Silaki ví Xónusɔ́ɖóte
Xónusɔ́ɖóte
Alɛsándli ɖaxó ɔ́, Glɛ̌sinu lɛ́ɛ xɔ́sú ɔ́ xɔ to e ko ɖo zǎnzǎnhwe jí lɛ́ɛ bǐ ɖo é kpo xwe 333 yi 323 bɔ è nǎ ji Jezu Klísu. Sín hwenɛ́nu wɛ Glɛ̌sinu lɛ́ɛ kpa acɛ gbɔn gbě nɛ́ ɔ́ bǐ jí ɖo ahwan kpódó toxóɖiɖɔ kpó lixo. Mɔ̌ ɖokpó ɔ́, hwɛndo Glɛ̌sinu lɛ́ɛ tɔn kpódó sinsɛn e gosín to yětɔn mɛ lɛ́ɛ kpó wá gba kpé fí bǐ. Dogbó to lɛ́ɛ tɔn kpódó nǔ e è nɔ dó tunwun togun ɖě ɖó vo nú ɖě ɔ́ lɔ wá jɛ bǔbú jí. Ényí mɔ̌ jɛ́n ká cí ɔ́, akɔta lɛ́ɛ sɔ́ ná wá tunwun mɛ alɔkpa e yě nyí tawun é ǎ.
Ée Jezu Silaki ví ɔ́ mɔ mɔ̌ ɔ́, é jló ná jɛ ahwan sinsɛn e nyí Izlayɛ́li togun ɔ́ tɔn ɔ́ kpódó hwɛndo tɔn lɛ́ɛ kpán jí. Nǔgbó ɔ́, tomɛxó Jwifu lɛ́ɛ tɔn gěgé ko yí gbe, bó ɖo hwɛndo Glɛ̌sinu lɛ́ɛ tɔn xwedó wɛ.
Jezu Silaki ví ɔ́ mɔ nǔ nyanya e walɔ nɛ́ e ɖo gbigba kpé wɛ wunnáwunná é sigǎn dɔn wá é. Énɛ́ wútu ɔ́, é hun wěmaxɔmɛ ɖokpó ɖó Jeluzalɛ́mu nú è na nɔ kplɔ́n nǔnywɛ́ hwɛndo togun ɔ́ tɔn lɛ́ɛ mɛ ɖo fínɛ́.
Jezu Silaki ví ɔ́, éé lɛ́ nyí sɛ́núnywɛ́kplɔ́nmɛtɔ́ ɔ́, akwɛ́nɔ lɛ́ɛ sín kúnkan Jeluzalɛ́mu tɔn mɛ wɛ é jɔ ɖe. Énɛ́ ɔ́ wɛ zɔ́n, bɔ é kpo ɖo vǔ cóbó jɛ sɛ́núnywɛ́ kplɔ́n jí, bó nɔ́ zán gbɛ tɔn dó Mawusɛ́n jí, ɖo ɖɛxixo mɛ. Nǔ tají e jí é sɔ́ kplɔ́n tɔn jínjɔ́n ɔ́ ɖíe: è nǎ lin tamɛ dó togun ɔ́ sín tan wú, bó lin dó xó e gbeyíɖɔ lɛ́ɛ ɖɔ ɔ́ kpódó nǔnywɛ́ tɔ́gbó Izlayɛ́li tɔn lɛ́ɛ tɔn kpó wú. Mɔ̌ ɖokpó ɔ́, é lɛ́ yi mɛjɔmɛ gěgé sín hǎ mɛ, lobo ka gbɔn to gěgé mɛ. Amɔ̌, walɔ ɖěvo, nǔ lin gbɔn alɔkpa ɖěvo tɛnmɛ tɛnmɛ e é yi mɔ ɖo gbějí lɛ́ɛ é ɖě húzú nǔɖé ɖo nǔɖiɖi tɔn wú ǎ.
