Silaki ví 6
6
1Ma húzú kɛntɔ́ xɔ́ntɔn towe tɔn ó,
ɖó nyǐkɔ nyanya ɖo mɛ wú ɔ́, winnyágban wɛ è nɔ ɖíɖá,
bɔ gbe ɖe dó mɛ nɔ sukpɔ́;
nǔ e nɔ́ xá gbɛtɔ́ nyanya adingbannɔ é nɛ́.
2Ma jó hwiɖée nú jlǒ nyanya lɛ́ɛ ó,
é má nyí mɔ̌ ǎ ɔ́, hlɔ̌nhlɔ́n towe bǐ ná vɔ ajijimɛ.
3A nǎ ɖu ama towe lɛ́ɛ, atínsínsɛ́n towe lɛ́ɛ bǐ ná bú dó we,
bɔ a nǎ húzú atín xúxú.
4Jlǒ nyanya ɖo mɛɖé lanmɛ ɔ́, é nɔ́ zɔ́n bɔ mɛ ɔ́ nɔ́ ci fo,
bɔ éyɛ́ wú ɔ́, kɛntɔ́ tɔn lɛ́ɛ nɔ́ gbɔ́ ɛ ko.
Xɔ́ntɔn jɔ xɔ́ntɔn kpó xɔ́ntɔn tófwe lɛ́ɛ kpó
5Nú mǐ nɔ́ ɖɔ xó kpó xomɛnyínyɔ́ kpó ɔ́,
mǐ nɔ́ ɖó xɔ́ntɔn gěgé.
Nú wǎn yíyí xó nɔ́ tɔ́n sín nu mǐtɔn mɛ ɔ́,
mǐ ná mɔ xósin ɖagbe gěgé.
6A sixú tunwun gbɛtɔ́ gěgé,
lo ɔ́, ɖo mɛ afatɔ́n (1.000) mɛ ɔ́,
mɛ ɖokpó géé wɛ a nǎ kpɔ́n bó sɔ́,
bɔ é ná kplɔ́n nǔ we.
7Nú a jlǒ ná zun xɔ́ntɔn xá mɛɖé hǔn,
to kpɔ́n nǔ e wa nú é nyí é hwɛ̌;
ma yá wǔ sɔ́ hwiɖée jó n'i ó.
8Mɛ ɖé ná nyí xɔ́ntɔn towe hwenu e nyɔ̌ná ɖé ɖ'é mɛ n'i é;
lo ɔ́, nú adǎn ɖé wá gbo we ɔ́, é sɔ́ ná tunwun we ǎ.
9Xɔ́ntɔn ɖe, bó nɔ́ wá húzú kɛntɔ́ nú mɛ;
jlɛ e hwi kpó e kpó ɖɔ lɛ́ɛ ɔ́,
é ná jlá bǐ mɛ lɛ́ɛ dó dó winnyá we.
10Xɔ́ntɔn ɖe, bó ná ɖu nǔ xá we ganjí;
lo ɔ́, adǎn wá gbo we ɔ́,
é sɔ́ ná tunwun we ǎ.
11Ényí nǔ bǐ ɖo yiyi nú we wɛ ɔ́,
é nɔ́ nyí hwi ɖésú ɖěvo;
é nɔ́ zɔ́n nǔ mɛsɛntɔ́ towe lɛ́ɛ kpó jiɖiɖe kpó.
12Lo ɔ́, nú adǎn ɖé ká wá gbo we ɔ́,
é ná húzú dó gǔdo we bɔ a sɔ́ ná mɔ ɛ ǎ.
13Nɔ zɔ nú kɛntɔ́ towe lɛ́ɛ;
cɔ́ hwiɖée dó xɔ́ntɔn towe lɛ́ɛ wú.
14Xɔ́ntɔn e ɖo gbejí é ɔ́, alɔgɔ́ titewungbe wɛ é nyí nú mɛ;
mɛ e mɔ ɛ ɔ́, dɔkun ɖaxó wɛ é mɔ.
15Xɔ́ntɔn e ɖo gbejí é nyí nǔ è sun axi ǎ;
é xɔ akwɛ́ hú nǔ e è sixú lin é bǐ.
16Xɔ́ntɔn e ɖo gbejí é ɔ́, amasin e nɔ ná gbɛ mɛ é wɛ é nyí;
mɛ e nɔ sí Aklúnɔ lɛ́ɛ ná mɔ ɛ.
17Mɛ e nɔ sí Aklúnɔ lɛ́ɛ nɔ́ tunwun mɛ e yě ná zun xɔ́ntɔn xá lɛ́ɛ é.
Lo ɔ́, nǔglo wɛ nɔ mɔ nǔglo sɔ́.
