Silaki ví 13
13
1Nú a ɖǒ alɔ nǔ dó dɛ wú ɔ́,
alɔ towe ná dó dɛ.
Nú a nɔ ɖo goyítɔ́ xwedó wɛ ɔ́,
hwi lɔ ná cí é ɖɔhun.
2Ma ɖíɖá agban e kpɛn dín é ó;
mɔ̌ ɖokpó ɔ́, ma nɔ xwedó mɛ e hú gǎn we,
abǐ mɛ e ɖó akwɛ́ hú we é ó;
agbǎn e è sɔ́ kɔ́ dó bló é ká sixú zɔn xá ée è sɔ́ gan dó bló é a?
Ényí agbǎn we énɛ́ lɛ́ɛ wá xo go yěɖée ɔ́,
ée è sɔ́ kɔ́ dó mɛ ná é ná gba.
3Ényí dɔkunnɔ ɖé wa nǔ nyi do nú mɛɖé ɔ́,
éyɛ́ wɛ nɔ́ lɛ́ sin xomɛ.
É hwín wamamɔnɔ ɖé dó do ɔ́,
wamamɔnɔ ɔ́ wɛ nɔ́ lɛ́ byɔ́ hwɛsɔ́kɛ.
4Ényí nǔ towe hu dó dɔkunnɔ ɔ́,
é ná dɔn we zán.
Hwenu e nǔɖé má sɔ́ ná ɖo así we ǎ ɔ́,
é ná dó vɛ̌ nú we.
5Ényí nǔ kpɛɖé ɖo así we ɔ́,
dɔkunnɔ ná nɔ kpɔ́ xá we;
bǐ bɛ́ ɖo así towe ná ɖi nǔɖé n'i ǎ.
6Ényí nǔ towe hu dó e ɔ́,
é ná lílí afintínma ta nú we;
é ná ɖo nǔ ko dó we wɛ,
bó ná dó ná akɔ́nkpinkpan we.
É ná sɔ́ gbe fífá dó ɖɔ xó nú we,
lobo ná kanbyɔ́ we ɖɔ:
“Étɛ́ un ka sixú bló nú we?”
7Bó ná dó dó winnyá we ɔ́,
dɔkunnɔ ɔ́ ná nɔ́ ylɔ́ we hwɛhwɛ dó agɔ̌ɖutɛn tɔn,
nǔgbó ɔ́, akwɛ́ e ɖo así we ɔ́, a nǎ zán mɔ̌hun donu we, alǒ atɔn bó ná dó sú axɔ́ ɛ ná.
Ɖo fífónu ɔ́, é ná nɔ mímí ta dó ko we;
é mɔ we ja ɔ́, é ná nɔ́ hɔn nú we.
8Cɔ́ hwiɖée, ma jó hwiɖée dó nú é blɛ́ we,
abǐ é dɔn we dó kɔ́ mɛ ó.
9Ényí mɛjɔmɛ ɖé ylɔ́ we hǔn,
ma yí gbe ó; énɛ́ ɔ́, é ná lɛ́ vɔ́ ylɔ́ we.
10Ma dó wezun ó, é má nyí mɔ̌ ǎ ɔ́, é ná ɖe kɔ sín wǔ we.
Ma ka nɔ zɔ dín ó, é má nyí mɔ̌ ǎ ɔ́, é ná wɔn we.
11Ma ɖɔ xó n'i ɖi ɖɔ gbɛ̌ towe wɛ é nyí ɖɔhun ó;
mɔ̌ ɖokpó ɔ́, ma lɛ́ ɖi xó e ɖɔ nú we wɛ é ɖe lɛ́ɛ bǐ ó.
É ná tunwun nǔ e wa nú wɛ a nyǐ é wú wɛ é ɖo xó ɖɔ nú we wɛ.
Nú é ɖo nǔ ko wɛ ɔ́, gbějé gbéjé we kpɔ́n wɛ é ɖe.
12É ná kú nǔbláwǔ towe cóbó ná ɖɔ xó e a ɖɔ n'i lɛ́ɛ bǐ ɖo fí ɖěvo ǎ.
Ɖe ji ɖɔ é kún ná hwlɛ́n émí ɖo kpo abǐ gankpá mɛ sí ó.
