Silaki ví 20
20
È nǐ tunwun hwenu e è nǎ ɖɔ xó dó é abǐ hwenu e è nǎ nɔ abwɛ̌ dó é
1Nǔ mɔ bó ɖɔ dó nǔ wú nú mɛ ɖé lɛ́ɛ tíin bó jɛ xá ǎ. Hwe ɖé lɛ́ɛ nu ɔ́, abwɛ̌ nɔ xwíí nɔ́ ɖó nyǐ hú.
2Lo ɔ́, è mɔ nǔ bó ɖɔ dó nǔ wú nú mɛ nyɔ́ hú è nǐ sin xomɛ bó gbɛ́ ma jó dó.
3Mɛ e wa nǔ nyi do, bó yí gbe tɔn ɔ́ sɔ́ nɔ́ mɔ wǔvɛ́ sɔ mɔ̌ ǎ.
4Mɛ e jló ná dó hwɛ kpó zǐngídi kpán ɔ́, cí agooɖojǐe e jló ná hwlɛ́n kan xá ɖyɔ̌vǐ é ɖɔhun.
5Mɛ ɖé lɛ́ɛ nɔ́ nɔ abwɛ̌, bó nɔ́ dó ɖe nǔnywɛ́tɔ́ yětɔn xlɛ́.
Mɛ ɖěvo lɛ́ɛ nɔ ɖɔ xó dín, bɔ mɛ bǐ nɔ gbɛ́ wǎn nú yě.
6Mɛ ɖé lɛ́ɛ nɔ́ nɔ abwɛ̌, ɖó yě tunwun gbe e yě ná yí é ǎ. Mɛ ɖěvo lɛ́ɛ nɔ́ nɔ abwɛ̌, bó nɔ́ nɔ te kpɔ́n hwenu e é jɛ xá bɔ yě ná ɖɔ xó é.
7Gbɛtɔ́ nǔnywɛ́tɔ́ nɔ́ nɔ te kpɔ́n hwenu e é jɛ xá bɔ è hɛn ɔ́, è nǎ ɖɔ xó é.
Lo ɔ́, mɛ e nɔ sɔ́ éɖée su bɔ ayi ma sɔgbe ná ǎ ɔ́ nɔ́ xo hwenu énɛ́ ɔ́ kpo.
8Mɛ e nɔ ɖɔ xó dín é ɔ́, mɛ bǐ wɛ nɔ gbɛ́ wǎn n'i.
Mɛ e ma ka nɔ glá ná kɛ nu ǎ ɔ́, è nɔ yí wǎn n'i ǎ.
Nǔ kpácá mɛ
9Hwe ɖé lɛ́ɛ nu ɔ́, é sixú kpa gbɛ̌dónánɔ;
hwe ɖé lɛ́ɛ nu ɔ́, nǔ ɖagbe sixú wá húzú nyanya.
10A nɔ ná nǔɖé lɛ́ɛ mɛ, bɔ nǔ ɖěbǔ nɔ tɔ́n sín mɛ nú we ǎ.
Ɖě lɛ́ɛ ká tíin bó nɔ́ hɛn mɔ̌hunkɔtɔn we wá nú we.
11Hwe ɖé lɛ́ɛ nu ɔ́, susu kpa nú mɛ sixú hwín mɛ dó do;
mɛ ɖé lɛ́ɛ ká tíin bɔ hwenu e è ɖo yě ɖe kpo wɛ ɔ́ wɛ
yě nɔ́ xɔ susu.
12Mɛ ɖé lɛ́ɛ tíin, bó nɔ́ sɔ́ akwɛ́ kpɛɖé dó xɔ nǔ gěgé ná,
é ɖo mɔ̌ có, yě vɛ́ axi donu tɛ́nwe.
13Nǔnywɛ́tɔ́ nɔ tunwun xó ɖagbe kpɛ e é ná ɖɔ bɔ mɛ lɛ́ɛ ná yí wǎn n'i é.
Nǔvɔ́nɔ ka nɔ ɖɔ xó gěgé kɔn nyi ayǐ dó wǔvɔ́.
14Gbɛtɔ́ nǔvɔ́nɔ sín nǔnámɛ sixú wa ɖagbe ɖé nú we ǎ,
ɖó éé hú mɔ̌ é wɛ é jló ná yí ɖo hwɛ sí.
15É nɔ́ wa nǔ kpɛɖé bó ka ná mɔ nǔ gěgé ɖɔ dó nǔ wú,
bó ná ɖo xó sú wɛ mɛ e ɖo nǔ sa wɛ ɖo axi mɛ é ɖɔhun.
É nya nǔɖé nú we éhɔ́nmɛ ɔ́ sɔ ɔ́ é ná jɛ axɔ́ tɔn byɔ́ we jí.