È nǐ kplɔ́n Sɛ́núnywɛ́
18Vǐ ce, yǐ wǎn nú nǔkplɔ́nkplɔ́n hwenu e a ɖo wǐnnyáwínnyá mɛ é,
énɛ́ ɔ́, hwenu e ɖa towe lɛ́ɛ ná wá wé ɔ́, a nǎ lɛ́ ɖó nǔnywɛ́.
19 Sɛkpɔ́ ɛ bó nɔ te kpɔ́n sínsɛ́n tɔn ɖagbe lɛ́ɛ,
ɖi glesi kpó nǔdótɔ́ kpó ɖɔhun.
Nǔgbó wɛ, a nǎ xo kan dó lɛ gle tɔn,
lo ɔ́, malín málín mɛ ɔ́, a nǎ ɖu nyɔ̌ná e nɔ́ tɔ́n sín mɛ lɛ́ɛ sín le.
20Sɛ́núnywɛ́ vɛ́ wǔ nú mɛ e ma tunwun i ǎ lɛ́ɛ dín;
mɛ e sín ayi ma tunwun nǔ e sɔgbe ǎ lɛ́ɛ é sixú nɔ kpɔ́ xá ɛ ǎ.
21É cí awǐnnya e yě ná zé dó jǐ dó dó hlɔ̌nhlɔ́n yětɔn tɔ kpɔ́n é ɖɔhun nú yě,
lo ɔ́, yě ká nɔ́ yá wǔ jó e dó.
22Nǔgbó ɔ́, nyǐkɔ e è nǎ Sɛ́núnywɛ́ ɔ́ é jɛ xá ɛ ganjí;
mɛ kpɛɖé kpowun wɛ é nɔ́ ɖe éɖée xlɛ́.
23Vǐ ce, ɖǒtó bó yí gbe nú nǔ e ɖɔ wɛ un ɖe é;
ma xo nǔkplɔ́nmɛ ce nyi kɛ́n ó.
24Sin Sɛ́núnywɛ́ sín gɛdɛ dó afɔ nú hwiɖée;
sɔ́ kɔ towe dó wɔlɔ tɔn mɛ.
25Jǒ nɛgbé towe dó nú agban tɔn;
ma nú kan tɔn mɛ lanmɛ nú we ó.
26Sɛ kpɔ́ ɛ kpó ayi towe bǐ kpó;
xwedó ali tɔn kpó hlɔ̌nhlɔ́n towe bǐ kpó.
27Jɛ gǔdo tɔn, ba ɛ,
é ná ɖe éɖée xlɛ́ we;
nú a ka mɔ ɛ wlí hǔn, ma jó e dó ó.
28Ɖo fífónu ɔ́, a nǎ mɔ gbɔjɛ́ ɖo gɔ̌n tɔn.
Wǔvɛ́ towe ná húzú awǎjijɛ.
29Énɛ́ ɔ́, gɛdɛ tɔn lɛ́ɛ ná nyí alɔcyɔ́nmɛjí hlɔ̌nhlɔ́nnɔ ɖé nú we,
azɔkpo e ɖo kɔli towe mɛ ɔ́ ná húzú wɔlɔ xɔ akwɛ́ nú we.
30Agban tɔn ná nyí sikávɔ;
kan tɔn lɛ́ɛ ná nyí avɔxwɛ vɔvɔ ɖagbe ɖagbe ɖé lɛ́ɛ.
31A nǎ dó yě ɖi xwevɔ ɖɔhun.
A nǎ xwe yě ɖi jɛ̌gbákún awǎjijɛ tɔn ɖɔhun.
32Vǐ ce, nú a jlǒ ɔ́, a nǎ nyɔ́ nǔ i.
Nú a dó gǎn bó ɖó ayi te ɔ́, a nǎ bí.
33Nú a yí wǎn nú tó ɖó mɛ ɔ́, a nǎ tunwun nǔ.
Nú a nɔ tɛ́ tó ɔ́, a nǎ húzú nǔnywɛ́tɔ́.
34Nɔ dó afɔ nú mɛxó lɛ́ɛ;
hɛn Sɛ́núnywɛ́ yětɔn dó wǔ.
35Nɔ ɖótó xó e nɔ gosín Mawu gɔ́n lɛ́ɛ é bǐ;
Ma lɔn nú Sɛ́núnywɛ́ sín lǒ ɖěbǔ zɛ wǔ we ó.
36Nú a mɔ nǔnywɛ́tɔ́ ɖé hǔn,
yi mɛ énɛ́ ɔ́ gɔ́n zǎnzǎn tɛɛn;
xo afɔgbe ɖo hɔn tɔn ta.
37 Lin tamɛ dó Aklúnɔ sɛ́n lɛ́ɛ wú;
kpé nukún dó nǔzɔ́nmɛ tɔn lɛ́ɛ wú;
é ná zɔ́n bɔ a nǎ syɛ́n dɔn,
bɔ é ná ná we Sɛ́núnywɛ́ e ba wɛ a ɖe é.
Currently Selected:
Silaki ví 6: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.