Silaki ví 34
34
Dlɔ̌ lɛ́ɛ
1 Nǔ tófwe ɖó nukún nɔ́ flú mɛ e ma bí ǎ lɛ́ɛ;
dlɔ̌ lɛ́ɛ nɔ́ dó zozo lanmɛ nú nǔmanywɛ́tɔ́ lɛ́ɛ.
2Kɛ́n ɖó dlɔ̌ mɛtɔn lɛ́ɛ jí ɔ́,
yɛ ba ná wlí abǐ wezun kán ɖo jɔhɔn gúdo kpowun wɛ é nyí.
3Nǔgbó ɔ́ sín yɛ kpowun wɛ è nɔ mɔ sɛ́ dó ɖo dlɔ̌ lɛ́ɛ mɛ;
mɔ̌ ɖokpó ɔ́, lě e nukún mɛ mɛtɔn cí é wɛ è nɔ mɔ kpowun ɖo wěkpɛ́n mɛ.
4È ka sixú ɖe nǔ e nyí nǔ mímɛ́ é sín nǔ e kúji é mɛ a?
È sixú ɖe nǔgbó sín adingban mɛ a?
5Nǔ mɔ sɛ́ dó nukɔn bo ɖɔ tɔ́ sín xó lɛ́ɛ ɔ́, nǔ e ɖo nukɔn mɛ bo ja é,
dlɔ̌ lɛ́ɛ ɔ́, wuntun kpowun wɛ yě nyí;
nǔ énɛ́ ɖěbǔ ɖo akwɛ́ ɖé jí ǎ;
nyɔ̌nu e ɖo wǔvɛ́ mɔ wɛ ɖo ajidonu ɔ́ sín ayi nɔ lin nǔ ɖokpó ɔ́ lɛ́ɛ.
6Ma sɔ́ ayi towe ɖ'é jí ó, afi nú Mawu Ajalɔ̌nlɔn ɔ́ wɛ sɛ́ yě dó.
7Nǔgbó wɛ, dlɔ̌ lɛ́ɛ flú gbɛtɔ́ gěgé, bɔ mɛ e ɖi nǔ nú yě lɛ́ɛ é nɔ́ xo nǔ kpo.
8Wa ɖ'é jí Aklúnɔ sɛ́n ɔ́ tɔn ká ɖo zɔ nú adingban énɛ́ lɛ́ɛ bǐ;
Sɛ́núnywɛ́ nǔvɔɖéwú ɔ́, mɛ e ɖo gbejí lɛ́ɛ é sín nu mɛ wɛ é nɔ́ ɖi gbe ɖe.
Tomɛ yiyi ka jɛ xá mɛ
9Mɛ e nɔ yi tomɛ sukpɔ́ é nɔ́ nyɔ́ nǔ gěgé;
mɛ e ko mɔ nǔ kpɔ́n é nɔ́ ɖɔ nǔnywɛ́ sín xó.
10Mɛ e ma ji ya kpɔ́n ǎ é nɔ́ tunwun nǔɖé vo káká ǎ;
11lo ɔ́, mɛ e yi tomɛ é nɔ́ nyɔ́ nǔ gěgé bló.
12Hwenu e un ɖo tomɛ tomɛ gbɔn wɛ é ɔ́,
un mɔ nǔ gěgé,
bɔ nǔ e mɛ un mɔ nǔ jɛ é zɛ nǔ un sixú ɖɔ é wú.
13Hwɛhwɛ ɔ́, un nɔ jɛ kúgan mɛ;
lo ɔ́, un ka nɔ gán ɖó nyɔ̌wa ce wú.
Sísí ɖó nú Aklúnɔ
14Mɛ e nɔ sí Aklúnɔ lɛ́ɛ ná dɔ́ ji ɖésú,
15ɖó yě gán jɛ mɛ e sixú hwlɛ́n yě gán é wú.
16Mɛ e nɔ sí Aklúnɔ é sɔ́ nɔ́ ɖi xɛsi dó nǔ ɖěbǔ wú ǎ;
é nɔ́ sísɔ́ avuvɔ gbeɖé ǎ, ɖó é wɛ nyí nukúnɖíɖó tɔn bǐ.
17Nyɔ̌nánɔ wɛ nyí mɛ e nɔ sí Aklúnɔ é!
18Mɛ̌ wú wɛ é ná gán jɛ? Mɛ̌ wɛ ná dó alɔ ɛ?
