Silaki ví 14
14
1Nǔ nyɔ́ nú mɛ e ma hu hwɛ ɖo xógbe mɛ,
lobɔ hwɛ énɛ́ lɛ́ɛ sín vǐvɛ́ ɖíɖó má nɔ́ vɛ́ wǔ ná ǎ lɛ́ɛ é.
2Nǔ nyɔ́ nú mɛ e ayi tɔn ma xo hun xá ɛ ǎ, bɔ é ká mɔ nǔ e ɖó nukún wɛ é ká ɖe é.
Gwěnɔ sín gbɛ blá wǔ
3Dɔkun nyí nǔ ɖagbe ɖé nú gwěnɔ ǎ.
Nú è hɛn akwɛ́ ɔ́ nú mɛ ɖokpónɔ ɔ́, étɛ́ wá nú é ká nyí nɛ́?
4Mɛ e nɔ blá adɔ, bó ná dó kplé dɔkun ɖ'ayǐ ɔ́, mɛ ɖěvo lɛ́ɛ kplé ɖ'ayǐ ná wɛ é ɖe;
mɛ ɖěvo lɛ́ɛ nɔ́ sɔ́ dɔkun énɛ́ lɛ́ɛ dó ɖu gbɛ ná.
5Mɛ e nɔ syɛ́n fɛn dó é ɖésúnɔ wú ɔ́,
mɛ̌ wɛ é ká sixú nyí mɛ ɖagbe ná?
É nɔ́ ɖu nǔ e é ɖésúnɔ wa é sín gbɛ ǎ.
6Mɛ nyanya ɖé sɔ́ hú gǎn mɛ e nɔ dó ya nú é ɖésúnɔ é ǎ.
Gbɔn mɔ̌ ɔ́, dǐdá tɔn nɔ́ dɔn tó n'i.
7Gwěnɔ ɖésú nɔ́ jló bó nɔ́ wa ɖagbe ǎ.
Wǎgbɔ wǎgbɔ tɔn ɔ́, é nɔ́ wá ɖe adǎkaxixo tɔn xlɛ́.
8Mɛ e nukún tɔn nɔ xwlé axi ɔ́, mɛ nyanya wɛ;
é nɔ́ ɖe kɔ dó mɛ ɖě lɛ́ɛ, lobo nɔ gbɛ́ wǎn nú yě.
9Nǔɖé nɔ́ kpé mɛɖévonújlótɔ́ gbeɖé ǎ.
Jlǒ nɔ́ sɔ́ ɛ dó húzú mɛ nyanya.
10Gwěnɔ nɔ́ má nǔɖuɖu tɔn ǎ,
có nǔɖuɖu nɔ́ hán ɖo xwé tɔn gbe.
A mɔ gbɛnú ɖě hǔn ɖu
11Vǐ ce, nú hlɔ̌nhlɔ́n tɔn ɖo wǔ towe hǔn,
nyǐ mɛ ɖo hwiɖée sí.
Hɛn nǔníná e jɛ xá Aklúnɔ é wá n'i.
12Ma wɔn ó, kú ná wá ɖo ajijimɛ;
a tunwun gbe e gbe é ná nyí é ǎ.
13Cóbónú a nǎ kú hǔn,
wa ɖagbe nú xɔ́ntɔn towe lě e a kpé wú gbɔn ɔ́,
wa ɖagbe n'i gbɔn mɔ̌.
14Ma lɔn bónú nyɔ̌ná e ɖo wǐwá wɛ lɛ́ɛ ɖě zɛ wǔ we ó;
ma nú jlǒ e sín gbe e è nǎ we é gbɔ wǔ we ó.
15A tunwun ɖɔ nǔ e wa wɛ a ɖe ɔ́ bǐ ɔ́, mɛ ɖěvo lɛ́ɛ wɛ a nǎ jó dó ná ǎ cé?
Gǔɖutɔ́ towe lɛ́ɛ ná nyi akɔ dó, bó má yě ɖo yěɖée tɛ́ntin.
16Nǔ ná mɛ wɛ a ɖe a, abǐ nǔ yí wɛ a ɖe ɖo mɛ sí a?
É ní bó nyɔ́ nú we ɖó mɔ̌.
Nǔgbó ɔ́, gbɛɖuɖu ɖě sɔ́ kpo bɔ é nɔ́ ba ɖo kú tomɛ ǎ.
17Gbɛtɔ́ sín gbɛ nɔ kpo kan ɖi avɔ ɖɔhun.
Gbɛ ɔ́ su tɔn wɛ nyí ɖɔ: “A nǎ kú dandan.”
18Atín e jí ama gěgé ɖe ɔ́, hwenu ama ɖě lɛ́ɛ ɖo ayǐ jɛ wɛ ɔ́, ɖěvo lɛ́ɛ nɔ ɖo wǔwú wɛ;
mɔ̌ ɖokpó ɔ́ wɛ é ɖe nú kúnkan gbɛtɔ́ tɔn é nɛ́.
Mɛ ɖé lɛ́ɛ ɖo jijɔ wɛ ɔ́, mɛ ɖěvo lɛ́ɛ nɔ ɖo kúkú wɛ.
19Nǔ e gbɛtɔ́ lɛ́ɛ bló lɛ́ɛ bǐ wɛ ná blíbú,
bɔ nǔ e yě sɔ́ alɔ yětɔn dó bló lɛ́ɛ é bǐ ná xwedó yě.
Nǔnyɔ́nánɔ wɛ nyí nǔnywɛ́tɔ́ ɔ́
20 Nǔ nyɔ́ nú mɛ e Sɛ́núnywɛ́ nɔ myá nukún ná,
bɔ é nɔ́ lin tamɛ kpó nǔtunwuntunwun tɔn kpán é.
21É nɔ lin tamɛ dó ayi tɔn mɛ dó Sɛ́núnywɛ́ sín ali wú;
dó nǔ e ɖo hwlǎhwlá ɖ'é mɛ lɛ́ɛ wú.
22É nɔ jɛ Sɛ́núnywɛ́ túnnu ɖi gběnyatɔ́ ɖɔhun.
É nɔ ɖo nǔnywɛ́ cɔ́ wɛ ɖo ali tɔn xo.
23É nɔ dlɛ́n kɔ bó nɔ́ kpɔ́n nǔ gbɔn flɛtɛ́li tɔn nu,
bó nɔ́ xɔ́ nǔ tó ɖo hɔn tɔn ta.
24É nɔ wá jɛ agban ɖo xwé tɔn kpá,
bó nɔ́ wá sɔ́ tɛn ɖo dǒ tɔn kpá.
25É nɔ gbá goxɔ tɔn ɖo Sɛ́núnywɛ́ kpá;
bó nɔ́ wa xwé nyi fí e nyɔ̌ná ɖe é.
26É nɔ sɔ́ vǐ tɔn lɛ́ɛ hwlá dó acɛ tɔn glɔ́,
bó nɔ́ nɔ ala tɔn lɛ́ɛ glɔ́.
27É nɔ́ nɔ yɛtɛn tɔn dó gló yǒzo, bó nɔ́ jɛ agban ɖo susu tɔn sín nukɔn.
Currently Selected:
Silaki ví 14: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.