Sɛ́núnywɛ́ 19
19
k. Xu Vɔvɔ ɔ́ zlɛ́zlɛ́
1Amɔ̌, xomɛsin ma se gbɔ towe ɔ́ kɔn nyi mɛ e nɔ ɖe kɔ dó we lɛ́ɛ é jí káká sɔ́yi; nǔgbó ɔ́, a ko tunwun nǔ e wa gbé yě ja é ɖ'ayǐ. 2Jɛ nukɔn ɔ́, yě ná jó togun towe dó, bó ná nyi yě bléwún. Lo ɔ́, yě ká ná lɛ́ wá húzú gbe, lobo ná lɛ́ jɛ yě gúdo. Nǔgbó ɔ́, nǔ e yě ká bló é nɛ́. 3Yě kpo ɖo aluwɛ mɛ, lobo ɖo avǐ ya wɛ ɖo mɛkúkú yětɔn lɛ́ɛ sín yɔta. Nǔ ɖo mɔ̌ có yě lɛ́ sí te dó xlonɔnúwiwa ɖěvo jí: yě sɔ́ nǔ, lobo jɛ mɛ e yě ɖésúnɔ nya lɛ́ɛ é gúdo, ɖi nǔ ɖɔ hɔn wɛ yě hɔn ɖɔhun. Yě ɖésú wɛ ká sa vo nú togun ɔ́ ɖɔ é ní yi. 4Nǔ e ɖo yě gúdo é wɛ zɔ́n bɔ yě vɛ́ tóli jɛ bǎ énɛ́ ɔ́ mɛ. Bɔ é zɔ́n bɔ yě wɔn nǔ e kó jɛ ɖ'ayǐ é. Tódɔnnúmɛ e hwe dó yě é wɛ yě ɖésú lɛ́ xú wǔvɛ́ yětɔn lɛ́ɛ jí. 5Hǔn, kú baɖabaɖa kú gbé wɛ yě ja, bɔ togun towe ká ná xo xu ɔ́ zlɛ́ kpódó awǎjijɛ ɖaxó ɖé kpán.
6Nǔɖíɖó e ɖo acɛ towe mɛ é bǐ lɛ́ húzú alɔkpa vo, bónú vǐ towe lɛ́ɛ ná gló nǔ nyanya bǐ. 7Mɛ lɛ́ɛ mɔ akpɔ́kpɔ́ ɔ́, bɔ é cyɔ́n agbanjɛtɛn yětɔn jí. Yě lɛ̌ vɔ́ mɔ ayǐkúngban xúxú, bɔ é wú kun sín sin tɛ́ntin. Xu Vɔvɔ ɔ́ ɖésú wá húzú ali ma ɖó blɔ̌, ali e jí afɔklɛ́nwínnya ɖěbǔ má ɖe ǎ é, bɔ aslɔkɛ́ e ɖo xixo ɖo ɖisí amyɔ nú ali ɔ́ lɛ́ húzú ayǐkúngban e jí gběhan wú ɖe fɛɛn é. 8Mɛ e jí a cyɔ́n alɔ lɛ́ɛ é dín gbɔn fínɛ́ togun ɖokpó ɖɔhun, bó kpa nǔjíwǔ e a wa lɛ́ɛ. 9Yě cí sɔ́ e è kplá yi amagbomɛ lɛ́ɛ ɖɔhun. Yě nɔ́ lɔ́n lɛ̌ngbɔ́ví lɛ́ɛ ɖɔhun, bó nɔ́ ji han dó kpa susu nú hwi Aklúnɔ e hwlɛ́n yě gán é. 10Yě kpo ɖo nǔ e yě mɔ hwenu e yě ɖo kannumɔgbéjí lɛ́ɛ flín wɛ: ayǐkúngban e ɖó ná ji kanlin é wá ji ywɛ kɛ́ɖɛ́, tɔsisa ɔ́ ji aglǒběsé wɔ̌buwɔ́bú ɖé ɖó hweví tɛnmɛ. 11Ée é lín xóó é ɔ́, yě wá mɔ xɛví wunmɛ yɔ̌yɔ́ ɖěvo lɛ́ɛ. Hwenu e adɔ wa nǔ yětɔn, bɔ yě byɔ́ nǔɖuɖu ɖagbe ɖagbe ɖé é wɛ. 12Nú yě ná dó mɔ nǔ ɖu gɔ́ xo ɔ́, tɔxɛ ɖaxó ɖé lɛ́ɛ tɔ́n sín xu ɔ́ mɛ.