19Aklúnɔ sín nukún ɖo mɛ e yí wǎn n'i lɛ́ɛ é jí;
é nɔ́ sɔ́ nǔwúkpíkpé tɔn dó nya xɛ ɖo yě jí;
é nɔ́ hɛn sɔ yě titewungbe tɔn;
bibɛtɛn wɛ Aklúnɔ ɔ́ ká nyí bɔ jɔhɔn syɛ́nsyɛ́n nɔ́ wá gba d'é wú;
é nɔ́ ná yɛtɛn fí e è nǎ yí jɔ ɖe hwemɛ cíɖíɖí é;
é nɔ́ cyɔ́n alɔ xɔ́ntɔn tɔn lɛ́ɛ jí ɖo gbɛwúvɛ́ mɛ;
é nɔ́ lɔn nú yě nɔ́ j'ayǐ ǎ.
20É nɔ́ ná akɔ́nkpinkpan, é nɔ́ zɔ́n bɔ nukún ta nɔ́ za wě;
é nɔ́ ná lanmɛsyɛ́nsyɛ́n, gbɛ kpódó ɖɛ kpó.
21Kanlin e è sló alɔ dó gǔdo nú mɛ bo yí é sɔ́ xwlé Aklúnɔ ɔ́, Aklúnɔ cá ko wɛ é nyí.
22Mɛ e ma nɔ́ nɔ sɛ́n tɔn lɛ́ɛ jí ǎ é ɔ́,
Mawu Nǔbǐwúkpétɔ́ ɔ́ nɔ́ yí nǔníná yětɔn lɛ́ɛ ǎ.
23Mɛ e nɔ gbɛ́ wǎn n'i lɛ́ɛ sín nǔníná nɔ́ nyɔ́ nukún tɔn mɛ ǎ;
é nɔ́ sɔ́ hwɛ kɛ mɛ ɖó kanlin nabí e è nǎ é wú ǎ.
24Wamamɔnɔnú lɛ́ɛ dó xwlé vɔ̌sísá ná ɔ́ nɔ́ cí gbe gbo nú vǐ ɖo tɔ́ tɔn nukún mɛ ɖɔhun.
25É nɔ́ fá cóbɔ wamamɔnɔ lɛ́ɛ nɔ́ mɔ nǔɖé dó hɛn gbɛ ɖó te ná ǎ;
mɛ e tɛ nǔɖuɖu yě ɔ́, mɛhutɔ́ wɛ.
26Nǔ e ɖo nɔzo mɛtɔn sí
bɔ é ná dó hɛn gbɛ ɖó te é yí sín así tɔn ɔ́, huhu i wɛ;
akwɛ́ tɛ azɔ̌watɔ́ ɔ́, hun zé kɔn nyi ayǐ wɛ.
27Hun gba kɔn nyi ayǐ wɛ nyí akwɛ́ tɛ azɔ̌watɔ́.
28Nǔgbó wɛ, mɛɖé nɔ́ ɖo tito wɛ,
bɔ mɛ ɖěvo nɔ ɖo hinhɛn gba wɛ;
étɛ́ wɛ yě ká nɔ́ sɔ́ ɖ'é mɛ? Akpɔ kɛ́ɖɛ́.
29Mɛ ɖě nɔ́ ɖo ɖɛ xo wɛ,
bɔ mɛ ɖěvo ká nɔ ɖo nu dó mɛ wɛ;
mɛ̌si ɔ́ ká ná ɖótó mɛ e ɖo ɖɛ xo wɛ é.
30Mɛ e ɖó alɔ mɛkúkú wú bó yi slá wǔ,
bó ká lɛ́ wá ɖ'alɔ wú ɖěvo é ɔ́,
étɛ́ li nu wǔ e é slá ɔ́ ká nɔ n'i.
31Nǔ ɖokpó ɔ́ wɛ é nyí nú mɛ e blá nu bó ná dó mɔ hwɛ tɔn lɛ́ɛ sín sísɔ́kɛ yí é;
nú é yi lobo ka lɛ́ jɛ hwɛ ɖokpó lɛ́ɛ hu jí ɔ́,
mɛ̌si ɔ́ ná ɖótó vosisa tɔn ǎ;
hwɛgbeyíyí tɔn nɔ nǔɖé kanta n'i ǎ.
Currently Selected:
Silaki ví 34: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.