Silaki ví 37
37
Xɔ́ntɔn ɖagbe kpó xɔ́ntɔn nyanya kpó
1Mɛ gěgé nɔ́ ɖɔ: “Nyɛ lɔmɔ̌ ɔ́, xɔ́ntɔn towe wɛ un nyí.”
Lo ɔ́, nyǐ wɛ mɛɖé lɛ́ɛ nɔ́ dó jɛ ná kpowun.
2Ényí hǎgbɛ́ ɖé abǐ xɔ́ntɔn ɖé wá húzú kɛntɔ́ ɔ́,
nǔbláwǔ wɛ é nɔ́ nyí,
bó nɔ́ dɔn mǐ sɛkpɔ́ kú.
3Étɛ́wú wɛ nǔ nyanya wiwa sín ayi mitɔn ka tíin?
Dǎkaxixo ná kpé ayǐkúngban ɔ́ jí wú ká wɛ a?
4Ɖagbe mɛ wɛ nya élɔ́ nyí xɔ́ntɔn towe ɖe;
lo ɔ́, nú é ká jɛ wǔvɛ́ mɛ ɔ́,
é nɔ́ dó gǔdo we.
5Xɔ́ntɔn ɔ́ nɔ́ mɔ wǔvɛ́ xá we hwenu e a nɔ ɖo nǔɖuɖu ná ɛ wɛ é;
lo ɔ́, zalili hwenu ɔ́, é ná hɔn yi cí nǔ e ná bɛ yɛ n'i é gúdo.
6Ma wɔn xɔ́ntɔn towe ó,
nɔ flín i tɛgbɛ hweɖěbǔnu e a nǎ hɛn dɔkun sín ahwangbénu wá é.
Wěɖexámɛtɔ́ lɛ́ɛ
7Wěɖexámɛtɔ́ bǐ wɛ nɔ́ kpa nǔ e é nɔ́ kplɔ́n mɛ lɛ́ɛ é;
lo ɔ́, mɛ ɖé lɛ́ɛ ká tíin bó nɔ́ hwín dó yětɔn mɛ.
8Ma ɖeji dó nǔkplɔ́nmɛtɔ́ wú ó;
to kan nǔ e ba wɛ é ɖe é byɔ́ hwiɖée hwɛ̌;
nǔgbó wɛ, étɔn mɛ jɛ́n é ná ví dó;
ɖǒ ayi te, é sixú nyí nǔ e nyí towe é ba ná yí wɛ é ɖe.
9É ɖɔ nú we ɖɔ: “Ali ɖagbe ɔ́ jí wɛ a ɖe.”
É ká ná yi cí zɔga, bó ná kpɔ́n nǔ e ná gbo we é.
10Ma nɔ yi ɖó xó te nú mɛ e sín ayi ma ɖo wɛn ǎ é ó;
mɛ e nɔ hwan wǔ, wǔ we lɛ́ɛ ɔ́,
sɔ́ tito towe lɛ́ɛ hwlá dó yě.
11Ma kan nǔkplɔ́nmɛ byɔ́ nyɔ̌nu ɖé
dó nyɔ̌nu e ɖo agba hwlɛ́n xá ɛ wɛ é wú ó;
ma ka kan nǔ byɔ́ xɛsinɔ dó ahwanfunfun wú ó;
ma kan nǔ byɔ́ nǔsatɔ́ dó nǔ e xɔ gbé é ja é wú ó;
ma ka kan nǔ byɔ́ nǔxɔtɔ́ dó nǔ e sa gbé è ja é wú ó.
Ma kanbyɔ́ gbɛtɔ́ wǔhwantɔ́ ɖɔ è nǐ dó nǔ e wa nú mɛ é sín kú a jí ó;
è ma ka kanbyɔ́ mɛ e ma nɔ kú nǔbláwǔ nú mɛ ǎ é ɖɔ è hɛn ɔ́, è nǎ nyɔ́ xomɛ a jí ó.
Ma kan nǔ byɔ́ fɔnlínnɔ dó azɔ̌ e ɖo te bɔ è nǎ wa é wú ó;
ma ka kanbyɔ́ azɔ̌watɔ́ e è nɔ sú xwe ɖokpó xɔ́ é ɖɔ hwetɛ́nu azɔ̌ tɔn ká ná fó dó a jí ó;
ma ka kan nǔ byɔ́ mɛsɛntɔ́ vɛ̌dónúnǔtɔ́ dó azɔ̌ nukúnɖéjí e é ɖó ná wa é wú ó.
Ma gán jɛ mɛ énɛ́ lɛ́ɛ wú gbeɖé
nú yě ɖe wě xá we ó.
12É nyɔ́ wa ɔ́, mɛ e ɖo gbejí nú Aklúnɔ é gɔ́n wɛ a nǎ nɔ́ yi tɛgbɛ;
a tunwun ganjí ɖɔ é ná wa nǔ mlɛ́ Aklúnɔ sɛ́n lɛ́ɛ,
lobo ka nɔ lin tamɛ hwi ɖɔhun;
ényí é má kpa we ǎ ɔ́, é ná nɔ aluwɛ towe mɛ xá we.
