Silaki ví 1
1
SƐ́NÚNYWƐ́ KPÓDÓ AYI HƐN DÓ WA NǓ KPÁN
(1.1—16.23)
Fí e Sɛ́núnywɛ́ ɔ́ ká gosín?
1 Sɛ́núnywɛ́ bǐ ɔ́, Aklúnɔ gɔ́n wɛ é gosín,
bó ɖo kpɔ́ xá ɛ nú tɛgbɛ gbe.
2Mɛ̌ ká sixú xa nyɛ̌kɛ́n e ɖo xutó lɛ́ɛ é
sín kwín ɖokpó ɖokpó?
Jǐ e nɔ́ ja é sín kunkun ɖokpó ɖokpó,
alǒ hwenu e ma nɔ́ vɔ ǎ é sín azǎn lɛ́ɛ.
3Mɛ̌ ká sixú mɔ nǔ jɛ lě e jǐxwé yi aga sɔ é wú?
Lě e ayǐkúngban gbló sɔ é wú?
Mɛ̌ ká sixú mɔ nǔ jɛ lě e xu gɔ́ngɔ́n sɔ é wú?
4Sɛ́núnywɛ́ ɔ́ , è ko ɖó e cóbó wá ɖó nǔɖíɖó lɛ́ɛ bǐ.
Linlin nǔnywɛ́ tɔn kó tíin sín do.
6Mɛ̌ wɛ è ka sɔ́ Sɛ́núnywɛ́ sín jɔtɛn xlɛ́?
Tito tɔn e ɖo hwlǎhwlá lɛ́ɛ ɔ́, mɛ̌ ká tunwun yě?
8Mɛ ɖokpó géé wɛ nyí nǔnywɛ́tɔ́ bɔ mɛ bǐ nɔ́ sísɔ́ avuvɔ ɖo nukɔn tɔn.
É wɛ nyí Aklúnɔ e jínjɔ́n axɔ́súzinkpo tɔn jí é.
9 É wɛ ɖó Sɛ́núnywɛ́ ɔ́.
É mɔ ɛ, bó kpɔ́n lě e é xɔ akwɛ́ sɔ é,
bó fúnfún i kpé nǔ e é ɖó lɛ́ɛ é bǐ jí.
10É ná gbɛtɔ́ bǐ kpó xomɛ kpán,
ɖo tají ɔ́, mɛ e ɖó wǎn yíyí n'i lɛ́ɛ é.
Sísí ɖó nú Aklúnɔ wɛ nyí Sɛ́núnywɛ́ sín bǐbɛ́
11Nú a sí Aklúnɔ ɔ́, a nǎ mɔ susu, bó ná vo bó gó.
Awǎjijɛ ɖaxó ɖé ná gɔ́ ayi towe mɛ.
12Nú a sí Aklúnɔ ɔ́, ayi towe ná ɖo awǎjijɛ mɛ.
Nǔ ná nyɔ́ nú we bɔ a nǎ mɔ gbɛjidɔ́.
13Nǔ bǐ ná yi ɖó ganjí káká yi fífónu
nú mɛ e nɔ sí Mawu lɛ́ɛ é.
Yě ná mɔ ɖɛ gěgé yí ɖo kúzán yětɔn gbe.
14Sísí ɖó nú Aklúnɔ wɛ nyí Sɛ́núnywɛ́ sín bǐbɛ́.
Nǔɖitɔ́ lɛ́ɛ ɔ́, Sɛ́núnywɛ́ ɔ́ kpó yě kpó wɛ
è ɖǒ ɖo nɔ yětɔn xomɛ.
15É xo adɔ̌ tɔn ɖó gbɛtɔ́ lɛ́ɛ tɛ́ntin nú tɛgbɛ gbe.
É ná nɔ gbejí xá vǐ yětɔn ví lɛ́ɛ.
16Tónú se nú Aklúnɔ wɛ nyí nǔnywɛ́tɔ́ nyínyí
nǔ vɔ ɖ'é wú ɔ́.
Sɛ́núnywɛ́ nɔ́ ná sínsɛ́n tɔn gbɛtɔ́ lɛ́ɛ bɔ é nɔ́ túnflá.