Jezu Silaki ví ɔ́, nǔkplɔ́nmɛtɔ́ ɖé wɛ é nyí bó nɔ́ ɖó sísí ɖaxó nú nǔnywɛ́ akɔta ɖě lɛ́ɛ tɔn. Mɔ̌ ɖokpó ɔ́, é nɔ́ jɛ hun dó nǔɖiɖi tɔn kpó togun tɔn sín hwɛndo kpó jí, ma ɖi xɛsi nú nǔɖé. Nǔnywɛ́tɔ́ ɖé wɛ é nyí, bó ko mɔ nǔ gěgé kpɔ́n. Jijɔ ɖagbe e ɖo Izlayɛ́li togun e Mawu jɛ akɔ xá ɔ́ sín hwɛndo mɛ lɛ́ɛ ɔ́, é nɔ xwi jí nú bǐ, lobo nɔ gó d'é jí.
Nǔ e nyí nǔ, bó nyɔ́ hú nǔ bǐ ɖo nǔkplɔ́nmɛ tɔn lɛ́ɛ mɛ ɔ́, é xo bǐ kplé dó wěma ɖokpó mɛ ɖo é kpo xwe 190 bɔ è nǎ ji Jezu Klísu. Xwe nabí ɖé gúdo ɔ́, ɖo é kpo xwe 132, bɔ è nǎ ji Jezu Klísu ɔ́, vǐ tɔn ví wá yi Ejípu tomɛ. Fínɛ́ wɛ é wá mɔ ɖe ɖɔ lě e Glɛ̌sinu lɛ́ɛ nɔ́ lin tamɛ gbɔn é kpódó hwɛndo yětɔn lɛ́ɛ kpó lɛ́ xɔ ayǐ ɖo Jwifu e ɖo dɔ̌n lɛ́ɛ sín ayi mɛ hú yě mɛ e ɖo Jeluzalɛ́mu lɛ́ɛ. Énɛ́ ɔ́ wútu wɛ é sí te bó húzú wěma e daágbó tɔn wlán ɔ́ dó Glɛ̌sigbe mɛ.
Éhɔ́nmɛ din ɔ́, wěma Glɛ̌sigbe mɛ tɔn ɔ́ jɛ́n wá kpo ɖ'ayǐ nú mǐ. Ebléegbe mɛ tɔn ɔ́ nɔ ayǐ vo ǎ; é yá wǔ bú.
Nǔ tají tají e ɖo wěma ɔ́ mɛ lɛ́ɛ
Sɛ́núnywɛ́ kpódó ayi hɛn dó wa nǔ kpó (1.1—16.23)
Mawu kpódó gbɛ e é ɖó ɔ́ kpó (16.24—23.27)
Sɛ́núnywɛ́ kpódó sɛ́n ɔ́ kpó (24.1—33.18)
Wě ɖe xá mɛ tɛnmɛ tɛnmɛ dó lě e è nǎ zán gbɛ gbɔn é wú (33.19—42.14)
Susu Mawu tɔn ɖe éɖée xlɛ́ ɖo gbɛ ɔ́ mɛ, bó ɖe xlɛ́ ɖo tan mɛ (42.15—50.29)
Ɖɛ Jezu Silaki ví ɔ́ tɔn kpó xó gǔdo gúdo tɔn lɛ́ɛ kpó (51)
WĚMA TÍNMƐ DÓ GLƐ̌SIGBE MƐ TƆ́ Ɔ́ SÍN TA ƉE NÚ XÓ
Sɛ́nwéma lɛ́ɛ, gbeyíɖɔ wéma lɛ́ɛ (2) kpódó nǔwlánwlán ɖě lɛ́ɛ e bɔ dó yě wǔ lɛ́ɛ kpán nɔ ɖe nǔ tají gěgé xlɛ́ mǐ. (3) Hǔn mǐ ɖó ná zé alɔ nú Izlayɛ́li togun ɔ́ ɖó Sɛ́núnywɛ́ e è nɔ kplɔ́n ɖo wěma tɔn lɛ́ɛ mɛ é wú. (4) Lo ɔ́, è ka ɖó ná xa yě kpowun, bó húzú nǔnywɛ́tɔ́ ǎ. (5) Mɛ e yí wǎn nú nǔkplɔ́nkplɔ́n lɛ́ɛ ɖó ná lɛ́ kpé wú, bó sɔ́ yěɖée ɖó mɛ e ɖo to ɔ́ gúdo lɛ́ɛ é kan nu, (6) gbɔn xó yětɔn lɛ́ɛ kpó nǔwlánwlán yětɔn lɛ́ɛ kpó gbla mɛ.
