Silaki ví 40
40
Linkpɔ́n sukpɔ́ dó gbɛtɔ́ lɛ́ɛ dín
1Aklúnɔ dó linkpɔ́n gěgé gbɛtɔ́ lɛ́ɛ jí;
é dó agban kpinkpɛn nyi yě jí
sín hwenu e yě kó zɛ hwɛ sín nɔ yětɔn xomɛ é,
bɔ é ná nɔ mɔ̌ káká yi hwenu e yě ná yi ayǐkúngban
ɖěe nyí nɔ nú nǔ e kó ɖo gbɛ lɛ́ɛ é bǐ glɔ́ é.
2Yě nɔ́ ɖo tamɛ linkpɔ́n dó nǔ e nɔ te kpɔ́n wɛ yě ɖe
kpó ayimaj'ayǐ kpó é wú wɛ magbokɔ:
kúzán gbe yětɔn nɔ́ dó xɛsi nú yě nǔjɔnǔ tɔn.
3Nǔ ɖokpó ɔ́ wɛ é nyí nú mɛ bǐ,
sín axɔ́sú e jínjɔ́n ayǐ ɖo gǎnzinkpo tɔn jí kpó susu kpó é jí,
káká yi jɛ gbɛ̌dónɔ e jínjɔ́n kɔ́ mɛ, lobo mlɔ́ afín mɛ lɛ́ɛ é jí.
4Sín mɛ e nɔ ɖo acɔ́vɔ ɖagbe ɖagbe vɔvɔ lɛ́ɛ dó wɛ,
jɛ̌gbákún ɖo ta lɛ́ɛ jí káká yi mɛ e sɔ́ nǔ kléwún é jí.
5Mɛ bǐ wɛ nǔ élɔ́ lɛ́ɛ nɔ́ wá ná: xomɛsin kawun kawun,
wǔhwinhwan, hunnyahunnya kpódó adohu kpó, kú xɛsi
mɛhɛnxomɛ kpó jlɛ kpán,
bɔ nú yě mlɔ́ ayǐ bó ná dó gbɔjɛ́ kpɛɖé ɔ́,
yě nɔ́ ɖo nǔ ɖěvo lin kpɔ́n wɛ ɖo amlɔ mɛ.
6Ɖo agbɔ̌n kpɛɖé yíyí mɛ ɔ́, yě nɔ́ lɛ́ jɛ dlɔ̌ kú jí,
bó nɔ́ mɔ wǔvɛ́ ɖésú ɖi kéze wɛ yě ɖe ɖɔhun.
Ado nɔ hu yě ɖó nǔ e yě mɔ ɖo dlɔ̌ mɛ é wú
ɖi sɔ́ja e hɔn nú ahwan é ɖɔhun.
7Hwenu e yě nɔ́ ja yěɖée sí jɛ gbé é ɔ́,
yě nɔ́ fɔ́n sín amlɔ mɛ,
bɔ nǔmaɖinǔ ɖé sín xɛsi e yě ɖi é nɔ́ kpácá yě.
8Nǔ e ɖo te kpɔ́n nǔ gbɛɖe bǐ é nɛ́,
sín kanlin jí káká wá gbɛtɔ́ jí;
lo ɔ́, é ká ná vɛ́ wǔ nú mɛ nyanya lɛ́ɛ mɔ̌hunkɔtɔn donu tɛ́nwe.
9Yětɔn wɛ ná nyí kú xolólo abǐ è hu mɛ, jlɛ,
ahwanfunfun, awěxomɛ ɖaxó ɖaxó lɛ́ɛ,
adɔ, nǔhɛngblé, jɛmɛjí,
10nǔ énɛ́ lɛ́ɛ bǐ ɔ́,
Mawu bló ɖó mɛ e ma nɔ nyi sɛ́n tɔn ǎ lɛ́ɛ é wú;
bɔ yě wú wɛ sin ɖaxó énɛ́ ɔ́ ɖi bó gba mɛ.
11Nǔ e tɔ́n sín ayǐkúngban lanmɛ é
bǐ nɔ́ lɛ́ lɛ́ kɔ yi ayǐkúngban lanmɛ,
bɔ nǔ e tɔ́n sín sin mɛ é nɔ́ lɛ́ kɔ yi xu mɛ.
Hwɛ agɔ dídó ná blíbú gbe ɖokpó
12Nǔ ná mɛ dó hɛn mɛ gblé, hwɛagɔdídó,
nǔ énɛ́ lɛ́ɛ bǐ ná wá sú kún dó gbe ɖokpó;
lo ɔ́, nǔjlɔ́jlɔ́wiwa ɔ́ ká ná ɖo te tɛgbɛ.
13Dɔkun e mɛ nyanya lɛ́ɛ jɛ é ná wá vɔ lě e tɔ nɔ xú é ɖɔhun;
yě ná wá yi lě e so nɔ nyí awǎn ɖaxó ɖé ɖo jǐ mɛ é ɖɔhun.
14Gbɛtɔ́ xomɛ ɖagbenɔ sixú hun xomɛ bo j'awǎ;
lo ɔ́, mɛ e ma nɔ wa nǔ mlɛ́ sɛ́n ɔ́ ǎ lɛ́ɛ é ná vɔ kún bǐ dégbédégbé.
