Silaki ví 5
5
Ayij'ayǐ tófwe lɛ́ɛ
1Ma sɔ́ jiɖiɖe towe dó dɔkun towe lɛ́ɛ mɛ bó ɖɔ:
“Ée kpo lɛ́ɛ kan mì ǎ” ó.
2Ma lɔn nú jlǒ zozo towe lɛ́ɛ dɔn we dó nǔ nyanya mɛ ó.
3Ma ɖɔ: “Nǔgbó wɛ, mɛ̌ ká sixú kpa acɛ nú mì” ó,
ɖó Aklúnɔ ná ɖó hwɛ nú we dandan.
4 Ma ɖɔ: “Un hu hwɛ; é ká ɖo mɔ̌ có nǔ ɖěbǔ ká wa mì ǎ” ó.
Nǔgbó wɛ, Aklúnɔ ɔ́ nɔ́ xwesɔ.
5Nú a nɔ fɔ́n hwebǐnu bó nɔ́ ɖo hwɛ hu wɛ ɔ́,
ma gán jɛ wú dín ɖɔ è nǎ sɔ́ yě kɛ we ó.
6Ma ɖɔ: “Xomɛnyínyɔ́ Mawu tɔn d'agba dín,
é ná sɔ́ hwɛ ce gěgé lɛ́ɛ kɛ mì” ó.
Nǔgbó ɔ́, xomɛnyínyɔ́ kpó xomɛsin kpó bǐ wɛ ɖo gɔ̌n tɔn.
Adǎn e jí é ɖe ɔ́ ná wa nǔ xá mɛ e wa nǔ nyi do lɛ́ɛ.
7Yǎ wǔ lɛ́ kɔ wá Aklúnɔ gɔ́n; ma ɖo kɔlɛ́wá towe sɛ́ dó nukɔn wɛ ayǐhɔ́ngbe ayǐhɔ́ngbe ó,
ɖó xomɛsin Aklúnɔ tɔn ɔ́ ná wú ajijimɛ;
é ná sú kún towe dó tódɔnnúmɛzán gbe.
8Ma ɖó jiɖiɖe dó dɔkun e è jɛ kpódó ayi hízíhízí kpán lɛ́ɛ é wú ó;
adǎngbomɛzán gbe ɔ́, yě ná kpé nǔɖé wú bó wa nú we ǎ.
È nǐ ɖɔ xó ɖi nǔnywɛ́tɔ́ ɖɔhun
9Ma fún jinukún towe ɖo jɔhɔn ɖěbǔ nu kpowun ó,
ma ka nɔ mlɛ́ ali ɖé kpowun ó.
Gbɛtɔ́ ɖɛ̌ we nɔ wɛ nɔ wa nǔ gbɔn mɔ̌.
10Ma ɖo linlin ɖyɔ́ wɛ tɛgbɛ ó;
nɔ xó ɖokpó e a ɖɔ é jí.
11Nɔ yá wǔ ɖótó mɛ,
lo ɔ́, ma nɔ nɔ hwlɛndó jí dó yí gbe nú mɛ ó.
12Nú a mɔ do nú nǔɖé hǔn, yǐ gbe tɔn nú nɔzo towe;
é má ká nyí mɔ̌ ǎ hǔn, bɔ nu towe dó.
13É sixú sín xó e gbɛtɔ́ ɖɔ é wú bɔ è nǎ sɔ́ ɛ su,
abǐ è nǎ dó winnyá ɛ;
lobɔ nu gbɛtɔ́ tɔn hɛn ɔ́, é ná hɛn nǔ nyanya wá n'i.
14Ma nú gbɛtɔ́ lɛ́ɛ nɔ́ lin ɖɔ a nɔ ɖɔ xó nyanya dó mɛ ɖě lɛ́ɛ wú ó.
Ma sɔ́ xó towe dó blɛ́ mɛ ɖěbǔ ná ó.
Nǔgbó ɔ́, nú ajotɔ́ ɔ́ tunwun winnyá ɔ́,
hwɛɖɔxámɛ syɛ́nsyɛ́n wɛ ná nyí adingbannɔ tɔn.
15Hɔn nú hɛ̌n kpɛví kpɛví lɛ́ɛ ɖi ɖaxó ɖaxó lɛ́ɛ ɖɔhun.
Currently Selected:
Silaki ví 5: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.