ná lɛ́ kɔ yi mɛ e sɛ́ mì dó ɔ́ gɔ́n. Midɛɛ lɛ́ɛ ɔ́, mi wlán nǔ e xá mi é bǐ dó wěma jí.”
Énɛ́ gúdo ɔ́, Hlafayɛ́li lɛ́ kɔ yi sɛ́xwé. 21Tobíi kpó vǐ tɔn kpán jlɔ́ ta; lo ɔ́, yě sɔ́ sixú mɔ ɛ sɛ́ dó ǎ. 22Yě ji han bó kpa Mawu, bó dó kú n'i, ɖó nǔ ɖaxó ɖaxó e é bló lɛ́ɛ é bǐ wú. Wɛnsagun Mawu tɔn ɖokpó sɔ́ éɖée xlɛ́ yě.
Currently Selected:
Tobíi 12: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.