Silaki ví 21
21
È nǐ hɔn nú hwɛ
1Vǐ ce, ényí a hu hwɛ hǔn,
ma lɛ́ vɔ́ ɖěvo bló ó,
bó ká byɔ́ hwɛ e a hu lɛ́ɛ sín sísɔ́kɛ.
2Hɔn nú hwɛ ɖi lě e è nɔ hɔn nú dan gbɔn é ɖɔhun;
nú a sɛkpɔ́ ɛ ɔ́, é ná xú aɖǔ we.
Hwɛ ɖó aɖǔ ɖi kinnikínní ɖú ɖɔhun,
bɔ yě nɔ́ hu gbɛtɔ́.
3Tónú má se nú sɛ́n Aklúnɔ tɔn bǐ wɛ cí dɛnkpe nuwenɔ ɖɔhun;
é dó akpa mɛ wú ɔ́, è nɔ sixú gblé ǎ.
4Adǎnjijɛ kpó goyíyí kpó nɔ́ sú kún dó nú dɔkun.
Mɔ̌ wɛ goyítɔ́ sín xwé ná sú kún dó ɔ́ nɛ́.
5 Ényí wamamɔnɔ ɖé xo ɖɛ ɔ́,
Aklúnɔ nɔ́ se gbe tɔn,
bó nɔ́ ɖɔ hwɛ tɔn dó yǐyá jí.
6Mɛ e nɔ gbɛ́ nǔ ɖɔ dó nǔ wú nú mɛ é nɔ́ ɖi zɔnlin gbɔn mɛ nyanya lɛ́ɛ sín afɔ jí,
lo ɔ́, mɛ e nɔ sí Aklúnɔ é ɔ́,
hwɛ tɔn lɛ́ɛ nɔ́ vɛ́ n'i tlítlí yi ayi mɛ.
7Mɛ e nyɔ́ xó ɖɔ ganjí é ɔ́,
mɛ bǐ wɛ nɔ́ tunwun i;
lo ɔ́, nú é ɖɔ xó ɖé nyi do ɔ́,
mɛ e nɔ lin tamɛ ganjí é sín ayi nɔ yá wǔ mɔ.
8Mɛ ɖěvo lɛ́ɛ sín akwɛ́ dó gbá xwé mɛtɔn ná ɔ́,
awǐnnya e è nǎ dó mɛ yɔdo mɛtɔn é sɛ kplé wɛ.
9Mɛ e ma nɔ nyi su nú Aklúnɔ sín sɛ́n ǎ lɛ́ɛ ɔ́,
kplékplé yě bǐ tɔn cí gběhan xúxú e è sɛ kplé é ɖɔhun;
myɔ ɖaxó mɛ wɛ yě ná wá yi fó ɖó.
10Ali mɛdídá lɛ́ɛ tɔn ɔ́, wɛn wɛ é ɖe,
bɔ awǐnnya ɖěbǔ ɖ'é jí ǎ;
lo ɔ́, kú sín do gɔngɔn mɛ wɛ é ká nɔ́ kplá mɛ yi.
Nǔnywɛ́tɔ́ kpó xlonɔ kpó
11Mɛ e nɔ xwedó sɛ́n Aklúnɔ tɔn é nɔ́ ɖu ɖo linlin tɔn lɛ́ɛ jí.
Sísí ɖó nú Aklúnɔ nɔ́ dɔn mɛ yi Sɛ́núnywɛ́ li jí.
12Mɛ e ma nɔ bí dó nǔ ɖěbǔ wú ǎ é sixú kplɔ́n nǔɖé ǎ,
lo ɔ́, sɛ́núnámɛ ɖé lɛ́ɛ nɔ́ dó wǔvɛ́ ayi mɛ nú mɛ.
13Nǔtunwuntunwun sɛ́núnywɛ́tɔ́ tɔn cí tɔsisa e gɔ́ bó túnflá é ɖɔhun,
bɔ nǔkplɔ́nmɛ tɔn lɛ́ɛ cí sin mímɛ́ tɔjɔtɛn tɔn ɖɔhun.
14Xlonɔ sín ayi cí agbǎn e gba é ɖɔhun;
é nɔ́ sixú hɛn nǔ e é kplɔ́n é ɖěbǔ ǎ.
