Silaki ví 38
38
Dotóo azɔngblétɔ́ kpódó azɔn kpó
1Dotóo azɔngblétɔ́ ɔ́, alɔdómɛtɔ́ wɛ;
nɔ sí i, ɖó Aklúnɔ wɛ ɖó é lɔmɔ̌.
2Nǔgbó ɔ́, azɔn ná gbɔ ɔ́,
Mawu Ajalɔ̌nlɔn gɔ́n wɛ é nɔ́ gosín;
lobɔ agbankan ka nɔ gosín axɔ́sú ɔ́ gɔ́n wá nú dotóo ɔ́.
3Dotóo azɔngblénúmɛtɔ́ ɔ́ nɔ́ yí go nǔnywɛ́ e é ɖó é tɔn;
nǔ tɔn nɔ́ nyɔ́ mɛ nukúnɖéjí lɛ́ɛ sín nukún mɛ.
4Atínma e nɔ́ gbɔ azɔn lɛ́ɛ é ɔ́,
ayǐkúngban lanmɛ wɛ è ɖe yě sín;
hǔn Aklúnɔ wɛ ɖó yě;
mɛ e sín ayi xwetɛ́ é nɔ́ gbɛ́ wǎn nú yě ǎ.
5 Kpo kpɛví ɖé wɛ Mɔyízi sɔ́ dó bló sin ɔ́ ɖó bɔ é nyɔ́ nu;
énɛ́ ɔ́, mɛ lɛ́ɛ mɔ nǔ jɛ nǔwúkpíkpé Aklúnɔ tɔn wú.
6É ná nǔnywɛ́ gbɛtɔ́ bónú é ná sixú nɔ́ kpa susu n'i,
ɖó gǎnhúnǔ sín azɔ̌ tɔn lɛ́ɛ wú.
7-8Atínkɛnsatɔ́ ɔ́, ama wɛ é nɔ́ xo kplé dó bló ná;
Aklúnɔ wɛ ka nɔ gblé azɔn lobo ka nɔ dó fífá mɛ;
énɛ́ ɔ́, é kpo ɖo nǔ wa wɛ tɛgbɛ,
gbɔn gbɛ ɔ́ bǐ mɛ ɔ́,
lanmɛsyɛ́nsyɛ́n ɔ́ gɔ̌n tɔn wɛ é nɔ́ gosín.
9Vǐ ce, ényí a ɖo azɔn jɛ wɛ hǔn,
ma dó vɛ̌ ná ó, lo ɔ́, sa vo nú Aklúnɔ,
é ná gbɔ azɔn nú we.
10Ɖe kɔ sín nǔwanyido towe lɛ́ɛ wú;
wa nǔ ɖagbe, lobo ka slá wǔ nú ayi towe,
nú é jɛ te sín hwɛ tɔn lɛ́ɛ mɛ.
11Ényí hlɔ̌nhlɔ́n tɔn ɖo wǔ we hǔn,
sɔ́ linfín alɔgogo ɖokpó,
zǎlínkpɔ́n kpó ami kpó bó xwlé Mawu.
12Bo jó dotóo azɔngblétɔ́ ɔ́ dó nú é wa azɔ̌ nú we,
ɖó Aklúnɔ wɛ ɖó é lɔmɔ̌.
Dotóo azɔngblénúmɛtɔ́ ɔ́ ná nɔ akpá towe,
ɖó nǔ tɔn hu dó we.
13Hwe ɔ́ nu ná wá su dandan,
bɔ ganjí ná nɔ ɖo agbaza mɛ towe ná sín wǔ tɔn.
14Nǔgbó ɔ́, é wá su hwe tɔn nu ɔ́,
dotóo azɔngblétɔ́ lɛ́ɛ ná sa vo nú Aklúnɔ;
é ná ná bɔ yě ná dó fífá wǔvɛ́ e mɔ wɛ azunzɔnnɔ ɔ́ ɖe ɔ́ mɛ,
bó ná gbɔ azɔn n'i, lobo ka ná hɛn ɛ ɖó gbɛ.
15Ényí mɛɖé wa nǔ nyanya dó mɛ e ɖó e ɔ́ wú hǔn,
mɛ énɛ́ ɔ́ ní bó jɛ dotóo azɔngblénúmɛtɔ́ ɔ́ sín alɔ mɛ.
