Silaki ví 22
22
Fɔnlínnɔ
1Fɔnlínnɔ cí awǐnnya e jí è nyɛ mǐ dó é ɖɔhun;
nǔ tɔn nɔ́ vɛ́ mɛ bǐ wú,
bɔ mɛ lɛ́ɛ nɔ́ gbɔ́ ɛ ko.
2É lɛ́ cí zunkɔ́ kplékplé ɖɔhun;
mɛ e ɖó alɔ wǔ tɔn é bǐ nɔ́ yi klɔ́ alɔ.
Vǐ e gbɛ́ hɛn lɛ́ɛ é
3Winnyá ɖaxó wɛ é nyí nú vǐtɔ́ e vǐ tɔn má se kplɔ́n ǎ é;
ényí nyɔ̌nu wɛ é nyí ɔ́,
é lɛ́ wa nǔ nyanya ɖaxó dó wǔ tɔn.
4Vǐ nyɔ̌nu e nyɔ́ nǔ i ganjí é ná mɔ asú;
lo ɔ́, nyɔ̌nuví e nɔ́ dó winnyá mɛ ɔ́,
aɖǔkún ɖuɖu wɛ é nyí nú tɔ́ tɔn.
5Nyɔ̌nu e ma nɔ́ sí mɛ ǎ ɔ́,
winnyá wɛ é nyí nú tɔ́ tɔn kpó asú tɔn kpán;
yě mɛ we lɛ́ɛ bǐ nɔ́ gbɛ́ wǎn n'i.
6Nǔ mɔ bó ɖɔ dó nǔ wú hwenu e é má jɛ xá dó ǎ ɔ́,
cí ɖi è ɖo awǎjijɛ nú xo wɛ,
hwenu e mɛ bǐ ɖo aluwɛ mɛ é ɖɔhun;
lo ɔ́, bǎ ɖó nú mɛ kpó hunnylánylá dó ná kplɔ́n mɛ kpán ɔ́,
nǔnywɛ́ wɛ é nyí hwebǐnu.
Xlonɔ nyínyí sín azɔn ɖó amasin ǎ
9Kplɔ́n jló ná ná xlonɔ ɔ́,
gozɛ́n e gba é tlɛ́tlɛ́ wɛ;
mɛ e ɖo amlɔ mɛ é fínfɔ́n wɛ.
10Xó ɖɔ nú xlonɔ ɔ́,
xó ɖɔ nú mɛ e ɖo amlɔ dɔ́ wɛ ɖɔhun wɛ é cí;
wǎ gbɔ tɔn ɔ́, é nǎ wá kanbyɔ́ ɖɔ: “Étɛ́ ká jɛ” a jí.
11Vǐ mɛ e kú é, ɖó é sɔ́ ɖó wěziza ǎ;
mɔ̌ ɖokpó ɔ́, vǐ mɛ e nyí xlonɔ é,
ɖó é ɖó nǔnywɛ́ ǎ.
Ma ka ví mɛ e kú é dín ó,
ɖó é kó mɔ gbɔjɛ́;
lo ɔ́, xlonɔ sín gbɛ nylá hú kú.
12 Azǎn tɛ́nwe wɛ è nɔ nɔ aluwɛ mɛ xɔ nú mɛ e kú é;
mɛ e nyí xlonɔ ɔ́,
abǐ mɛ e gbɛ́ wǎn nú Mawu é ɔ́,
xwe nabí e é nɔ gbɛ xɔ é wɛ è nɔ nɔ aluwɛ mɛ n'i xɔ.
13Ma ɖɔ xó gěgé xá mɛ e sín ayi ma xwetɛ́ ǎ é ó;
ma ka yi xo go xlonɔ ó;
cɔ́ hwiɖée dó wǔ tɔn, bó má wá yi ba tagba nú hwiɖée,
bónú hwenu e é ná húnhún éɖée ɔ́, é má wá hɛn we kúji ó.
Nú a jlǒ ná mɔ fífá hǔn, nɔ zɔ n'i;
hwenɛ́nu ɔ́, nǔgblégblé wiwa tɔn lɛ́ɛ sɔ́ ná gba ayi dó nú we ǎ.
14Étɛ́ ká ɖo gbɛmɛ fí bó kpɛn hú ɖɔnyikpɛ́n?
Gbeyíyí ɖokpó géé: xlonɔ. 15Kɔ́gúdu abǐ jɛ ati ɖokpó, abǐ gankpo ɖíɖá ɖo kɔli mɛ fúɖá,
bó nyɔ́ hɛn hú xlonɔgban hinhɛn.
