Silaki ví 8
8
È nǐ cɔ́ mɛɖée
1Ma nɔ dɔn nǔ xá mɛxó gǎnhúnǔtɔ́ ó,
é má nyí mɔ̌ ǎ ɔ́, a sixú jɛ alɔ tɔn mɛ.
2Ma kpé hwɛ xá dɔkunnɔ ó,
é táá wá hú agbɔ̌n we.
Nǔgbó ɔ́, siká kó hɛn mɛ gěgé bú,
é tlɛ lɛ́ hɛn axɔ́sú ɖé lɛ́ɛ sín ayi gblé.
3Ma ɖɔ jlɛ xá mɛ e nɔ yá nu é ó,
ma sɔ́ nakí dó myɔ tɔn mɛ ó.
4Ma ɖó alisá xá mɛ e ma yí kplɔ́n ǎ é ó,
ɖó é hɛn ɔ́, é ná zun tɔ́gbó towe lɛ́ɛ.
5Ma dó hwɛ mɛ e yí hwɛ tɔn gbe é ó;
flín ɖɔ mɛ bǐ wɛ nyí hwɛhutɔ́.
6Ma gbɛ́ wǎn nú mɛɖé ɖó é kpo nyɔ̌xó wú ó,
ɖó mɛɖé lɛ́ɛ kpo nyɔ̌xó ɖo mǐ lɔ mɛ.
7Ma nú mɛɖé sín kú hun xomɛ nú we ó,
flín ɖɔ mǐ bǐ jɛ́n ɖo nǎ kú wɛ.
8Ma gbɛ́ wǎn nú nǔkplɔ́nmɛ nǔnywɛ́tɔ́ lɛ́ɛ tɔn ó,
lo ɔ́, nɔ gbéjé lǒ yětɔn lɛ́ɛ kpɔ́n hwɛhwɛ,
nǔgbó ɔ́, yě gɔ́n wɛ mǐ ná yí kplɔ́n ɖe;
yě nɔ́ kplɔ́n mǐ lě e mǐ ná nɔ́ sɛn mɛxó lɛ́ɛ gbɔn é.
9Ma nɔ zɔ nú mɛxó e kó mɔ nǔɖé kpɔ́n lɛ́ɛ é sín nǔkplɔ́nmɛ ó;
yědɛɛ lɛ́ɛ ɖésú ɔ́, mɛjitɔ́ yětɔn lɛ́ɛ gɔ́n wɛ yě yí kplɔ́n ɖe.
A nɔ akpá yětɔn ɔ́, a nǎ mɔ nukúnnú jɛ nǔ mɛ,
bó ná nɔ́ yí gbe nú nǔ dó gan tɔn mɛ lě e é jɛ xá gbɔn é.
10Ma dó adǎn tamɛ nú mɛ nyanya ó,
é táá wá sí zo tɔn we.
11Ma nɔ te ɖo xomɛsinnɔ nukɔn ó,
é táá zɔ́n bɔ a nǎ nyi nu do.
12Ma nya akwɛ́ nú mɛ e hú gǎn we é ó,
lo ɔ́, nú a ka nya n'i jɛ́n wɛ hǔn, bo tunwun ɖɔ akwɛ́ énɛ́ ɔ́ dɔn.
13Ma yí alɔ nú akwɛ́ e hlɔ̌nhlɔ́n towe má kpé wú ná sú ǎ é ó,
lo ɔ́, nú a ka bló hǔn, nɔ gbesisɔ mɛ bó ná dó sú.
14Ma kpé hwɛ xá hwɛɖɔtɔ́ ɖé ó,
nǔgbó ɔ́, è nǎ yí hwɛ n'i ɖó azɔ̌ tɔn wú.
15Ma ɖɔ émí ná zɔn ali xá mɛ e ma nɔ xwesɔ ǎ é dó yi tomɛ ó,
é hɛn ɔ́, é ná dó akpɔ gěgé nú we.
Nǔ e wá ta tɔn mɛ é kɛ́ɖɛ́ jɛ́n é ná wa,
bɔ taɖu tɔn ná hu hwi kpó e kpó.
16Ma ɖɔ jlɛ xá mɛ e nylá hun bó ɖo adǎn jí é ó;
ma xwedó e yi gblǒlǒ mɛ fí ɖé ó;
mɛhuhu nyí nǔɖé nú éyɛ́ ǎ.
Nú mi yi jɛ fí e a ma sixú sú xó bɔ mɛɖé ná se ɖe ǎ é ɔ́, é ná zɔn jǐ we.
17Ma to nǔ ɖěbǔ xá gbɛtɔ́ nǔvɔ́nɔ ó,
é nɔ́ sixú hɛn xomɛ ǎ.
18Ma wa bibɛnú ɖěbǔ ɖo jǒnɔ nukɔn ó,
ɖó a tunwun lě e é ná wa nǔ gbɔn é ǎ.
19Ma hun ayi towe nú mɛɖé ján kpowun ó,
mɛ ɖěbǔ ná dó kú nú we ǎ.
Currently Selected:
Silaki ví 8: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.