15Vǐ kwín we ɖé kpowun wɛ
ná nɔ hɛ̌nnu mɛ e gbɛ́ wǎn nú Aklúnɔ lɛ́ɛ é tɔn mɛ;
mɛ blíblí énɛ́ lɛ́ɛ sixú ɖó ɖɔ ǎ.
16Fántín e wú ɖo tɔsisa tó ɔ́ wɛ
è nɔ hɔn síin jɛ nukɔn nú gběhan ɖě lɛ́ɛ bǐ;
17lo ɔ́, ɖagbewiwa ɔ́ ká nɔ́ cí jikpá ɖagbe ɖagbe ɖé ɖɔhun,
bɔ nǔ e è nǎ wamamɔnɔ lɛ́ɛ é ká nɔ́ nyí nǔ wunwɔn gbeɖé ǎ.
Xó tɛnmɛ tɛnmɛ
18Mɛ e ma sɔ́ gbɛ tɔn ɖó mɛ kannu ǎ é,
mɛ e nɔ ván kan bó nɔ́ wa nǔ é ɔ́, gbɛ yětɔn nɔ́ nyɔ́;
lo ɔ́, mɛ e yi jɛ dɔkun ɖ'é mɛ é ɔ́, nǔ lɛ́ nyɔ́ n'i hú mɔ̌.
19Vǐ gěgé ɖíɖó, abǐ toxo ɖokpó ɖó ayǐ nɔ́ zɔ́n bɔ è nɔ tíin nyǐ;
nyɔ̌nu blɔ̌máɖowǔ ɔ́ ká lɛ́ xɔ akwɛ́ hú gǎn mɔ̌.
20Vɛ̌ɛn kpó han ji bo xo nǔ kpán nɔ́ dó awǎjijɛ ayi mɛ nú mɛ,
có wǎn yí nú Sɛ́núnywɛ́ nɔ́ lɛ́ dó xomɛhunhun nú mɛ hú gǎn mɔ̌.
21Kpete kpódó tɔbá kpán sín gbe nɔ nyɔ́ se,
lo ɔ́, hangbe lómílómí nɔ́ lɛ́ nyɔ́ se hú gǎn mɔ̌.
22Nukún sín acɔ́ kpowun wɛ nǔ wa kpó yɛ̌yi kpó, kpódó ɖɛkpɛ kpán nyí;
lo ɔ́, gle e mɛ jinukún ɖo fɔ́ fɛɛn ɖe é lɛ́ nyɔ́ kpɔ́n hú mɔ̌.
23Xɔ́ntɔn abǐ hǎgbɛ́ nɔ́ mɔ yěɖée hwɛhwɛ,
lo ɔ́, nyɔ̌nu xwési kpódó asú tɔn kpán nɔ́ yá wǔ mɔ yěɖée hú gǎn mɔ̌.
24Nɔví abǐ ɖagbewatɔ́ nú nɔ́ hu dó mɛ ɖo adǎngbomɛ hwenu,
lo ɔ́, nǔ ná wamamɔnɔ lɛ́ɛ ɖo dandan mɛ hú gǎn mɔ̌.
25Siká kpódó kpatágan kpó nɔ́ ná gǎnjɛwú mɛ;
nǔ ɖagbe kplɔ́n mɛ nɔ lɛ́ jɛ tótó mɛ hú gǎn mɔ̌.
26Ényí mɛɖé ɖó akwɛ́ kpódó hlɔ̌nhlɔ́n kpó ɔ́,
é nɔ́ ɖó akɔ́nkpinkpan;
lo ɔ́, nú é ɖó sísí nú Aklúnɔ ɔ́, é ná lɛ́ ɖó hú mɔ̌;
ényí mǐ sí Aklúnɔ ɔ́, mǐ ná jɛ nǔ ɖěbǔ do ǎ;
alɔgɔ́ ɖé nú sɔ́ ná hu dó mǐ ǎ.
27É ná cí ɖɔ jikpá ɖagbe ɖé mɛ wɛ mi wá yi mɔ miɖée ɖe ɖɔhun;
mǐ mɔ alɔcyɔ́nmɛjí yí hú gǎn susu ɖíɖó.
È ma byɔ́ nǔ ɖu ó
28Vǐ ce, ma zán nǔbyɔ́ɖutɔ́ sín gbɛ ó;
è gbɔ bo kú ɔ́ nyɔ́ hú nǔbyɔ́ɖu.
29Ényí mɛɖé nyi kɔ kpɔ́n agbǎn mɛ e ɖo akpá tɔn é tɔn mɛ ní jló e hǔn,
mɛ énɛ́ ɔ́ ɖo gbɛ jɔ gbɛ ɖé zán wɛ ǎ;
éɖée dɔn kúji wɛ é ɖe gbɔn nǔɖuɖu e é má xo kan bo mɔ ǎ é wú;
é nyɔ́ wa ɔ́, mɛ e nyɔ́ nǔ i bó ká se kplɔ́n ganjí é sixú wa mɔ̌ gbeɖé ǎ.
30Mɛ e ma ɖó winnyá ǎ é ɔ́, nǔɖuɖu e é byɔ́ ɖu ɔ́ víví ɖo nu tɔn mɛ;
lo ɔ́, jiji wɛ é ká ɖe ɖo adɔgo tɔn mɛ myɔ ɖɔhun.
Currently Selected:
Silaki ví 40: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.