Silaki ví 28
28
1Mɛ e nɔ ba hlɔn lɛ́ɛ ɔ́, Aklúnɔ ná ba hlɔn yě wú;
é nɔ́ sɔ́ hwɛ yětɔn lɛ́ɛ bǐ sín kɛ́n.
2 Nǔ e nɔzo towe wa nyi do nú we lɛ́ɛ ɔ́, sɔ́ yě kɛ ɛ;
énɛ́ ɔ́, a sa vo nú Aklúnɔ ɔ́, é ná sɔ́ hwɛ towe lɛ́ɛ kɛ we.
3Ényí a sin xomɛ dó mɛɖé bó hɛn ma jó ɔ́,
nɛ̌ wɛ a ka sixú glá bó byɔ́ Aklúnɔ ɖɔ é ní gbɔ azɔn nú émí gbɔn?
4A nɔ kú nǔbláwǔ nú gbɛtɔ́ towe ɖɔhun lɛ́ɛ ǎ;
nɛ̌ wɛ a sixú sa vo bo byɔ́ sísɔ́kɛ hwɛ towe ɖésú lɛ́ɛ tɔn gbɔn?
5Hwi mɛ e nyí gbɛtɔ́ kpowun é ɔ́, a nɔ hɛn nɔzo towe xomɛ;
mɛ̌ wɛ ka sixú mɔ hwɛ towe lɛ́ɛ sín sísɔ́kɛ yí nú we?
6Flín hwenu e gbɛ towe ná vɔ é bó jó kɛn dó;
flín kúzán gbe towe; flín ɖɔ a nǎ kú bó nyɔ,
lobo nɔ gbejí nú Aklúnɔsɛ́n lɛ́ɛ.
7Flín sɛ́n énɛ́ lɛ́ɛ lobo ma hɛn nɔzo towe xomɛ ó.
Flín akɔ e Ajalɔ̌nlɔn jɛ xá we é, lobo wɔn nǔ nyanya e è wa nú we é.
Jlɛɖiɖɔ
8Hɔn nú jlɛɖiɖɔ bó ná dó gɔn hwɛ gěgé hu;
nǔgbó ɔ́, mɛ e nɔ ɖo adǎn jí tɛgbɛ lɛ́ɛ é nɔ́ dɔn tagba nyi ayǐ.
9Mɛ nyanya lɛ́ɛ nɔ́ dɔn hunnyahunnya dó xɔ́ntɔn lɛ́ɛ tɛ́ntin;
yě nɔ́ klán mɛ e ɖo vivo mɛ fɛɛ lɛ́ɛ é.
10Lě e è dǒ nakí adomɛ gbɔn ɔ́ wɛ é nɔ́ ji gbɔn;
lě e jlɛ ɔ́ lín gbɔn ɔ́ wɛ é nɔ́ syɛ́n gbɔn;
lě e mɛɖé kpé nǔ wú gbɔn ɔ́ wɛ é nɔ́ jɛ adǎn gbɔn.
Lě e mɛɖé jɛ dɔkun gbɔn é ɔ́, lě e xomɛsin tɔn ná nɔ é nɛ́.
11Tɛndo ɖokpó mɛ jlɛ ɔ́, zo wɛ é nɔ́ flɔ́;
xomɛsinsin e wá ɖo nukúnxwixwe ɖokpó mɛ é ɔ́, hun wɛ é nɔ́ kɔn nyi ayǐ.
12Fún funfún dó myɔkán, énɛ́ ɔ́, é ná wlí;
tún atán d'é jí, énɛ́ ɔ́, é ná cí.
Nu towe ka hɛn ɔ́, é ná wa nǔ we lɛ́ɛ.
Xó gblégblé lɛ́ɛ hɛn ɔ́, yě ná hɛn nǔ gěgé gblé
13 Nǔwláɖɔtɔ́ kpó gbɛtɔ́ tófwe ma ɖó jiɖiɖe d'é wú lɛ́ɛ kpán ɔ́, è ɖǒ ná dó nu yě;
yě hɛn mɛ e ɖo vivo mɛ fɛɛ lɛ́ɛ é gěgé bú.