13Ɖe ji dó tito e gosín ayi towe mɛ lɛ́ɛ é wú,
ɖó nǔkplɔ́nmɛtɔ́ gbejí ɖě sɔ́ tíin zɛ wǔ tɔn ǎ.
14Nǔgbó wɛ, ayi nɔ gba kpá nú gbɛtɔ́ hú zǎncɔ́tɔ́ tɛ́nwe ɖěe è fɔ ɖó aga fí ɖé lɛ́ɛ é.
15Amɔ̌, ɖo tají ɔ́, byɔ̌ ɖo Mawu Ajalɔ̌nlɔn sí ɖɔ ní kplá we gbɔn nǔgbó li jí.
Sɛ́núnywɛ́ e sɔgbe é kpó ée má sɔgbe ǎ é kpó
16Cóbónú a nǎ bɛ́ azɔ̌ ɖěbǔ hǔn,
to jínjɔ́n ayǐ hwɛ̌ bó gbéjé kpɔ́n;
nɔ lin tamɛ kpɔ́n hwɛ̌ cóbó nɔ́ wa nǔ.
17-18Ayi gbɛtɔ́ tɔn sixú lílɛ́ kpan ta fí ɛnɛ:
nǔ ɖagbe kpó nyanya kpó, gbɛ kpó kú kpó;
lo ɔ́, nu jɛ́n nɔ́ ɖe gbeta kɛ́n lɛ́ɛ tɔ́n.
19Mɛ ɖé lɛ́ɛ syɛ́n ɖo nǔ kplɔ́n mɛ ɖěvo lɛ́ɛ mɛ;
lo ɔ́, yě ká nyí nǔ ɖěbǔwanú nú yěɖée ǎ.
20Xó víví ɖo mɛ ɖé lɛ́ɛ sín nu mɛ,
có mɛ lɛ́ɛ nɔ́ ɖe kɔ dó yě lobɔ yě nɔ́ ba nǔ bǐ kpo.
21Nǔgbó ɔ́, Aklúnɔ nɔ́ ná fɛ́nú tɔn yě ǎ;
nǔ e wú wɛ yě nɔ́ ba sɛ́ nǔnywɛ́ kpo bǐ gbídígbídí é nɛ́.
22Nǔnywɛ́tɔ́ ɖé lɛ́ɛ ɖe bó nɔ́ ví dó yětɔn kɛ́ɖɛ́ mɛ;
nú è kpɔ́n nǔ e yě nɔ́ ɖɔ lɛ́ɛ é mɛ ɔ́, nǔ e nɔ́ tɔ́n sín nǔnywɛ́ yětɔn mɛ é nyí nǔ ɖeji d'é wú.
23Lo ɔ́, gbɛtɔ́ nǔnywɛ́tɔ́ nɔ́ kplɔ́n nǔ togun tɔn,
bɔ nǔ e nɔ́ tɔ́n ɖo nǔnywɛ́ tɔn mɛ ɔ́ nɔ́ ná gǎnjɛwú mɛ nǔgbó nǔgbó tɔn.
24Nǔnywɛ́tɔ́ ɔ́, ɖɛ ná nɔ jǐ tɔn;
mɛ e mɔ ɛ lɛ́ɛ bǐ nɔ́ ɖɔ nǔ nyɔ́ n'i.
25Azǎn e gbɛtɔ́ ná nɔ gbɛ ná é bǐ ɔ́, nǔ xixa wɛ é nyí;
lo ɔ́, togun Izlayɛ́li tɔn tɔn ɔ́ ká ɖó vivɔ ǎ.
26Mɛ e nyí nǔnywɛ́tɔ́ ɖo togun tɔn mɛ é,
ná mɔ gǎnjɛwú mɛ lɛ́ɛ tɔn;
nyǐkɔ tɔn ná ɖo te tɛgbɛ.
Ɖu nǔ ɖó jlɛ̌ jí
27Vǐ ce, ɖo gbɛ towe hwenu ɔ́, tunwun hwiɖée;
kpɔ́n nǔ e má nyɔ́ nú we ǎ é, bó ɖe kɔ dó.
28Nǔgbó ɔ́, nǔ bǐ nyɔ́ nú mɛ bǐ ǎ,
lobɔ mɛ bǐ ká nɔ́ mɔ nǔ bǐ dó mɔ nǔ ɖagbe ǎ.
29Ɖɔ̌ nǔ e nyɔ́ lɛ́ɛ é kpɔ́n ɖó jlɛ̌ jí;
ma ka nɔ zɔn nǔɖuɖu jí hawun ó.
30Nǔgbó wɛ, nǔ ɖu dín sixú dó azɔn mɛ;
nǔ ɖu díngan nɔ dó azɔn adɔgo.
31Mɛ gěgé kú ɖó yě ɖu nǔ díngan wútu;
lo ɔ́, mɛ e ka nɔ cɔ́ éɖée é ɔ́ nɔ́ dɔ́ ji ɖésú.
Currently Selected:
Silaki ví 37: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.