Silaki ví 33
33
1Mɛ e nɔ sí Aklúnɔ ɔ́, nǔ nyanya ɖé nɔ́ jɛ jǐ tɔn ǎ;
é nyɔ́ wa ɔ́, é ná gán ɖo adǎngbomɛ ɖésú mɛ.
2Nǔnywɛ́tɔ́ sixú ɖe kɔ dó Aklúnɔsɛ́n ǎ,
lo ɔ́, mɛ e nɔ wa yɛ ɖɔ émí ɖo xwixwedó e wɛ ɔ́ cí tɔjíhún ɖo jɔhɔn tɛ́ntin ɖɔhun.
3 Gbɛtɔ́ nǔnywɛ́tɔ́ nɔ́ ɖeji dó Aklúnɔsɛ́n ɔ́ wú;
nǔ sɔgbe ɖésú wɛ é nyí n'i ɖi xógbe vɔ̌sánú-xwlémawutɔ́ ɖé tɔn ɖɔhun.
Gǔgútɔ́ kpódó mɛkotɔ́ kpó
4Ényí a jlǒ ɖɔ mɛ ɖě lɛ́ɛ ní ɖótó we hǔn,
nǔ e ɖɔ gbé wɛ a ja é ɔ́, bo sɔ́ nǔ tɔn ganjí;
flín nǔ e a ko tunwun é bǐ hwiɖée cóbó ná xósin mɛ.
5Ninɔmɛ xlonɔ tɔn kpó linlin tɔn kpó nɔ́ ɖo hǔzuhúzú wɛ hwebǐnu;
yě nɔ́ lílɛ́ mɔ̌to sín afɔ lɛ́ɛ ɖɔhun.
6Xɔ́ntɔn mɛkotɔ́ ɔ́ cí sɔ́ e hweɖěbǔnu e sɔ́xátɔ́ kó jínjɔ́n jǐ tɔn ɔ́, é nɔ́ ɖo xó sú wɛ é ɖɔhun.
Vogbingbɔn ɔ́, nǔ wɛ é nyí bɔ Mawu yí wǎn ná
7Azǎn e kó ɖo xwe mɛ é bǐ jí wɛ hwesivɔ́ nɔ́ ná wěziza tɔn dó;
étɛ́ wú azǎn ɖě ká nyí nukúnɖéjí hú ɖě?
8Ɖó Aklúnɔ ɔ́ lin ɖɔ yě gbɔn vo nú yěɖée, bo dó zé hwenu tají ɖé lɛ́ɛ ɖó te nú xwezán lɛ́ɛ.
9É ɖó kɛ́n azǎn ɖé lɛ́ɛ jí, lobo sɔ́ ɖó te nú éɖée;
é wá sɔ́ azǎn ɖé lɛ́ɛ dó ɖó azǎn kpaa ná.
10Mɔ̌ wɛ gbɛtɔ́ bǐ nyí afúntúntún é nɛ́;
kɔ́ wɛ é kán bó dó bló Adámu ná;
11é ɖo mɔ̌ có, Aklúnɔ ɔ́,
ɖo nǔnywɛ́ tɔn kpligidi ɔ́ mɛ ɔ́,
é ba ɖɔ yě ní ká gbɔn vovo;
é kplá yě gbɔn ali vovo xo.
12É xo ɖɛ dó mɛ ɖé lɛ́ɛ jí, lobo dɔn yě yi hǎga jí;
é ɖe mɛ ɖěvo lɛ́ɛ ɖó vo nú yě ná bɔ dó wǔ tɔn kɛ́nnɛ́kɛ́nnɛ́;
é ká dó nu mɛ ɖé lɛ́ɛ,
é sɔ́ yě hwe,
lobo sɛ do nú yě.
13Lě e ko ɖo zɛ̌nmɛtɔ́ lɔ mɛ,
bɔ é wa azɔ̌ tɔn lě e é jló gbɔn é ɔ́,
mɔ̌ ɖokpó ɔ́ wɛ gbɛtɔ́ bǐ ɖo mɛ e ɖó yě ɔ́ sín alɔ mɛ é nɛ́;
bɔ é nɔ́ ná nǔ e jló e é mɛ ɖokpó ɖokpó.
14Fí e nǔ nyanya ɖe ɔ́, nǔ ɖagbe lɔ ɖo fínɛ́;
fí e kú ɖe ɔ́, gbɛ lɔ ɖo fínɛ́;
mɔ̌ ɖokpó ɔ́, fí e mɛ lɛ́ɛ ɖo gbejí nú Aklúnɔ ɖe ɔ́,
mɛ nyanya lɛ́ɛ lɔ ɖo fínɛ́.
15Bo nyi kɔ bo kpɔ́n nǔ e Mawu Nǔbǐwúkpétɔ́ wa lɛ́ɛ é bǐ sésé;
nǔ lɛ́ɛ bǐ wɛ ɖo webɔ webɔ,
bɔ ɖě sɔgbe xá ɖě.
