Silaki ví 12
12
È ma wa ɖagbe nú mɛɖé ján kpowun ó
1 Nú a ja ɖagbe wa gbé hǔn,
tunwun mɛ e a nǎ wa ná é,
bɔ mɛ lɛ́ɛ ná dó ɖagbe towe e a wa lɛ́ɛ é kú nú we.
2Nɔ wa ɖagbe nú mɛ e ɖo gbejí nú Aklúnɔ lɛ́ɛ é;
yě ná sú axɔ́ tɔn we;
ényí yě ɖésú má sú nú we ǎ ɔ́,
Mawu Ajalɔ̌nlɔn ɔ́ ná ná ajɔ tɔn we.
3Nyɔ̌ná tíin nú mɛ e nɔ fɔ́n tɛgbɛ bó nɔ́ ɖo nǔ nyanya wa wɛ,
bó nɔ́ gbɛ́ alɔ dó nɔzo lɛ́ɛ é ǎ.
4Nǎ nǔ mɛ e ɖo gbejí nú Aklúnɔ lɛ́ɛ;
ma lɔn bo yí nǔɖé ɖo mɛ e nɔ wa nǔ nyanya lɛ́ɛ sí ó.
5Wa ɖagbe nú mɛ e nɔ nɔ wɛn lɛ́ɛ é;
ma ná nǔ ɖěbǔ mɛ e nɔ gbɛ́ wǎn nú Aklúnɔ lɛ́ɛ é ó,
nǔgbó ɔ́, yě hɛn ɔ́, yě ná gbɔn fínɛ́ bó ná hú hlɔ̌nhlɔ́n we,
bɔ ɖagbe e a wa nú yě ɔ́,
yě ná sɔ́ nyanya mɔ̌hun donu we dó sú axɔ́ we.
6Mawu Ajalɔ̌nlɔn ɔ́ yí wǎn nú nǔ nyanyawatɔ́ lɛ́ɛ ǎ;
é ná dɔn tó nú mɛ e nɔ gbɛ́ wǎn n'i lɛ́ɛ é.
7Nǎ nǔ mɛ ɖagbe lɛ́ɛ,
lobo ma ka lɔn bo yí nǔ ɖěbǔ ɖo mɛ nyanya lɛ́ɛ sí ó.
È nǐ cɔ́ mɛɖée dó xɔ́ntɔn nyanya lɛ́ɛ wú
8Ényí nǔ bǐ ɖo yiyi nú mɛ wɛ ganjí ɔ́,
è sixú tunwun mɛ e nyí xɔ́ntɔn mɛtɔn tawun é ǎ;
lo ɔ́, hwenu e nǔ bǐ gblé dó mɛ ɔ́,
è nɔ mɔ mɛ e nyí kɛntɔ́ mɛtɔn lɛ́ɛ é tlóló.
9Ényí nǔ nyɔ́ nú mɛɖé ɔ́, wǔ nɔ́ kú kɛntɔ́ tɔn lɛ́ɛ;
ényí nǔ ká gblé dó e ɔ́, xɔ́ntɔn ɖésú nɔ́ jó e dó.
10Ma ɖeji dó kɛntɔ́ towe wú gbeɖé ó,
nǔgbó ɔ́, lě e gan nɔ jɛ ko gbɔn é ɖɔhun wɛ dǎnúwiwa tɔn nɔ́ cí ko ɖɔhun,
bó nɔ́ hwlá dó mɛ é nɛ́.
11Nú é ná tlɛ bló mɛ ɖo éɖée sɔ́ hwe wɛ ɖɔhun,
bó na bo nɔ dó kɔ do bó nɔ́ ɖo yiyi wɛ hǔn, cɔ́ hwiɖée bó hɔn n'i.
A ɖo akpá tɔn bó wa nǔɖé n'i hǔn,
blǒ ɖi azɔ̌watɔ́ e ɖo mɛkpɔ́nnú ɖíɖí wɛ é ɖɔhun;
ɖeji ɖɔ é kún ná jɛ ko bo kú awi nú tɛgbɛ gbe ó.
12Ma sɔ́ ɛ ɖó akpá towe ó;
é hɛn ɔ́, é ná zin we dɛ́ bó yí tɛn towe mɛ;
ma sɔ́ ɛ ɖó mɛjɔmɛ tɛnmɛ ɖo távo jí ó,
é má nyí mɔ̌ ǎ ɔ́, é ná ba ná yí azɔ̌tɛn towe.
Hwe énɛ́ nu lo wɛ a nǎ wá mɔ ɖɔ hwɛ ce jɔ,
lobɔ a ná flín xó e un ɖɔ nú we lɛ́ɛ, bɔ é ná vɛ́ nú we.
13Mɛ e sɔ́ dan dó ɖo ayihún da wɛ,
nú mɛ bǐ ná kpa nǔwúkpíkpé n'i, bɔ dan yi ɖu i ɔ́,
kpó mɛ e nɔ glá kpan nukɔn adǎnkanlin lɛ́ɛ kpán ɔ́,
mɛ̌ ká sixú kú nǔbláwǔ nú yě?
14Mɔ̌ ɖokpó ɔ́, mɛ e nɔ dó hwɛhutɔ́ lɛ́ɛ gbɛ́,
lobo nɔ́ jɛ nǔ nyanya dó sin jí yě ɖɔhun lɛ́ɛ é ɔ́,
nǔ yětɔn nɔ́ blá wǔ nú mɛɖé ǎ.
15Nǔnyanyawatɔ́ ná nɔ kpɔ́ xá we nú hwenu yɔywɛ ɖé,
lo ɔ́, nú a ka gosín ali ɔ́ jí ɔ́, élɔ́ ná blíbú.
16Kɛntɔ́ towe ɔ́, xó víví kɛ́ɖɛ́ wɛ ɖo ɖɛ̌ tɔn ta,
lo ɔ́, lě e é ná wa gbɔn bó kpíkpé we dó do mɛ é kɛ́ɖɛ́ ba wɛ é nɔ́ ɖe ɖo ayi mɛ.
Ɖasin sixú ɖo kɛntɔ́ towe nukún jí,
é ká mɔ ali tɔn ɔ́, hun towe nunu ná kpé mɛ n'i ǎ.
17Ényí gbɛdán ɖé gbo we ɔ́, é ná kó ɖo fínɛ́ xóxó;
é ná bló ɖi mɛ ɖo alɔ dó we wɛ ɖɔhun,
lo ɔ́, lě e é ná wa gbɔn bó zin we dɛ́ ɔ́ ba wɛ é ɖe.
18Hwenɛ́nu lo ɔ́, é ná wá ɖe nukún mɛ jɔ nukún mɛ tɔn xlɛ́ we;
é ná mímí ta bo ko we;
é ná fɔ alɔ tɔn we lɛ́ɛ bǐ dó xo asíkpɛ́ lobo ná ɖɔ nǔ towe ma gbokɔ.
Currently Selected:
Silaki ví 12: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.