Silaki ví 39
39
Sɛ́nzɔ́watɔ́ téwúngbéjú ɔ́
1Nǔ bǐ wɛ nɔ́ gbɔn vo nú mɛ e nɔ lin tamɛ
dó sɛ́n Mawu Aditi ɔ́ tɔn wú kpódó ayi tɔn bǐ sésé kpán é.
É nɔ́ kplɔ́n nǔnywɛ́ e mɛ̌si jixómɛ tɔn lɛ́ɛ sɔ́ ɖ'ayǐ é;
é nɔ́ zé ayiɖeɖayǐ hwenu tɔn lɛ́ɛ dó lin tamɛ dó xó e gbeyíɖɔ lɛ́ɛ ɖɔ é wú.
2É nɔ́ hɛn tan e è nɔ kpi dó gbɛtɔ́ nukúnɖéjí lɛ́ɛ wú é gbánwúngbánwún.
É nɔ́ tɛ́nkpɔ́n, bó nɔ́ mɔ nukúnnú jɛ nǔ e vɛ́ wǔ ɖo Sɛ́núnywɛ́ xó lɛ́ɛ mɛ é mɛ.
3É nɔ́ yi do nú lǒ lɛ́ɛ, lobo nɔ ba flɔ́n yětɔn; é nɔ́ kú hǔn,
lobo nɔ kun ɖɔ nú nǔnywɛ́ xógbe lɛ́ɛ.
4É ɖo mɔ̌ ɔ́, é hɛn ɔ́, é ná dó alɔ gbɛtɔ́ nukúnɖéjí lɛ́ɛ.
È nɔ mɔ ɛ ɖo nukɔntɔ́ lɛ́ɛ kpá.
É nɔ́ yi to ɖěvo lɛ́ɛ mɛ, ɖó é kó ɖó nǔnywɛ́ nǔ e nyɔ́ é
kpódó nǔ e gblé ɖo gbɛtɔ́ lɛ́ɛ sín gbɛ mɛ é bǐ kpán tɔn.
5Zǎnzǎn tɛɛn ɔ́, é nɔ́ fyá yi Aklúnɔ e ɖó e ɔ́ gɔ́n.
É nɔ́ xo ɖɛ ɖo Mawu Ajalɔ̌nlɔn nukɔn;
é hun nu tɔn hweɖěbǔnu ɔ́,
ɖɛ jɛ́n é nɔ́ xo,
bó ká nɔ́ ɖɔ hwɛ tɔn lɛ́ɛ bǐ n'i.
6Ényí Aklúnɔ Mawu Aditi ɔ́ jló ɔ́,
nǔnywɛ́ ná kpé e; énɛ́ ɔ́, é lɔmɔ̌ hɛn ɔ́,
é ná ɖɔ nǔnywɛ́xó kɔn nyi ayǐ;
ɖo ɖɛxixo tɔn mɛ ɔ́, é ná dó kú nú Aklúnɔ.
7É ná tunwun nǔ, lobo ka ná nɔ́ dó hwɛ jlɔ́jlɔ́;
é ká ná nɔ́ lin tamɛ dó nǔjíwǔ Aklúnɔ tɔn lɛ́ɛ wú.
8É ná ɖe kplɔ́n e é yí é xlɛ́;
bó ná sɔ́ akɔ e Aklúnɔ nɔ́ jɛ xá togun tɔn é sín sɛ́n ɔ́ dó yí go ná.
9Mɛ gěgé ná sɔ́ nǔnywɛ́ tɔn dó xɔ susu ná;
mɛ lɛ́ɛ ná wɔn ɛ gbeɖé ǎ:
flǐn tɔn ná bú wun ǎ;
nyǐkɔ tɔn ná nɔ te káká sɔ́yi.
10Togun lɛ́ɛ ná ɖɔ nǔnywɛ́ tɔn xó;
agun ɔ́ ná ji han dó xo mlá ɛ.