15Ényí gbɛtɔ́ nǔnywɛ́tɔ́ se sɛ́núnywɛ́xó ɖé ɔ́,
é nɔ́ sɔ́ kɛ́n tɔn bó nɔ́ zé étɔn gɔ́ ná.
Lo ɔ́, nǔvɔ́nɔ tonyatɔ́ ɔ́ ká nɔ́ mɔ xó énɛ́ dó mɔ nǔɖé ǎ, bó nɔ́ dó vɛ̌ ná.
16Xlonɔ sín xóɖiɖɔ nɔ́ kpɛn ɖi agban e è nǎ hɛn ta ɖo aliga xo é ɖɔhun.
Lo ɔ́, nǔnywɛ́tɔ́ sín xó ká nɔ́ víví bó nɔ́ nyɔ́ se.
17Nǔnywɛ́tɔ́ ɖo xó ɖɔ wɛ ɖo kplétɛn ɖé ɔ́,
è nɔ ɖótó e tɛgbɛ,
bɔ mɛ bǐ nɔ́ lin tamɛ dó xó e ɖɔ wɛ é ɖe ɔ́ wú ɖo ayi tɔn mɛ.
18Sɛ́núnywɛ́ xɔ akwɛ́ hú xwégbigba
e nyí dǒglin ɖo te é nú xlonɔ ǎ.
Nǔtunwuntunwun nǔvɔ́nɔ tɔn lɛ́ɛ bǐ ɔ́,
xó ma ɖó ta ɖé wɛ yě nyí.
19Gɛdɛ e ɖo afɔ é kpó kpɛ́wúnkpɛ́ e ɖo alɔ é kpán ɖɔhun wɛ kplɔ́n yíyí cí nú gbɛtɔ́ xlonɔ.
20Xlonɔ nɔ́ vlɔ́n vɛ̌go dó ko nǔ hannyahannya;
lo ɔ́, nǔnywɛ́tɔ́ ká nɔ́ ko nǔ ɖo nu kpá kpowun.
21Acɔ́banú siká tɔn, alɔgan e ɖo ɖisílɔ tɔn é ɖɔhun wɛ kplɔ́n yíyí cí nú gbɛtɔ́ nǔnywɛ́tɔ́.
22Xlonɔ nɔ́ byɔ́ xwé gbe kpó zǐngídi kpó;
gbɛtɔ́ nǔnywɛ́tɔ́ ká nɔ́ byɔ́ mɛ ma ɖe éɖée xlɛ́.
23Gbɛtɔ́ ayimaɖotenánɔ nɔ́ zé ta gbɔn hɔnlinu bó nɔ́ kpɔ́n xɔ mɛ sɛ́ dó;
mɛ e è kplɔ́n ganjí é ká nɔ́ nɔ kɔ́xo.
24Mɛ e è ma kplɔ́n ganjí ǎ é nɔ́ nɔ kɔ́xo bó nɔ́ xɔ́ tó nǔ;
winnyá wɛ é ká nyí nú mɛ e se kplɔ́n ganjí é.
25Xó e mɛ ɖěvo lɛ́ɛ kó ɖɔ é wɛ mɛ e nɔ ɖɔ xó dín lɛ́ɛ é nɔ́ vɔ́ ɖɔ;
lo ɔ́, mɛ e ayi ɖo te ná lɛ́ɛ nɔ́ cɔ́ xógbe yětɔn lɛ́ɛ ganjí.
26Xlonɔ nɔ́ ɖɔ xó hwɛ̌ cóbó nɔ́ lin tamɛ kpɔ́n;
nǔnywɛ́tɔ́ ká nɔ́ lin tamɛ kpɔ́n hwɛ̌ cóbó nɔ́ ɖɔ xó.
27Ényí mɛdídá dó nu kɛntɔ́ tɔn ɔ́,
é ɖésúnɔ dó nu wɛ é ɖe.
28Mɛ e nɔ ɖɔ xó nyanya dó mɛ ɖě lɛ́ɛ wú ɔ́,
é ɖésúnɔ wú wa nǔ dó wɛ é ɖe.
Mɛ e lɛ́ lɛ̌ dó e lɛ́ɛ bǐ ná gbɛ́ wǎn n'i.
Currently Selected:
Silaki ví 21: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.