Silaki ví 29
29
Nǔ hwé nú nɔzo mɛtɔn
1 Mɛ e nɔ nyɔ́ xomɛ dó wamamɔnɔ lɛ́ɛ wú é ɖó ná hwé nǔ nú nɔzo tɔn lɔmɔ̌.
Mɛ e wá dó alɔ ɛ é se tónú nú nǔzɔ́nmɛ Mawu tɔn lɛ́ɛ.
2Yǐ gbe bo hwé nǔ nú nɔzo towe hwenu é ɖo hu dó tɔn mɛ é;
hwɛ ɔ́, sɔ́ nǔ e è hwě nú we é jó dó hwe tɔn nu.
3Nɔ ɖe akpá e a dǒ lɛ́ɛ é, énɛ́ ɔ́, mɛ lɛ́ɛ ná ɖeji dó wǔ we;
a nǎ nɔ́ mɔ nǔ e hu dó we lɛ́ɛ é hwebǐnu.
4Gbɛtɔ́ gěgé nɔ́ mɔ nǔ hwǐhwé dó mɔ nǔ mɔ sɔ́ e è sixú hɛn é;
wǔvɛ́ dó nú mɛ e d'alɔ mɛ é wɛ é nyí.
5Cóbónú mɛ lɛ́ɛ ná mɔ nǔ bó nya ɔ́,
yě nɔ́ ɖíɖɔ́ wǔ nú mɛ e ja nǔ ɔ́ nya nú yě gbé é hwɛ̌;
yě nɔ́ ɖó lě e nǔ ɖo yě sí gbɔn é hǎ kpódó sísí kpó;
lo ɔ́, súsú hwenu wá su ɔ́, yě nɔ́ sɛ azǎn ɔ́ dó nukɔn;
nǔbláwǔxó kɛ́ɖɛ́ wɛ yě nɔ́ ɖɔ, bó nɔ́ dó hwɛ hwenu ɔ́.
6Ényí mɛ e byɔ́ nǔ nya é sixú sɔ́ jó dó hwetɔnnu ɔ́,
afɔ wɛ ná nyɔ́ bɔ nǔnyanúmɛtɔ́ ɔ́ ná yí vlɔ̌ɖówe;
é ɖó ná lin ɖɔ émí ɖó ta ɖagbe;
nǔ má nyí mɔ̌ ǎ ɔ́, é ná xo e gba fún,
bɔ é ná lɛ́ xɔ kɛn ma ɖó ayi tɔn;
nudómɛ kpódó jlɛ kpó wɛ ná nyí axɔ́ e é ná sú i é;
susu wɛ jɛ xá ɖɔ è nǐ ná ɛ; lo ɔ́, kɔ wɛ è ka wá ɖe dó e.
7Nǔ e wú wɛ gbɛtɔ́ gěgé nɔ́ gbɛ́ nǔ nya nú mɛ é nɛ́;
yě nɔ́ gbɛ́ ɖó hunnylánylá wú ǎ;
lo ɔ́, yě nɔ́ ɖi xɛsi ɖɔ è táá wá bɛ́ nǔ e ɖo émí sí lɛ́ɛ sín émí sí ma sín nǔɖé wú.
Nǎ nǔ wamamɔnɔ
8É ɖo mɔ̌ có ka ɖó sɔxwixwe xá gbɛtɔ́ ayiɖowɛnnánɔ lɛ́ɛ;
ma ɖó yě te dín cóbó zé nǔɖé nú yě ó.
9Bó ná dó se gbe nú Mawusɛ́n ɔ́ hǔn bó d'alɔ wamamɔnɔ lɛ́ɛ;
yě ɖo hu dó tɔn mɛ, bó má nyi yě asígbá alɔgbá ó.
10Yǐ gbe bó zán akwɛ́ towe dó nɔví towe kpó xɔ́ntɔn towe kpó wú;
ma jó akwɛ́ towe nyi nǔglɔ́ fí ɖé ní jɛ ko ó, é ná dɔn.
11Zǎn dɔkun towe lɛ́ɛ lě e Mawu jló gbɔn é;
énɛ́ ɔ́ xɔ akwɛ́ nú we hú siká.
12Ɖagbe e a wa nú wamamɔnɔ lɛ́ɛ é ní nyí dɔkun nú we,
yě ná nya xɛ ɖo jǐ towe ɖo nǔ nyanya bǐ mɛ.
13Hwenu e kɛntɔ́ ná wá tɔ́n ahwan we ɔ́,
yě ná fun ahwan nú we bɔ é ná kpa we hú gǎglónú, hú gǎ kpinkpɛn.