17 É nɔ́ sɔ́ nǔ e jló yě lɛ́ɛ é gɔ́ xwé yětɔn bǐ,
bó nɔ́ bɛ́ sínsɛ́n tɔn lɛ́ɛ gɔ́ kɔ́zún yětɔn lɛ́ɛ mɛ.
18Mɛ e nɔ sí Aklúnɔ lɛ́ɛ é ɔ́,
è nɔ sɔ́ Sɛ́núnywɛ́ dó ná ajɔ yě.
Sɛ́núnywɛ́ nɔ́ zɔ́n bɔ nyɔ̌ná kpó lanmɛ ɖagbe kpó
nɔ́ gba sɛ́ ɖo gbɛ mɛtɔn mɛ.
19É nɔ́ ɖe nǔ lɛ́ɛ xlɛ́ mɛ
bɔ è nɔ tunwun yě kpó nǔnywɛ́ kpó;
é nɔ́ sɔ́ mɛ e sí yě ɖe lɛ́ɛ é su.
20 Sísí ɖó nú Aklúnɔ wɛ nyí Sɛ́núnywɛ́ sín ɖɔ;
ala tɔn lɛ́ɛ ɔ́, gbɛ ɖi ga wɛ.
È nǐ xwesɔ bó ká ɖu ɖo mɛɖée jí.
22È sixú yí hwɛ nú mɛ e nɔ sin xomɛ ma sín nǔɖé wú é ǎ.
Nǔgbó ɔ́, mɛ e sin xomɛ é nɔ káká ɔ́,
é ná gblé gbɛ dó nú éɖée.
23Mɛ e nɔ xwesɔ lɛ́ɛ nɔ́ nɔ abwɛ̌ xwíí
káká yi jɛ hwenu e é jɛ xá dó é,
bɔ fífónu ɔ́, yě nɔ́ wá mɔ awǎjijɛ.
24Yě nɔ́ ɖɔ nǔ e yě lin ɔ́ ǎ káká yi jɛ hwenu e é jɛ xá dó é,
bɔ mɛ bǐ nɔ́ ɖɔ yě nyɔ́ nǔ i.
È nǐ nyɔ́ nǔ i bó ká nɔ jlɔ̌jlɔ́ jí
25Mi ná mɔ nǔnywɛ́ dodó sín lǒ lɛ́ɛ
ɖo nǔ e nyí dɔkun Sɛ́núnywɛ́ tɔn lɛ́ɛ mɛ.
Lo ɔ́, gbejí nɔ nú Mawu ɔ́,
nǔvɛ́wǔ ɖaxó wɛ é nyí nú hwɛhutɔ́.
26Sɛ́núnywɛ́ ba wɛ a ɖe a?
Bo se tónú nú sɛ́n lɛ́ɛ, énɛ́ ɔ́, Aklúnɔ ná ná we.
27Nǔgbó wɛ, ényí mɛɖé yí kplɔ́n dó Sɛ́núnywɛ́ jí ɔ́,
é nɔ́ sí Aklúnɔ;
nǔ e nɔ́ jló e lɛ́ɛ é nɛ́ nyí gbejíninɔ kpó fífá kpó nɛ́.
28Ma gbɛ́ sísí ɖó nú Aklúnɔ ó;
ma wá gɔ̌n tɔn kpó ayi we kpó ó.
29Ényí a ɖo xó ɖɔ nú mɛ ɖě lɛ́ɛ wɛ hǔn,
ma nɔ wa yɛmɛnú ó,
lo ɔ́, cɔ́ hwiɖée dó xó e nɔ́ tɔ́n sín nu towe mɛ é wú.
30Ma nɔ sɔ́ hwiɖée d'aga nú mɛ ɖě lɛ́ɛ ó,
é má nyí mɔ̌ ǎ ɔ́, a nǎ jɛ ayǐ bɔ winnyá ná hu we.
Nǔgbó wɛ, Aklúnɔ ná mɔ nǔ e sɔ́ hwlá wɛ a ɖe é.
É ná sɔ́ we hwe ɖo agun ɔ́ tɛ́ntin,
ɖó a wa gɔ̌n tɔn kpó sísí kpó ǎ,
bɔ adingban ka gɔ́ ayi towe mɛ.
Currently Selected:
Silaki ví 1: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.