(7) Énɛ́ wútu wɛ daágbó ce Jezu ván kan, bó xa (8) sɛ́n ɔ́, (9) gbeyíɖɔ lɛ́ɛ (10) kpó tɔ́gbó mǐtɔn lɛ́ɛ sín nǔwlánwlán ɖě lɛ́ɛ kpán, (11) bɔ é húzú nǔkplɔ́nkplɔ́n nǔgbó ɖo ali énɛ́ nu. (12) Gbɔn mɔ̌ ɔ́, é lɔmɔ̌ wlán wěma ɖokpó hwetɔnnu, bó ná dó kplɔ́n Sɛ́núnywɛ́ mɛ. (13) Énɛ́ ɔ́, mɛ e yí wǎn nú nǔkplɔ́nkplɔ́n, bó ká mɔ nǔ jɛ xó nɛ́ ɔ́ wú ganjí lɛ́ɛ (14) ná sixú kpé wú bó zán gbɛ yětɔn xwedó Mawusɛ́n.
(15) Hǔn, un ɖo byɔ̌byɔ́ mi wɛ ɖɔ (16) mi ní yí wǎn nú wěma élɔ́, (17) bó kú hǔn bó xa. (19) Un dó gǎn, bó ná húzú xógbe ɖé lɛ́ɛ dó gbe ɔ́ mɛ ɖo wěma élɔ́ mɛ, (20) bó ká hwedéwú, (18) mi bo sɔ́ kɛ mì.
(21—22) Nǔgbó ɔ́, xó e è ɖɔ dó Ebléegbe mɛ ɖo wěma élɔ́ mɛ lɛ́ɛ ɔ́, nú è húzú yě dó gbe ɖěvo mɛ ɔ́, yě sɔ́ nɔ́ ɖó hlɔ̌nhlɔ́n ɖokpó ɔ́ ǎ. (23—24) È nǎ ɖɔ lɔ ɔ́, mɔ̌ ɖokpó ɔ́ jɛ́n nyí nú sɛ́nwéma lɛ́ɛ, gbeyíɖɔ wéma lɛ́ɛ (25) kpó nǔwlánwlán ɖě lɛ́ɛ kpó. (26) Nú è húzú yě sín Ebléegbe mɛ dó gbe ɖěvo mɛ, vogbingbɔn e nɔ tɔ́n sín mɛ ɔ́ nɔ sukpɔ́.
(27) Axɔ́sú Evɛjɛti sín gǎnɖuɖu xwe gbantɔ́n nukún atɔngɔ́ ɔ́ (38) mɛ ɔ́, (28) un wa jɛ agban ɖó Ejípu. (29) Fínɛ́ wɛ un mɔ nǔkplɔ́nmɛ wéma nukúnɖéjí énɛ́ ɔ́ sín wlǎnwlán ɖokpó ɖe. (30) Bɔ un lin ɖɔ un ɖó ná bló nǔ bǐ bó ná húzú wěma énɛ́ dó gbe mǐtɔn mɛ.
(31—32) Hwenu e un nɔ fínɛ́ xɔ é bǐ ɔ́, un sɔ́ gbadanu gěgé, ganmɛ gěgé dó kplɔ́n nǔ ná, (33) bó ná dó fó azɔ̌ élɔ́. (34) Énɛ́ gúdo ɔ́, un ɖɔ má lɛ́ jlá nú mɛ e ma ɖo Izlayɛ́li ǎ, bó ká jló ná kplɔ́n nǔ lɛ́ɛ é. (35) Hwe énɛ́ nu ɔ́, gbɛ yětɔn ná sɔgbe xá Aklúnɔsɛ́n ɔ́.
Currently Selected:
Silaki ví Xónusɔ́ɖóte: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.