Nǔwamɛ
16 Vǐ ce, ya mɛ e kú é sín avǐ;
ji nǔwamɛ sín han bo dó ɖe wǔvɛ́ towe xlɛ́;
bo ɖe yɛsu e è ɖǒ ná fɔ n'i lɛ́ɛ é bǐ n'i,
bó ma ka dó vɛ̌ nú yɔdo e mɛ è ɖi i dó é ó.
17Ya avǐ hoho; ɖe nǔwamɛ sín afɔ;
wa nǔ tɔn bǐ lě e é jɛ xá gbɔn é;
azǎn ɖokpó abǐ we nú è ma wá ɖɔ nǔ towe ó;
énɛ́ gúdo ɔ́, dǒ gbɔ nú hwiɖée.
18Nǔgbó ɔ́, aluwɛ sixú dɔn mɛ yi kú;
mɛ e awakanmɛ gbɔ́jɔ́ ná é sɔ́ ɖó hlɔ̌nhlɔ́n ɖé ǎ.
19Ényí adǎn gbo mɛ ɔ́, wǔ wɛ nɔ́ kú mɛ;
lobɔ gbɛzínzán wamamɔnɔ ɖɔhun ɔ́,
nudómɛ wɛ é ká nyí.
20Ma jó hwiɖée nyi aluwɛ mɛ ó
nya ɛ dó zɔ bo lin sɔ yí e ná wá hɔ́n é kpɔ́n.
21Ma wɔn ó, è nɔ lɛ́ kɔ wá sín kútomɛ ǎ;
aluwɛ sixú wa nǔ ɖěbǔ ɖo mɛ e kú é wú ǎ;
lo ɔ́, é ká nɔ́ wa nǔ nyanya nú hwɛ.
22Flín ɖɔ nǔ e xá ɛ ɔ́ ná wá xá hwi lɔmɔ̌;
éyɛ́ jí wɛ é jɛ sɔ e wá yi é;
hwɛ jí ná jɛ wɛ é ɖe égbé din.
23Hwenu e mɛɖé wá byɔ́ gbɔjɛ́ tɔn gǔdo gúdo tɔn mɛ é ɔ́,
bo ɖó tamɛ lin dó wǔ tɔn te;
hwenu e funfún tɔn gǔdo gúdo tɔn ká ná wá yi é ɔ́,
dǒ gbɔ nú hwiɖée dó ta tɔn mɛ.
Alɔnuzɔ́ lɛ́ɛ
24Bó ná dó húzú nǔnywɛ́tɔ́ ɔ́,
è ɖǒ ná ɖó ayijayǐnúwiwa gěgé;
mɛ e azɔ̌ má hú gǎn dín ǎ é hɛn ɔ́,
é ná húzú nǔnywɛ́tɔ́.
25Nɛ̌ glesi e lɔ mɛ glelɛmɔ ɖe ɔ́
ká sixú húzú nǔnywɛ́tɔ́ gbɔn?
Susu tɔn bǐ nɛ́ nyí ɖɔ é ní vɛ́ ɖo nyibú lɛ́ɛ gúdo,
bó ɖo nǔ dó yě wɛ, bónú yě ná dó zun zɔnlin;
é nɔ́ ɖo azɔ̌ wa xá yě wɛ magbokɔ,
bɔ nyibú wínnyáwínnyá tɔn lɛ́ɛ kɛ́ɖɛ́ sín xó ɖɔ wɛ jɛ́n é nɔ́ ɖe.
26Ayi tɔn bǐ nɔ́ ɖo hwɛn e lɛ wɛ é ɖe ɔ́ jí;
é nɔ́ zé gbadanu tɔn lɛ́ɛ bǐ dó ná nǔɖuɖu nyibú tɔn lɛ́ɛ ná.
27Nǔ ɖokpó ɔ́ wɛ é nyí nú azɔ̌watɔ́ lɛ́ɛ
kpódó alɔnuzɔ́watɔ́ lɛ́ɛ kpán;
yě nɔ́ wa azɔ̌ zǎn kpó kéze kpó.