14Mɛnúɖɔtɔ́ lɛ́ɛ hɛn gbɛtɔ́ gěgé fúnlɛ̌n;
yě zɔ́n bɔ yě tún to;
yě gba to e è dǒ ajakpá ná ganjí lɛ́ɛ é kíjá,
lobo sɔ́ mɛ nukúnɖéjí gěgé sín hɛ̌nnu kɔn nyi ayǐ.
15Mɛnúɖɔtɔ́ lɛ́ɛ ɖe nyɔ̌nu akɔ́nkpantɔ́ gěgé sín asúxwé;
nǔ e yě dó gǎn bó mɔ lɛ́ɛ é ɔ́, yě yí bǐ sín yě sí.
16Ayi sɔ́ sixú jɛ ayǐ nú mɛ e nɔ ɖótó mɛnúɖɔtɔ́ lɛ́ɛ é ǎ;
é sɔ́ sixú nɔ vivo mɛ fɛɛ ǎ.
17Bǎ sɛ́n nú mɛ ɖokpó lě nɔ́ ɖó wuntun mɛ wú;
lo ɔ́, xó gblówunkan ɖokpó lě ɖiɖɔ nɔ́ gba xú nú mɛ.
18Mɛ gěgé kú ɖo ahwangbénu;
lo ɔ́ nǔ nyanya nɔ lɛ́ hu mɛ hú gǎn mɔ̌.
19Nyɔ̌nánɔ wɛ nyí mɛ e ma jɛ mɔ yětɔn mɛ ɖě ǎ lɛ́ɛ,
lobo ka kpé wú bó gló xomɛsin yětɔn lɛ́ɛ é.
Nǔ lɛ́ nyɔ́ mɔ̌ nú mɛ e ma dó ta agban yětɔn mɛ kpɔ́n ǎ lɛ́ɛ,
lobɔ gantɔ́wlɔ yětɔn má jɛ alɔ ná kpɔ́n ǎ lɛ́ɛ é;
20ɖó agban nǔnyanyawatɔ́ tɔn ɔ́, gan kɛ́ɖɛ́ wɛ,
lobɔ gantɔ́wlɔ yětɔn ká nyí ganvɔ.
21Kú e yě nɔ́ dɔn wá kplá mɛ é syɛ́n dín;
è gbɔ bo nɔ mɛkúkú sín tomɛ ɔ́, é kpé hú.
22Lo ɔ́, mɛnúɖɔtɔ́ lɛ́ɛ sixú wa nǔ ɖěbǔ nú mɛ e ɖo gbejí nú Aklúnɔ lɛ́ɛ é ǎ;
zo yětɔn nɔ́ sixú fyɔ́ yě ǎ.
23É nyɔ́ wa ɔ́, mɛ e ka lɛ́ kɔ sín Aklúnɔ gúdo lɛ́ɛ é ná jɛ bǎ yětɔn nu;
gbɛtɔ́ mɛnúɖɔtɔ́ lɛ́ɛ sín zo ná ɖo flɔ́flɔ́ tɛgbɛ ɖo mɛ énɛ́ lɛ́ɛ gɔ́n;
yě ná bɔ ɖó nú yě kinnikínní jawuntá ɖɔhun, yě ná tlɛ́n yě kpɔ ɖɔhun.
24-25Ényí a tun atín wunnɔ lɛ́ dó gle towe hǔn,
bo dó agǎságo nú nu hwi ɖésúnɔ tɔn lɔmɔ̌;
ényí a nɔ wlíbo nú akwɛ́ towe kpódó siká towe kpó ganjí hǔn,
bo cɔ́ hwiɖée ɖo xóɖiɖɔ lɔmɔ̌ mɛ,
lobo ka nɔ gbéjé xókwín towe lɔmɔ̌ kpɔ́n ganjí.
26Wlǐ d'é mɛ! Ɖɛ̌ towe má zɔ́n nú a ɖǐɖí nǔ ó;
é má nyí mɔ̌ ǎ ɔ́, a nǎ jɛ mɛ e ɖo mɔ ɖó nú we wɛ é sín alɔ mɛ.
Currently Selected:
Silaki ví 28: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.