Mɛ mɔ̌hunkɔtɔn ɔ́, mɛ e è nǎ gbɛ́ wǎn ná é wɛ.
16Gbɛtɔ́ ayihwedónánɔ nɔ ɖɔ:
“Un ɖó xɔ́ntɔn ǎ; ɖagbe e wa wɛ un ɖe ɔ́, mɛɖé nɔ tunwun nú mì ǎ.
Mɛ e nɔ ɖu nǔɖuɖu ce lɛ́ɛ ɔ́, alɔgúdokpɛ́dónúmɛtɔ́ wɛ yě nyí.”
17Lo ɔ́, mɛ bǐ wɛ nɔ gbɔ́ mɛ mɔ̌hun ko.
Xó má jɛ gan
18È ɖiɖi nǔ ɖo alixo ɔ́, é lɛ́ nyɔ́ hú è ɖɔ xó e má jɛ gan ǎ é.
Lě e ayǐjijɛ mɛ nyanya lɛ́ɛ tɔn ná nyí gbɔn ɖo nukúnxwixwe ɖokpó mɛ é nɛ́.
19Gbɛtɔ́ e è ma kplɔ́n ganjí ǎ é cí xó gblégblé e è nɔ ɖo sise wɛ ɖo nǔvɔ́nɔ sín nu mɛ magbokɔ é ɖɔhun.
20Mɛ lɛ́ɛ nɔ yí gbe nú lǒ e é nɔ́ dó é ǎ,
ɖó é nɔ́ ɖɔ xó hwenu e é jɛ xá dó é ǎ.
21Mɛ ɖé lɛ́ɛ tíin bó gán ɖo hwɛ sí,
ɖó wamamɔnɔ e yě nyí é wú.
Yě mlɔ́ ayǐ ɔ́, ayi yětɔn nɔ́ xo hun xá yě ǎ. Yě nɔ́ dɔ́ amlɔ fɛɛ.
22Lo ɔ́, mɛ ɖé lɛ́ɛ nɔ́ bú ali,
ɖó gbɛtɔ́ nǔvɔ́nɔ e yě ma sixú ɖɔ: “Éeǒ” ná ǎ é wú.
23Mɛ ɖé lɛ́ɛ nɔ dó akpá nú xɔ́ntɔn ɖé,
ɖó yě glá bó ná gbɛ́ nǔɖé nú yě ǎ wútu.
É nɔ́ wá sín nǔ ma ɖi nǔɖé wú,
bɔ é nɔ wá húzú kɛntɔ́ mɛ énɛ́ tɔn.
Adingban
24Adingban ɔ́, winnyázɔ́ ɖaxó wɛ é nyí;
gbɛtɔ́ nǔvɔ́nɔ lɛ́ɛ nu mɛ wɛ è nɔ se ɖe hwɛhwɛ.
25Ajotɔ́ nyínyí nyɔ́ hú adingbannɔ nyínyí.
Lo ɔ́, yě mɛ we lɛ́ɛ bǐ wɛ ná bú.
26Adingban ɖíɖó nɔ́ ɖe yɛ̌yi bǐ sín mɛ lɛ́ɛ wú,
winnyá mɔ wɛ jɛ́n yě nɔ́ ɖe hwebǐnu.
Nyɔ̌ná kpó azɔ̌ e nyí nǔnywɛ́tɔ́ tɔn lɛ́ɛ kpán
27Xógbe kléwún ɖé jɛ́n hu dó nǔnywɛ́tɔ́,
bɔ mɛ bǐ ná yí wǎn n'i.
Gbɛtɔ́ ayiɖotenánɔ sín nǔ nɔ nyɔ́ mɛjɔmɛ lɛ́ɛ nukún mɛ.
28Mɛ e lɛ gle tɔn ganjí é nɔ ya nǔkún ganjí.
Mɔ̌ ɖokpó ɔ́, mɛ e mɛjɔmɛ lɛ́ɛ yí wǎn ná ɔ́ hɛn ɔ́, é ná jlá hwɛ agɔ ɖó.
29Nǔníná kpó agbankan lɛ́ɛ kpó nɔ sú nukún nú nǔnywɛ́tɔ́ lɛ́ɛ,
bó cí aja ɖɔhun, bɔ yě sɔ́ sixú mɔ nǔɖé bó ɖɔ dó nǔ wú nú mɛ ǎ.
30Nǔnywɛ́ e è zé hwlá é alǒ dɔkun e è sɔ́ dó kɔ́ glɔ́ é ɔ́,
étɛ́ wa nú wɛ yě ká nyí?
31Mɛ e zé nǔ nyanya tɔn hwlá é
nyɔ́ hú mɛ e ɖó Sɛ́núnywɛ́ bó zé hwlá é.
Currently Selected:
Silaki ví 20: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.