Silaki ví 10
10
Togán lɛ́ɛ
1Togán nǔnywɛ́tɔ́ ɔ́ nɔ́ ná kplɔ́n ɖagbe togun tɔn;
nú é tunwun nǔ ɔ́, mɛ lɛ́ɛ ná ɖó sísí nú acɛkpikpa tɔn.
2Lě e togán ɖé ɖe ɔ́ wɛ gǎn hɔn-yitɔ́ tɔn lɛ́ɛ nɔ́ nɔ;
lě e togán ɖé ɖe ɔ́ wɛ toví tɔn lɛ́ɛ nɔ́ nɔ.
3Toxɔ́sú e má tunwun nǔɖé ǎ é nɔ́ hɛn to tɔn gba.
Togán nǔnywɛ́tɔ́ lɛ́ɛ nɔ́ dɔn to yětɔn yi nukɔn.
4Acɛkpikpa gbɛ ɔ́ tɔn ɔ́, Aklúnɔ lɔ mɛ wɛ é ɖe;
hwe tɔn nu su ɔ́, é nɔ́ sɛ́ togán e jɛ xá é dó.
5Aklúnɔ lɔ mɛ wɛ nyɔ̌ná gbɛtɔ́ tɔn ɖe;
é nɔ́ wá sɔ́ acɛkpikpa tɔn nú mɛ e nɔ wa sɛ́n zɔ́ lɛ́ɛ é.
Goyíyí kpó adǎnúwiwa kpó
6Ma hɛn kɛntɔ́ towe e wa nyanya nú we é dó xomɛ bó dó kɛn ɛ ó;
ma nɔ adǎn jí dó wa nǔ ɖěbǔ ó.
7Aklúnɔ kpó gbɛtɔ́ lɛ́ɛ kpó nɔ́ gbɛ́ wǎn nú goyíyí;
hwɛ agɔ ɔ́, hwɛ wɛ é nyí n'i kpó yě kpó.
8Zǐngídi, goyíyí kpó akwɛ́ kpó wɛ nɔ́ zɔ́n bɔ gǎn nɔ́ gosín togun ɖě sí jɛ ɖěvo sí.
9Gbɛtɔ́ ɔ́, afúntúntún kpó afín kpó kpowun wɛ é nyí,
étɛ́wú é ká nɔ́ yí go sɔ mɔ̌?
Ée mɛ e gbɛ hwenu tɔn ɖokpó ɔ́, nǔ kwíji kwíji ko gɔ́ ayi tɔn mɛ é.
10Azɔn syɛ́nsyɛ́n nɔ́ gbɔ́ dotóo ko.
Mɛ e nyí axɔ́sú égbé ɔ́ ná kú sɔ.
11Nǔɖé sɔ́ kpo nú mɛ e kú é zɛ nǔvínúví lɛ́ɛ, gběkanlin lɛ́ɛ kpó dohɔ́n lɛ́ɛ kpó wú ǎ.
12Kɔ lɛ́ sín Aklúnɔ gúdo wɛ nyí goyíyí sín bǐbɛ́;
Gbɛɖótɔ́ wunwɔn wɛ.
13Goyíyí sín bǐbɛ́ ɔ́, hwɛ wɛ;
hwɛhutɔ́ ɔ́ nɔ́ dó nǔ baɖabaɖa bǐ sin;
énɛ́ wú wɛ Aklúnɔ sɔ́ bǎ vívɛ́ dó xo goyítɔ́ lɛ́ɛ,
bó sú kún yětɔn dó bǐ gbídígbídí.
14 Aklúnɔ flí axɔ́sú gǎnhúnǔtɔ́ lɛ́ɛ sín gǎnzinkpo yětɔn jí,
bó sɔ́ mɛ fífá lɛ́ɛ ɖó tɛn yětɔn mɛ.
15Aklúnɔ hɔn ɖɔ nú goyítɔ́ lɛ́ɛ,
bó sɔ́ mɛ e nɔ sɔ́ yěɖée hwe lɛ́ɛ tun nyi tɛn yětɔn mɛ.
16Aklúnɔ vívá to togun ɖě lɛ́ɛ tɔn,
bó gbídí yě káká yi dodónu.