Mɛ ɖě lɛ́ɛ sín axɔ́ yí ɖó ta
14Gbɛtɔ́ xomɛɖagbenɔ ná yí gbe bó yí axɔ́ e nɔzo tɔn ɖu é ɖó ta;
lo ɔ́, mɛ e ma hwɛ́n mɛjɔmɛ ɖěbǔ ǎ é nɔ́ ɖe ta sín mɛ.
15Ényí mɛɖé yí gbe bó yí axɔ́ towe ɖó ta hǔn, bo kpa xomɛnyínyɔ́ n'i;
nǔgbó ɔ́, tɛn towe mɛ wɛ é yí gbe ɖó.
16Gbɛtɔ́ nyanya nɔ́ zán mɛ e yí gbe bó ná sú axɔ́ e è ɖu lɛ́ɛ ɖó tɛn tɔn mɛ é sín nyɔ̌ná lɛ́ɛ dó akpa mɛ.
17Wunhɔ́nmɔ́nɔ nɔ́ ɖe kɔ dó mɛ e hwlɛ́n ɛ gán é.
18É ɖo mɔ̌ có, gbe yí bó dó ta axɔ́ e mɛ ɖěvo ɖu é nu bó sú ɔ́ hwín gbɛtɔ́ ayijlɔ́jlɔ́nɔ gěgé dó do;
é dán yě ɖésú lě e xu nɔ xo gbɔn é ɖɔhun.
Gbɛtɔ́ klogǎnklogǎn gěgé tún to, bó húzú dějɛdějɛ ɖo akɔta jǒnɔ lɛ́ɛ tɛ́ntin.
19Gbɛtɔ́ nyanya e hwlɛndó bó ɖe gbeta tɔ́n ɖɔ émí ná yí axɔ́ e mɛ ɖě lɛ́ɛ ɖu é ɖó ta ɖó nǔɖé ná tɔ́n ɖ'é mɛ n'i wú é ɔ́,
è nǎ ɖó hwɛ n'i tlóló ɖo hwɛɖɔtɛn.
20Hlɔ̌nhlɔ́n e ɖo wǔ we ɔ́ wɛ a nǎ kpɔ́n dó dó alɔ nɔzo towe;
lo ɔ́, ka cɔ́ hwiɖée ɖésú bó má wá yi jɛ ɖɔ mɛ ó.
21Nǔ e jɛ nukɔn bó ɖo dandan bɔ gbɛtɔ́ ɖó ná mɔ bó ná dó nɔ gbɛ é wɛ nyí: sin, nǔɖuɖu, avɔ kpódó xwé kpó.
Xwé ɔ́ wɛ ká nɔ́ zɔ́n bɔ è nɔ bú wǎn dó mɛ ɖěvo lɛ́ɛ.
22Wamamɔnɔyíninɔ ɖo xɔ kíjá mɛ nyɔ́ hú nǔjɔnǔ ɖuɖu ɖo mɛ ɖěvo xwé.
23Ényí nǔ kpɛɖé abǐ gěgé tɔn wɛ a ɖǒ hǔn, ní bó kpé we;
énɛ́ ɔ́, mɛɖé sɔ́ ná ɖe do nú we ɖɔ a kún nyí xwéví ó ǎ.
24Xwé xa ɖó afɔ wú ɔ́, nǔbláwǔ ɖésú wɛ;
a sixú kɛ nu ǎ, ɖó a ɖo xwé towe gbe ǎ.
25A ɖo nǔɖuɖu ná mɛ wɛ, bó lɛ́ ɖo sin xwlé mɛ wɛ,
bɔ mɛ ɖěbǔ ká nɔ́ dó gbe tɔn we ǎ;
é nyɔ́ wa ɔ́, xó e ná dó akpɔ xomɛ nú we lɛ́ɛ kɛ́ɖɛ́ wɛ a nɔ se.
26“Wǎ fí alitanu! Tɛ́ távo! Nǔɖé ɖo así towe hǔn, nǎ mì má ɖu!
27Sɛ yi zɔ dɔ̌n alitanu! Mɛ nukúnɖéjí ɖé ná yí wɛ un ɖe;
nɔví ce ná wá, un ɖo xwé ɔ́ ba wɛ.”
28Mɛ e nyɔ́ nǔ i ganjí ɔ́, nú hɛ̌nnumɔ tɔn lɛ́ɛ wá ɖo xó ɖɔ dó wǔ tɔn wɛ,
bó gbɛ́ wǎn n'i ɖó é nɔ́ nya akwɛ́ nú mɛ wú ɔ́, gbe yí ná nɔ́ vɛ́ wǔ n'i.
Currently Selected:
Silaki ví 29: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.