11Ényí é nɔ gbɛ ɔ́, nyǐkɔ tɔn ná xɔ susu hú nyǐkɔ afatɔ́n (1.000) ɖěvo;
ényí é ká kú ɔ́, fɛɛ mɛ jɛ́n é ná kú dó.
Susu kpa nú Aklúnɔ dó han mɛ
12Nú un ɖo tamɛ lin wɛ hweɖénu ɔ́, ayi ce nɔ mɔ nǔ gěgé,
bɔ un nɔ cí sun kpéká ɖɔhun.
Nǔ e wú wɛ un jló ná lɛ́ ɖɔ xó é nɛ́;
13Mi ɖótó mì; jɔwunjɔja gbejínɔtɔ́ e mi;
mi ní bó su vlovlo atín e è tun nyi tɔ tó é ɖɔhun.
14Mi ɖe wǎn ɖagbe zǎlínkpɔ́n ɖɔhun;
mi gba sɛ́ atín e ɖo tɔgbado mɛ é ɖɔhun, lobo ka ɖe wǎn;
mi nɔ kpɔ́ bó ji han,
lobo ka dó kú nú Aklúnɔ ɖó nǔ e é kó wa lɛ́ɛ é bǐ wú.
15Mi ní ɖɔ: “Mawu ɔ́ d'agba!”
Mi dó kú n'i bó ji han dó mlá ɛ kpó nǔxonú mitɔn lɛ́ɛ kpó;
nǔ e mi ná ɖɔ dó ɖu xwe n'i ɔ́ ɖíe:
16“Nǔwiwa Aklúnɔ tɔn lɛ́ɛ bǐ wɛ nyɔ́!
Nǔ e é ɖɔ lɛ́ɛ ɖokpó ɖokpó nɔ́ jɛ hwe tɔn nu.”
17È ma kanbyɔ́ ɖɔ: “Étɛ́ ká nyí élɔ́?
Étɛ́wú wɛ é ká cí mɔ̌” ó.
Ɖó è nǎ wá mɔ nǔkanbyɔ́ bǐ sín sin hwe tɔn nu.
Ée Aklúnɔ kɛ nu lě e ɔ́, sin ɔ́ nɔ te bo húzú tɔ ɖaxó;
nu ɖokpó géé jɛ́n é kɛ kpowun,
bɔ sin e ɖo nǔglɔ́ fí ɖě lɛ́ɛ é bǐ sɛ kplé.
18É ɖe gbe lě ɔ́, nǔ bǐ nɔ́ jɛ lě e é jló e gbɔn é;
mɛ ɖěbǔ sixú gbo ali nú hwlɛngán e é hɛn wá é ǎ.
19Nǔwiwa gbɛtɔ́ tɔn bǐ wɛ é nɔ́ mɔ;
ɖě nɔ́ nyí gǔdo tɔn mɛ nú ǎ.
20Nǔ e ko jɛ wá yi é kpó ée ná wá jɛ é kpó bǐ wɛ é nɔ́ mɔ;
nǔ ɖěbǔ nɔ́ kpácá éyɛ́ ǎ.
21È ma kanbyɔ́ ɖɔ: “Étɛ́ ká nyí élɔ́? Aniwú wɛ é ká cí mɔ̌” ó.
Ɖó nǔɖé wú wɛ é ɖó nǔ bǐ sésé.
22 Ɖɛ Aklúnɔ tɔn nɔ́ kɔn nyi nǔ bǐ jí,
lě e tɔ nɔ gɔ́, bó nɔ́ gba wu é ɖɔhun;
é nɔ́ gba kpé ayǐkúngban ɔ́ bǐ jí tɔɖisin ɖɔhun.
23Mɔ̌ ɖokpó ɔ́, togun ɖě lɛ́ɛ lɔ ná sún xomɛsin Mawu tɔn sín sin,
ɖi hwenu e é sɔ́ gbě e jí jǐ nɔ́ ja ɖe ganjí é dó húzú gbětótló jɛ vívɛ́ é ɖɔhun.