Xlɛ̌ tɔn ɖokpó ɖíe: mɛ e nɔ ɖó wuntun nǔ é ɔ́,
é nɔ́ ɖo ɖiɖe ɖěvo lɛ́ɛ ba ná ɖe tɔ́n wɛ tɛgbɛ;
é nɔ́ sɔ́ ayi tɔn bǐ ɖó te dó ɖe nukún mɛ ɖagbe ɖagbe ɖěvo lɛ́ɛ tɔ́n;
é nɔ́ sɔ́ gbada hwenu tɔn lɛ́ɛ ɖó te, bó nɔ́ fó azɔ̌ tɔn.
28Nǔ ɖokpó ɔ́ wɛ é nyí nú fletuntɔ́ e
ɖo ayǐjínjɔ́n ɖo wan kɔn é nɛ́;
é nɔ́ kpɔ́n gan e zɔ́ wa gbé é ja é ganjí;
myɔ sín zozo nɔ zɔ́n bɔ wǔtu tɔn bǐ nɔ́ nyí dɛ̌n;
é ɖó ná li za xá adogwle myɔ ɖo wǔ;
gbe e ɖi wɛ zǔn ɖe ɔ́ nɔ́ gba tókan n'i;
nukún tɔn lɛ́ɛ bǐ nɔ́ ɖo nǔ alɔkpa e é jló ná ɖe tɔ́n é jí;
é nɔ́ sɔ́ ayi tɔn bǐ dó wa azɔ̌ tɔn ganjí;
é nɔ́ sɔ́ gbada hwenu tɔn lɛ́ɛ dó jlá azɔ̌ e é kó wa fó é ɖó.
29Nǔ ɖokpó ɔ́ wɛ é nyí nú zɛ̌nmɛtɔ́ e ɖo ayǐjínjɔ́n ɖo azɔ̌ tɔn kɔn é.
É nɔ́ sɔ́ afɔ tɔn lɛ́ɛ dó lílɛ́ zɛ̌nzɔ́wanú ɔ́ ná;
é nɔ́ ɖo nǔ e é ná wa é linkpɔ́n wɛ hwebǐnu,
lobo nɔ dó gǎn dó wa azɔ̌ gěgé kɔn nyi ayǐ.
30Ko e è nya ɖó afɔ wú é ɔ́,
è nɔ sɔ́ alɔ tɔn lɛ́ɛ dó mɛ ná;
é nɔ́ sɔ́ ayi tɔn bǐ ɖó te bo nɔ sá nǔ dó ganjí;
é nɔ́ sɔ́ gbada hwenu tɔn lɛ́ɛ dó bló zokpó ɔ́ mɛ ɖó ná.
31Mɛ énɛ́ lɛ́ɛ bǐ hɛn ɔ́, yě ná gán jɛ alɔ yětɔn lɛ́ɛ wú;
mɛ ɖokpó ɖokpó bí ɖo azɔ̌ tɔn li nu.
32Yědɛɛ lɛ́ɛ mɛ vo ɔ́, toxo ɖěbǔ sixú nyí gbǐgbá ǎ;
è ka sixú nɔ mɛ ǎ, è ka sixú lɛ́ ɖi sa gbɔn ali tɔn lɛ́ɛ jí ǎ;
lo ɔ́, kplé bó ɖe wě dó toxo ɔ́ wú hwenu ká wá su ɔ́,
mɛɖé nɔ́ kan linlin yětɔn byɔ́ yě ǎ.
33Yě ɖó tɛn jɔ tɛn ɖé mɛ bó nɔ́ nɔ ɖo agunkplétɛn lɛ́ɛ ǎ;
yě nɔ́ jínjɔ́n zinkpo hwɛɖɔtɔ́ ɔ́ tɔn jí ǎ;
yě tunwun nǔ ɖěbǔ ɖo sɛ́n ɔ́
kpódó acɛ e nyí mɛ ɖokpó ɖokpó tɔn é kpán mɛ ǎ;
yě ɖó bǐbí ɖé ɖo kplɔ́n ná mɛ abǐ sɛ́n sín alixo ǎ;
yě ɖo mɛ e nɔ dó lǒ lɛ́ɛ é mɛ ǎ.
34Lo ɔ́, nǔ e è ko dó wá nú tɛgbɛ gbe lɛ́ɛ ɔ́,
yě nɔ́ hɛn yě wú gbánwúngbánwún,
lobɔ vosisa yětɔn lɛ́ɛ ɔ́, azɔ̌ yětɔn kɔn jɛ́n yě nɔ́ nyi kpɛ́n dó.
Currently Selected:
Silaki ví 38: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.