17É gbídí yě síin, bó sú kún yětɔn dó,
bɔ mɛɖé sɔ́ sixú flín yě ǎ.
18Mawu ɖó gbɛtɔ́ lɛ́ɛ nú yě ná yí go wú ǎ;
yě jɔ ɖó yě ná wa adǎn bó sin xomɛ wú ǎ.
19Kúnkan tɛ́ wɛ susu ka jɛ xá?
Gbɛtɔ́ lɛ́ɛ sín kúnkan wɛ hwenu e yě nɔ́ sí Aklúnɔ é,
kúnkan tɛ́ wɛ è ka sixú gbɛ́ wǎn ná?
Gbɛtɔ́ lɛ́ɛ sín kúnkan wɛ hwenu e yě nɔ́ vɛ́ tóli nú sɛ́n tɔn lɛ́ɛ é.
20Toví lɛ́ɛ wɛ nɔ́ kpa awǒbóbó nú togán yětɔn;
lo ɔ́, éyɛ́ ɔ́, mɛ e nɔ sí Aklúnɔ lɛ́ɛ é wɛ é nɔ́ kpa awǒbóbó ná.
22Dɔkunnɔ lɛ́ɛ, nǔwúkpétɔ́ lɛ́ɛ kpó wamamɔnɔ lɛ́ɛ kpó bǐ nɔ́ mɔ susu ɖo Aklúnɔ sísí mɛ.
23É jɛ xá ɖɔ è nǐ gbɛ́ wǎn nú wamamɔnɔ e nyí nǔnywɛ́tɔ́ é,
bó ká kpa awǒbóbó nú nǔnyanyawatɔ́ ǎ.
24È nɔ kpa awǒbóbó nú mɛjɔmɛ lɛ́ɛ, hwɛɖɔtɔ́ lɛ́ɛ kpó gǎn lɛ́ɛ kpó.
É ɖo mɔ̌ có mɛɖé ɖo yě mɛ bó hú gǎn mɛ e nɔ sí Aklúnɔ lɛ́ɛ é ǎ.
25Kannumɔ e nyí hwɛhutɔ́ é ná mɔ gbɛtɔ́ e ɖo kɔ vɔ́ lɛ́ɛ é bɔ yě ná nɔ́ sɛn ɛ.
É ná vɛ́ mɛ e tunwun nǔ lɛ́ɛ é wú, bɔ yě ná sa vo tɔn ǎ.
Mɛɖée sɔ́ hwe kpó nǔgbó ɖiɖɔ kpó
26A ɖo azɔ̌ wa wɛ hǔn, ma nɔ vlɛ́ ɖɔ émí nyí nǔnywɛ́tɔ́ ó;
ma nɔ sɔ́ hwiɖée su hwenu e nǔɖé má ɖo así towe ǎ é ó.
27È wa azɔ̌ bó jɛ dɔkun gěgé nyɔ́ hú è ɖo go yí wɛ bɔ nǔɖé ka ɖo mɛ sí ǎ.
28Vǐ ce, tunwun tɛn towe mɛ kpowun;
ma nɔ kpa hwiɖée hú lě e a ɖe é ó.
29Mɛ̌ ká sixú yí hwɛ nú mɛ e nɔ wa nyanya dó yěɖée wú lɛ́ɛ é?
Mɛ̌ ká sixú kpa mɛ e é nɔ́ sín hwɛ yětɔn wú,
bɔ yě nɔ́ kɔ́n wi nú yěɖée lɛ́ɛ é?
30È sixú kpa wamamɔnɔ ɖó nǔ e é tunwun é wú;
lo ɔ́, akwɛ́nɔ ɔ́, dɔkun tɔn wú wɛ è nɔ kpa ɛ.
31Nú è ɖo wamamɔnɔ kpa wɛ ɖo ya tɔn mɛ,
lobo nú é ka wá jɛ dɔkun ɔ́, è nǎ lɛ́ kpa ɛ hú mɔ̌.
Lo ɔ́, nú è gbɛ́ wǎn nú dɔkunnɔ ɖé,
bɔ é wá jɛ ya mɛ ɔ́, è nǎ lɛ́ gbɛ́ wǎn n'i d'é jí.
Currently Selected:
Silaki ví 10: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.