Silaki ví 9
9
È nǐ tunwun lě e è nǎ nɔ gbɔn kpó nyɔ̌nu lɛ́ɛ kpó é
1 Ma hwan wǔ asi towe e a yí wǎn ná ganjí é wú ó,
xɛsi ma zɔ́n nú é wá mɔ ayi dó wǔ we bó ná wa nǔ nyanya nú we ó.
2Ma jó hwiɖée nú nyɔ̌nu ɖěbǔ ó,
ɖó é hɛn ɔ́, é ná kpa acɛ nú we.
3Ma yi xo go nyɔ̌nu tonyatɔ́ ɖé ó,
a hɛn ɔ́, a nǎ jɛ mɔ tɔn lɛ́ɛ mɛ.
4Ma nɔ nyɔ̌nu hansinɔ kpá dín ó,
ɖɛkpɛ tɔn hɛn ɔ́, é ná hɛn ayi towe gblé.
5Ma bɔ nukún nyi ɖyɔ̌vǐ ɖé wú bó kpɔ́n káká ó;
bǎ tɔn sixú wá xo we bɔ é ná vɛ́ tlílí.
6Ma jó hwiɖée nú nyɔ̌nu tonyatɔ́ lɛ́ɛ ó,
dɔkun towe bǐ ná vɔ ɖó fínɛ́.
7Ma nɔ ɖo ɖisí amyɔ kpɔ́n wɛ ɖo toxo ɖaxó lɛ́ɛ sín ali jí ó;
ma nɔ ɖo flúflú wɛ gbɔn fí e mɛɖé ma ɖe ǎ lɛ́ɛ ó,
8Ɖe nukún sín nyɔ̌nu e nyɔ́ ɖɛkpɛ lɛ́ɛ é wú;
ma bɔ nukún nyi ɖɛkpɛnyínyɔ́ e nyí mɛ ɖěvo tɔn é wú ó;
ɖɛkpɛnyínyɔ́ nyɔ̌nu tɔn hɛn mɛ gěgé bú.
É sín éyɛ́ wú bɔ wǎn yíyí yí myɔ.
9Ma jínjɔ́n nyɔ̌nu asúxwési kpá gbeɖé ó;
ma ɖu agɔ̌ xá ɛ bó nu ahan ó,
ayi towe táá nɔ wǔ tɔn,
bɔ a nǎ jɛ wǎn yí n'i jí,
bɔ wǎn yíyí gláglá énɛ́ ná dɔn we dó nǔ nyanya mɛ,
bɔ a nǎ sɔ́ hwiɖée nyi gbě.
È nǐ tunwun lě e è nǎ nɔ gbɔn kpó mɛ ɖě lɛ́ɛ kpó é
10Ma jó xɔ́ntɔn xóxó ɖé dó ó,
ɖó xɔ́ntɔn yɔ̌yɔ́ ɖé sixú nɔ tɛn tɔn mɛ ǎ;
xɔ́ntɔn yɔ̌yɔ́ ɔ́ cí atan yɔ̌yɔ́ ɖɔhun;
hwenu e é ná dóxó é ɔ́, a nǎ ɖɔ́ kpɔ́n kpó awǎjijɛ kpán.
11Ma nú mɛ nyanya lɛ́ɛ nú nɔ́ su nukún towe mɛ ó,
lě e gbɛ yětɔn ná wá fó gbɔn ɔ́, a tunwun ǎ.
12Ma dó zǒgbé mɛ e gbɛ́ wǎn nú Aklúnɔ lɛ́ɛ é sín nǔnyɔ́ná jí ó,
flín ɖɔ hwɛjijɔ ko tíin bɛ́ sín ayǐkúngban jí fí.
13Ɖǒ wǔ zɔ nú mɛ e ɖó acɛ bo hɛn ɔ́, é ná hu mɛ é,
hwenɛ́nu ɔ́, a sɔ́ ná ɖi xɛsi nú kú ǎ.
Lo ɔ́, nú a ka sɛkpɔ́ ɛ hǔn,
ma lɔn bo ɖe afɔ nyi do ó,
é má nyí mɔ̌ ǎ ɔ́, é ná hu we.
A ɖǒ ná tunwun ɖɔ mɔ wɛ lɛ́ lɛ̌ dó we,
bɔ é cí ɖɔ a ɖo zɔnlin ɖi wɛ gbɔn ahohó e è mɛ lɛ́ lɛ̌ dó toxo ɔ́, bó ná dó fun ahwan ná é jí wɛ ɖɔhun.
14Nɔ yi ba xwékpánu towe lɛ́ɛ kpɔ́n lě e a kpé wú gbɔn é,
bó nɔ́ yí nǔnywɛ́ ɖo sɛ́núnywɛ́tɔ́ lɛ́ɛ sí.
15Nú a jlǒ ná dó aji dó xó ɖé wú hǔn,
nɔ ba mɛ e nyɔ́ nǔ i lɛ́ɛ é.
Xóɖiɖɔ towe lɛ́ɛ bǐ ní nɔ́ mlɛ́ Mawu Ajalɔ̌nlɔn sín sɛ́n lɛ́ɛ.
16Mɛ e nɔ wa nǔ ɖó ganjí lɛ́ɛ é wɛ a nǎ ylɔ́ dó távo towe kɔn,
bó ká sɔ́ susu towe bǐ ɖó Aklúnɔ sísí mɛ.
17Lě e azɔ̌watɔ́ sín alɔnu mɛ́ sin gbɔn é wɛ nɔ́ zɔ́n bɔ è nɔ sɔ́ azɔ̌ yětɔn su;
lo ɔ́, mɛ e nyí togán é ɔ́, nǔnywɛ́ e nɔ́ tɔ́n sín xó tɔn mɛ lɛ́ɛ é wɛ nyí nǔ e è nɔ kpɔ́n é.
18Mɛ e nyɔ́ xó víví ɖɔ é ɔ́, mɛ bǐ wɛ nɔ́ ɖi xɛsi dó wǔ tɔn ɖo tomɛ;
mɛ bǐ wɛ nɔ́ gbɛ́ wǎn nú mɛ e nɔ ɖo nǔ xwe ɖɔ wɛ ɖo gbɛmɛ é.
Currently Selected:
Silaki ví 9: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.