13Bo nɔ acéjí bó cɔ́ hwiɖée ganjí;
ali baɖabaɖa e ná kplá mɛ yi kú ɔ́ jí wɛ a ɖe.
Dɔkunnɔ lɛ́ɛ kpó wamamɔnɔ lɛ́ɛ kpó
15Kanlin lɛ́ɛ nɔ́ yí wǎn nú gbɛ̌ yětɔn e cí yě ɖɔhun lɛ́ɛ,
bɔ gbɛtɔ́ bǐ ká nɔ́ yí wǎn nú nɔzo tɔn,
16kanlin lɛ́ɛ nɔ́ ɖó xó xá gbɛ̌ yětɔn yě ɖɔhun lɛ́ɛ,
bɔ gbɛtɔ́ lɛ́ɛ lɔ nɔ ɖó xó xá gbɛtɔ́ yětɔn ɖɔhun lɛ́ɛ.
17Étɛ́ ká sixú dɔn hla kpó lɛ̌ngbɔ́ kpó ɖó kpɔ́?
Nǔ nyanyawatɔ́ kpó mɛ e ɖo gbejí nú Aklúnɔ é kpó ɖó kpɔ́?
18Hla kpó cukú kpó ká sixú nɔ kpɔ́ ɖo fɛɛ mɛ a?
Dɔkunnɔ kpó wamamɔnɔ kpó ká sixú nɔ kpɔ́ bó vo a?
19Tócí gbě tɔn lɛ́ɛ wɛ nyí kinnikínní lɛ́ɛ sín nǔɖuɖu ɖo gběhan mɛ.
Mɔ̌ ɖokpó ɔ́, dɔkunnɔ lɛ́ɛ nɔ́ xwlɛ́ wamamɔnɔ lɛ́ɛ ɖu.
20Goyítɔ́ nɔ́ mɔ nǔ yǎyá dó mɔ nǔtí ná ǎ.
Mɔ̌ ɖokpó ɔ́, dɔkunnɔ nɔ gbɛ́ wǎn nú wamamɔnɔ.
21Ényí dɔkunnɔ ɖé klɛ́n afɔ ɔ́, xɔ́ntɔn tɔn lɛ́ɛ nɔ́ xɛ́ alɔ n'i;
ényí wamamɔnɔ ka j'ayǐ ɔ́, xɔ́ntɔn tɔn lɛ́ɛ nɔ jó e dó.
22Ényí dɔkunnɔ ɖé ɖe afɔ nyi do ɔ́,
mɛ gěgé nɔ́ kɛ alɔ bó nɔ́ yí i.
Nú é ɖɔ xó gblégblé ɔ́, mɛ gěgé nɔ zé gǔlɔ n'i.
Ényí wamamɔnɔ ɖé ɖe afɔ nyi do ɔ́, mɛ lɛ́ɛ nɔ́ dó hwɛ ɛ.
Nú é ɖɔ xó ɖagbe ɔ́, mɛ lɛ́ɛ nɔ́ ké ya ná ǎ.
23Ényí dɔkunnɔ ɖé ká ɖo xó ɖɔ wɛ ɔ́, mɛ bǐ nɔ́ xwɛ tóó,
bɔ xó tɔn nɔ́ nyɔ́ se nú yě.
Ényí wamamɔnɔ ɖé ɖɔ xó ɔ́, mɛ lɛ́ɛ nɔ́ kanbyɔ́ ɖɔ:
“Mɛ̌ ká nyí mɛ énɛ́?”
Nú é ɖe afɔ nyi do ɔ́, è nɔ sísɛ́ ɛ bó ná zin i dɛ́.
24Dɔkun e è jɛ kpódó ayijlɔ́jlɔ́ kpó é ɔ́, nǔ ɖagbe wɛ.
Mɛ nyanya lɛ́ɛ kɛ́ɖɛ́ jɛ́n nɔ́ gbɛ́ wǎn nú yajiji.
25Ayi nɔ húzú nukún mɛ nú mɛ, ɖó ɖagbe abǐ nyanya jí.
26Nukún mɛ e vlɔ́n é nɔ́ ɖe ayi e ɖo awǎjijɛ mɛ é xlɛ́;
lo ɔ́, tamɛ lin bo dó lǒ ɔ́, nǔvɛ́wǔ ɖaxó wɛ.
Currently Selected:
Silaki ví 13: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.