24Aklúnɔ sín ali lɛ́ɛ nɔ́ nyí ali jlɔ́jlɔ́ nú mɛ e nɔ́ nɔ gbejí n'i lɛ́ɛ é;
é ká nɔ́ vɛ́ zɔn nú mɛ e ma nɔ nyi sɛ́n tɔn ǎ lɛ́ɛ é.
25Ɖo bǐbɛ́mɛ ɔ́, Aklúnɔ bló nǔ ɖagbe lɛ́ɛ nú mɛ ɖagbe lɛ́ɛ,
bó bló nǔ nyanya lɛ́ɛ nú mɛ nyanya lɛ́ɛ;
26Bónú gbɛtɔ́ ná nɔ gbɛ ɔ́, yě ɖó ná mɔ:
sin, zo, gan kpó jɛ kpó, blěelinfín, anɔ̌sin,
kpódó wǐin kpán, vǐwunfyɔ́nfyɔ́n, ami kpódó avɔ kpán.
27Nǔ énɛ́ lɛ́ɛ bǐ ɔ́, nǔ ɖagbe wɛ yě nyí
nú mɛ e nɔ́ nɔ gbejí nú Aklúnɔ lɛ́ɛ é;
lo ɔ́, yě nɔ́ húzú nǔ nyanya nú mɛ e nyí mɛ nyanya lɛ́ɛ.
28Jɔhɔn ɖé lɛ́ɛ ɖe, bɔ Aklúnɔ ɖó
bó ná dó dɔn tó nú gbɛtɔ́ lɛ́ɛ,
bɔ xomɛsin kawun kawun tɔn zɔ́n,
bɔ yě húzú awěxomɛ ɖaxó ɖé;
hwɛɖiɖɔ hwenu ɔ́,
adǎnjijɛ yětɔn nɔ́ gba kpé gbɔn fí bǐ,
lobo ka nɔ zɔ́n bɔ mɛ e ɖó yě ɔ́,
xomɛsin tɔn nɔ yi káká vivɔnu.
29Aklúnɔ ɖó zo kpódó kɛ́njí kpó,
adɔ kpódó kú kpó bó ná dó dɔn tó nú gbɛtɔ́ lɛ́ɛ.
30Aɖǔ nǔwlíkanlin lɛ́ɛ tɔn, hɔnkéklě lɛ́ɛ,
amanɔnú jakpata lɛ́ɛ, hlɔnbiba hwǐ
e nɔ́ hu mɛ e nɔ gbɛ́ wǎn nú Mawu lɛ́ɛ é.
31Tónú se nú nǔzɔ́nmɛ lɛ́ɛ nɔ́ nyí awǎjijɛ nú yě;
yě ɖo gbesisɔ mɛ bó ná wa nǔ
hwenu e è ɖo hu dó tɔn mɛ é gbɔn ayǐkúngban ɔ́ jí;
hwe tɔn nu su ɔ́, yě ná vɛ́ tóli nú xó tɔn ǎ.
32Sín bǐbɛ́mɛ wɛ un ko ɖó jiɖiɖe d'é wú;
énɛ́ wú wɛ un lin tamɛ bo wlán.
33Nǔwiwa Aklúnɔ tɔn lɛ́ɛ bǐ wɛ nyɔ́;
é nɔ́ ná nǔ e jɛ xá é hwenu e é jɛ xá dó é.
34Hǔn, è ma ɖɔ: “Nǔ lě nylá hú lě” ó;
nǔgbó wɛ, hwe ɔ́ nu ná wá su,
bɔ a nǎ mɔ jɛ mɛ ɖɔ nǔ lɛ́ɛ bǐ jɛ́n nyɔ́.
35Bɔ din ɔ́, kpódó ayi mitɔn bǐ sésé kpó ɔ́,
mi zé gbe yi jǐ bó ji han dó dó kú nú Aklúnɔ.
Currently Selected:
Silaki ví 39: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.