Silaki ví 35
35
1Aklúnɔ sɛ́nxwi jí wa nǔ ɖó ɔ́, nǔ ɖokpó ɔ́ wɛ é nyí ɖi vɔ̌sánú gěgé sɔ́ xwlé ɖɔhun.
2Nǔzɔ́nmɛ Aklúnɔ tɔn wú tlɛ́ dó ɔ́, kɔnɖókpɔ́ sín vɔ̌sísá xwléxwlé ɖɔhun wɛ é cí.
3Ɖagbe wa nú mɛ ɔ́,
vɔ̌sánú e è sɔ́ linfín ɖagbe dó bló é há jí wɛ é ɖe.
4Nǔ ná wamamɔnɔ ɔ́,
vɔ̌sísá xwléxwlé dó kpa susu nú Aklúnɔ ɖɔhun wɛ é cí.
5Nǔ e nɔ́ nyɔ́ Aklúnɔ nukún mɛ é wɛ nyí ɖɔ è nǐ lɛ́ kɔ sín nǔ nyanya gúdo;
wǔ ɖó zɔ nú nǔgblégblé wiwa ɔ́,
nǔ ɖokpó ɔ́ wɛ é nyí xá vɔ̌sísá xwléxwlé bó ná dó mɔ hwɛsɔ́kɛmɛ yí.
6É ɖo mɔ̌ có, ma ka zɔn alɔgbá wá xwetɔ́n ɖo Aklúnɔ nukɔn ó.
7Nǔgbó wɛ, é zɔ́n vɔ̌sísá énɛ́ lɛ́ɛ bǐ mǐ.
8Vɔ̌sánú mɛ e nɔ wa nǔ ɖó nǔ ganjí é tɔn ɔ́,
vɔ̌sánú blɔ̌máɖowǔ ɔ́ nɛ́;
wǎn ɖagbe e é nɔ́ hwɛ́n é nɔ́ hun káká yi Ajalɔ̌nlɔn gɔ́n.
9 Vɔ̌sísá mɛ e nɔ wa nǔ ɖó nǔ ganjí é tɔn nɔ́ nyɔ́ Aklúnɔ nukún mɛ;
é ná wɔn ɖěe è nɔ fyɔ́ n'i ɖo vɔ̌sákpe jí é ǎ.
10Nyɔ̌ xomɛ hwenu e a ɖo susu kpa nú Aklúnɔ wɛ é;
ényí a ka wá ɖo jinukún nukɔntɔn e a ya ɖo gle towe mɛ lɛ́ɛ é ná xwlé wɛ hǔn,
ma gbo ɖě kpo ɖ'ayǐ nú hwiɖée ó.
11A ɖo vɔ̌sánú ná xwlé wɛ hweɖěbǔnu hǔn,
nukún towe ta ní nɔ́ hɔ́n;
sɔ́ wǒvlɔ́ɖó nyɔ̌ná towe lɛ́ɛ bǐ tɔn bó ná kpó xomɛhunhun kpó.
12Nǎ nǔ Ajalɔ̌nlɔn lě e éyɛ́ ná we gbɔn é;
nyɔ̌ xomɛ dó ná lě e hlɔ̌nhlɔ́n towe kpé wú gbɔn é.
13Nǔgbó wɛ, Aklúnɔ nɔ́ ná ɖěvo ɖó tɛn tɔn mɛ;
é ná ná we mɔ̌hunkɔtɔn donu tɛ́nwe.
Aklúnɔ ɔ́, hwɛɖɔtɔ́ hwɛjijɔnɔ wɛ
14Ma ba ná dɔn Aklúnɔ dó awo mɛ gbɔn nǔ ná ɛ jí ó; é nɔ́ ɖe kɔ dó yě.
15Ma gán jɛ vɔ̌ e a xo mɛ hízí bó dó sá é wú ó;
ɖó Aklúnɔ ɔ́, hwɛɖɔtɔ́ e má nɔ́ kpɔ́n wějí sín ninɔmɛ gbɛtɔ́ tɔn ǎ é wɛ é nyí.
16É nɔ́ dó hwɛ agɔ nú wamamɔnɔ ɖé ǎ,
lo ɔ́, é nɔ́ ɖótó ɖɛ mɛ e hwín dó do wɛ è ɖe gbɔn hwɛagɔdídó gbla mɛ é tɔn.
17É nɔ́ ɖe kɔ dó tɔ́cyɔvǐ e ɖo vo sa wɛ é,
abǐ asúkúsi e wá ɖo hwɛ jɛ wɛ é ǎ.
18È nɔ mɔ ɖasin e ɖo sisa wɛ gbɔn klɛ̌n jí nú asúkúsi é.
19É nɔ́ se hwɛ e jɛ wɛ é ɖe dó mɛ e dó avǐ n'i lɛ́ɛ wú é.
20Mɛ e nɔ sɛn Aklúnɔ ɔ́, Aklúnɔ ná yí i ganjí,
bɔ nǔbyɔ́byɔ́ tɔn ná hun káká yi sɛ́xwé.
21Nǔgbó wɛ, mɛ e ma ɖó xomɛ dó mɛɖé wú ǎ lɛ́ɛ é sín vosisa nɔ yi káká sɛ́xwé;
é nɔ́ nɔ te cóbó nɔ́ yi Aklúnɔ gɔ́n ǎ;
tlóló jɛ́n wɛ Mawu Ajalɔ̌nlɔn nɔ yí gbe n'i,
22hwɛ̌ cóbó nɔ́ dó hwɛjijɔ nú mɛ e nɔ wa nǔ ɖó ganjí lɛ́ɛ é;
é ná yí gbe zaanɖé din.
É ná kú hǔn ɖěbǔ dó mɛ e nɔ dó ya nú yě lɛ́ɛ é jí ǎ;
é ná lɔ́ gǒ mɛ e ma nɔ kú nǔbláwǔ nú mɛ ǎ lɛ́ɛ é.
23É ná ba hlɔn togun ɖě lɛ́ɛ;
é ná sú goyítɔ́ hwan énɛ́ ɔ́ sín kún dó,
bó ná gba acɛkpikpa mɛ nyanya lɛ́ɛ tɔn dó.
24Lě e mɛ ɖokpó ɖokpó wa nǔ gbɔn é
sín ajɔ wɛ Aklúnɔ ná dó e;
linlin e gbɛtɔ́ lɛ́ɛ ɖó é mɛ wɛ é ná kpɔ́n
bó ná dó gbéjé nǔwiwa yětɔn lɛ́ɛ kpɔ́n.
25É ná dó hwɛjijɔ nú togun tɔn;
é ná dó awǎjijɛ n'i gbɔn xomɛnyínyɔ́ tɔn gbla mɛ.
26Ɖo adǎngbomɛ hwenu ɔ́, xomɛnyínyɔ́ tɔn nɔ́ kɔn nyi ayǐ ganjí,
ɖi lě e jǐ nɔ́ ja akú hwenu é ɖɔhun.
Currently Selected:
Silaki ví 35: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.