l. Ejípunu lɛ́ɛ lɛ́ vɔ́ nylá hú Sodɔ́munu lɛ́ɛ
13Lo ɔ́, tódɔnnúmɛ towe kɔn nyi hwɛhutɔ́ lɛ́ɛ jí. Amɔ̌, cóbónú nǔ ná nyí mɔ̌ ɔ́, xɛbyoso sín zǐngídi gěgé kó ɖe xlɛ́; Dǎka yětɔn lɛ́ɛ sín bǎ wɛ ɖo yě xo wɛ gbɔn wǔvɛ́ yětɔn lɛ́ɛ gbla mɛ, bɔ é jɛ xá, lobo ko ɖo hwɛjijɔ li jí. Nǔgbó ɔ́, wǎngbɛ́númɛ ɖaxó wɛ yě sɔ́ dó wa nǔ xá jǒnɔ lɛ́ɛ. 14Nǔgbó wɛ, mɛɖé lɛ́ɛ gbɛ́ ɖɔ émí kún ná yí jǒnɔ e wá lɛ́ɛ ó. Amɔ̌, yě mɛ Ejípunu lɛ́ɛ ɔ́, kannumɔgbɛmɛ wɛ yě sɔ́ jǒnɔ e wá ba yě, lobo wa ɖagbe bǐ nú yě lɛ́ɛ ɖó. 15Tódɔnnúmɛbá ɖo te kpɔ́n mɛ e yí jǒnɔ lɛ́ɛ kɛntɔ́ ɖɔhun lɛ́ɛ bǐ, é ná gblá ǎ. 16Yě sɔ́ awǎjijɛ dó yí jǒnɔ e wá yě gɔ́n lɛ́ɛ hwɛ̌, acɛ e nyí yě ɖésúnɔ tɔn é wɛ yě ná yě. Ée é ká wá yá é ɔ́, yě wá ɖó azɔ̌ syɛ́nsyɛ́n titewungbe kɔ jí nú yě. 17Énɛ́ wɛ zɔ́n bɔ yě ba nukúnnú kpo, lě e é nyí gbɔn nú mɛ e ɖo gbejí nɔ nú Mawu tɔ́ ɔ́ sín hɔntogbó jí é ɖɔhun. Ablu ɖaxó ɖé vun blá yě, bɔ ɖokpó ɖokpó yětɔn jɛ xwé li ba jí.
m. Mawu húzú alɔ nú nǔɖíɖó gbɛ ɔ́ tɔn lɛ́ɛ
18Lě e hǔn ɖé ɖyɔ́ ɔ́, wefɔ tɔn nɔ ɖyɔ́ é ɖɔhun ɔ́, mɔ̌ ɖokpó ɔ́ wɛ nǔɖíɖó gěgé húzú alɔ hwenɛ́nu, bɔ nǔ e jɛ lɛ́ɛ ɖe xlɛ́ céɖécéɖé: 19Kanlin e è ɖǒ bɔ é ná zun zɔnlin gbɔn ayǐkúngban jí kɛ́ɖɛ́ é wá xwetɔ́n ɖo tɔ mɛ; yě mɛ e nɔ lin tɔ lɛ́ɛ é wá xwetɔ́n ɖo ayǐkúngban jí. 20Zo nɔ wlí kpó hlɔ̌nhlɔ́n ɖaxó kpó ɖo sin tɛ́ntin, bɔ sin ɔ́ ká nɔ́ sixú xo e cí ǎ. 21É ɖo mɔ̌ có zo ɔ́ ká sixú fyɔ́ nǔvínúví maɖógǎn ɖo wǔ e ɖo xu ɔ́ nukún mɛ lɛ́ɛ é ǎ. Mɔ̌ ɖokpó ɔ́, yě ká lɛ́ kpé wú bó sínsín nǔɖuɖu e Mawu ná togun tɔn é ǎ. Có laglási e sínsínsínsín tɔn má vɛ́ wǔ ɖěbǔ ǎ é ɖɔhun wɛ é cí.
Susu kpa nú Mawu
22Nǔgbó wɛ Aklúnɔ, alɔ bǐ mɛ wɛ a sɔ́ togun towe dó sɔ́ nǔsúɖaxó ɖe, lobo sɔ́ susuvɔ ɖaxó cyɔ́n n'i. A ɖe kɔ dó e kpɔ́n gbeɖé ǎ, lo ɔ́, a nɔ kpɔ́ xá ɛ, lobo jɛ hun dó jǐ tɔn hwebǐnu ɖo fí bǐ.
Currently Selected:
Sɛ́núnywɛ́ 19: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.