Azɔ̌watɔ́ ɔ́ lin tamɛ dó azɔ̌ tɔn wú
16Nyɛ ɔ́, gǔdo wɛ un gbɔn bo wá azɔ̌ wa gbé,
ɖi mɛ e nɔ cyán vǐwun ɖo vǐwungbo mɛ
hwenu e è gbɛ vǐwun wá yi gǔdo é ɖɔhun;
17lo ɔ́, un nya hwenu e un gbɔ é wlí ɖo ɖɛ e Aklúnɔ xo nú mì é mɛ,
bɔ vǐwun-yatɔ́ ɖɔhun ɔ́, xasun ce lɛ́ɛ ɖésú gɔ́.
18Nǔ e mɛ mǐ ɖó ná mɔ nǔ jɛ é ɖíe:
un wa azɔ̌ nú nyɛ ɖokpónɔ géé ǎ,
lo ɔ́, mɛ e ko ɖo nǔtunwuntunwun gbé mɛ lɛ́ɛ bǐ sésé tamɛ wɛ un bló dó.
Mɛɖékannumanɔ
19Mi tonukún lɛ́ɛ kpódó mi agunnukɔntɔ́ lɛ́ɛ kpán e mi, mi ɖótó mì ganjí.
20Ma nú vǐ towe, asi towe, nɔví towe abǐ xɔ́ntɔn towe kpa acɛ ɖěbǔ nú we ɖo gbɛ hwenu towe ó;
ma sɔ́ dɔkun towe lɛ́ɛ nú mɛɖé ó;
é sixú wá vɛ́ nú we lobɔ a sixú lɛ́ wá yi ja yě byɔ́ gbé.
21Hwenu e a kpo ɖo gbɛ bɔ funfún towe kpo ɖo dǐndín wɛ é ɔ́,
ma yí gbe nú mɛ ɖěbǔ yí tɛn towe mɛ ó.
22Nǔgbó ɔ́, a nǎ nǔ vǐ towe lɛ́ɛ ɔ́, é nyɔ́ hú ɖɔ a byɔ̌ nǔ yě.
23Tɛ́nkpɔ́n bó ɖu ɖo hwiɖée jí,
ɖo nǔ e a ko sixú nɔ́ wa lɛ́ɛ é bǐ mɛ,
lobo ma sɔ́ hwiɖée kɔn nyi ayǐ ó.
24Gbɛ towe sín vivɔnu ɖo kú towe hwenu wɛ a ɖǒ ná má gǔ e a jǒ dó é.
Nɛ̌ mɔ̌ wɛ è nǎ wa kannumɔ lɛ́ɛ sín nǔ gbɔn?
25Gběhan xúxú, kpo dó mɛ lɛ́ɛ, agban dó nú mɛ lɛ́ɛ ɔ́,
tócí wɛ yě jɛ xá; nǔbaɖu, tódɔnnúmɛ, azɔ̌wiwa, kannumɔ wɛ yě ɖe ná.
26Ényí a nɔ zɔ́n azɔ̌ kannumɔ towe ɔ́, a nǎ vo;
ényí a ka jó e dó bɔ é ná nɔ́ wa nǔ e jló e ɔ́, é ná ba ná hɔn yi.
27Agban kpódó kan kpó bǎ kpán wɛ è nɔ dó sí kɔ do nú nyibú;
gbɛwúvɛ́ kpó bǎ kpó wɛ nɔ́ wa mɛsɛntɔ́ nyanya sín nǔ.
28Sɛ́ ɛ dó azɔ̌ gbé bónú é má nɔ ayǐ nǔɖé má wa mɛ vo ó.
29Nǔgbó wɛ, ényí mɛɖé má ɖo nǔɖé wa wɛ ǎ ɔ́, é nɔ́ kplɔ́n nǔ nyanya gěgé.
30Ná ɛ azɔ̌ ní wa, ɖó nǔ e wú wɛ è ɖǒ e é nɛ́;
ényí é má se tónú ǎ hǔn, dǒ wlɔ afɔ tɔn lɛ́ɛ;
nǔ ká ɖo mɔ̌ có, ma hɛn mɛɖé syɛ́nsyɛ́n dín ó,
ma ka wa nǔ ɖěbǔ nú é gbɔn vo nú hwɛjijɔ ó.
31Ényí kannumɔ ɖokpó jɛ́n ká ɖo así towe hǔn,
hɛn ɛ ganjí hwi ɖésú ɖɔhun, ɖó akwɛ́ wǒsúwósú wɛ a dǒ xɔ ɛ ná.
Ényí kannumɔ ɖokpó jɛ́n ká ɖo así towe hǔn,
hɛn ɛ nɔví towe ɖɔhun;
nǔgbó ɔ́, nǔ tɔn hu dó we lě e gbɛ towe nú hu dó we gbɔn é ɖɔhun.
32Ényí a ɖo nǔ tɔn wa nyi do wɛ, bónú é hɔn yi ɔ́,
33nɛ̌ wɛ a nǎ ba ɛ gbɔn?
Currently Selected:
Silaki ví 33: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.