16Azakpo e è to, bó blá ganjí,
bó kɛ́ sɔ́ nyi jí dó gbá xɔ ɔ́,
ayǐkúngban dán wǔ ɔ́, yě ná nɔ te ɖo nukɔn tɔn.
Mɔ̌ ɖokpó ɔ́, gbɛtɔ́ e lin tamɛ ganjí,
bó to tito ɖé, bɔ ayi tɔn bǐ ɖ'é wú ɔ́,
adǎngbomɛ hwenu ɔ́, awakanmɛ ná kú i ǎ.
17Gbeta e nǔnywɛ́ kpé mɛ,
bɔ è lin tamɛ ganjí cóbó ɖe tɔ́n ɔ́,
syɛ́n ɖi ɖiɖe e è súnsún dǒ ganjí bó ɖe d'é wú é ɖɔhun.
18È tɛ́ awǐnnya wínníwínní ɖó dǒ wú ɔ́,
è nɔ sixú nɔ te ɖo jɔhɔn nukɔn ǎ.
Mɔ̌ ɖokpó ɔ́, nǔvɔ́nɔ sín ayi
éé nɔ́ ɖi xɛsi dó linlin tófwe é ɖésúnɔ tɔn lɛ́ɛ wú ɔ́
sixú nɔ te ɖo xɛsi nukɔn ǎ.
Gbejíninɔ nú xɔ́ntɔn mɛtɔn lɛ́ɛ
19È dǒ nǔ nukún jí ɔ́, ɖasin nɔ tɔ́n;
è dǒ nǔ ayi mɛ ɔ́, linlin e ɖ'é mɛ lɛ́ɛ é nɔ́ tɔ́n.
20Mɛ e nyi hwǎn dó xɛ lɛ́ɛ é nɔ́ zɔ́n bɔ yě nɔ́ zɔn yi;
mɛ e zun xɔ́ntɔn é hɛn xɔ́ntɔn nyínyí kíjá.
21Ényí a zě alǐnnyánú dó xɔ́ntɔn towe jí hǔn,
ma nú wǔ kú we ó; é hɛn ɔ́, é ná lɛ́ lɛ́ kɔ wá.
22Ényí a ɖɔ jlɛ xá ɛ hǔn,
ma ɖi xɛsi ó;
mi hɛn ɔ́, mi ná lɛ́ dó hwɛ gbɔ.
Lo ɔ́, nú a ka zun i, nú a gbɛ̌ wǎn n'i,
nú a ma hɛn xó ɖo xomɛ e é ɖɔ nú we ɔ́ ǎ ɔ́,
nú a wa nǔɖé dó gǔdo n'i ɔ́,
énɛ́ lɛ́ɛ ná zɔ́n bɔ xɔ́ntɔn alɔkpa ɖěbǔ ná hɔn nú mɛ.
23Ényí xwékpánu towe nyí wamamɔnɔ hǔn,
tɛ́nkpɔ́n nú é ɖó jiɖiɖe dó wǔ we;
hwenɛ́nu ɔ́, ényí nǔ wá nyɔ́ n'i ɔ́,
hwi lɔ ná ɖu le tɔn;
hwenu e é ɖo ya ji wɛ ɔ́, nɔ gbejí n'i.
Énɛ́ ɔ́, nú é wá ɖu gǔ hweɖénu ɔ́,
hwi lɔ ná mɔ towe ɖ'é mɛ.
24Nú è mɔ azizɔ kpó azɔ kpó ɖo fí ɖé ɔ́,
è nɔ tunwun ɖɔ myɔ ɖo fínɛ́.
Mɔ̌ ɖokpó ɔ́, nú è se mɛzunzun ɔ́,
è nɔ tunwun ɖɔ mɛhuhu ná tíin.
25Ahwan jɛ xɔ́ntɔn jí ná nyí winnyá nú mì gbeɖé ǎ;
ényí nǔ ce hu dó e ɔ́, é ná mɔ mì ɖo akpá tɔn tɛgbɛ.
26Lo ɔ́, nú é sín wǔ tɔn, nú adǎn jɛ gbigbo mì jí ɔ́,
mɛ e ná se lɛ́ɛ é bǐ ná cɔ́ yěɖée dó wǔ tɔn.
Ɖɛ xo bó ná dó ɖu ɖo mɛɖée jí
27Un ɖo mɛ e ná cɔ́ nu ce é ba wɛ,
bɔ é ná sɔ́ cávi dó sú nufló ce sín hɔn lɛ́ɛ ná;
énɛ́ ɔ́, xó ce lɛ́ɛ sɔ́ ná zin mì dɛ́ ǎ;
nu ce sɔ́ ná dɔn mì bú ǎ.
Currently Selected:
Silaki ví 22: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.