Silaki ví 11
11
1Gbɛtɔ́ yǎyá ɖěe nyí nǔnywɛ́tɔ́ ɔ́ hɛn ɔ́,
é ná zé ta yi jǐ, bó jínjɔ́n mɛjɔmɛ lɛ́ɛ kpá.
È ma kpɔ́n nǔ e è mɔ ɖo wějí é dó ɖɔ hwɛ ó
2Ma kpa mɛɖé ɖó ɖɛkpɛnyínyɔ́ tɔn wú ó;
ma ka kpɔ́n lě e mɛɖé ɖe ɖo wějí é bó gbɛ́ wǎn n'i ó.
3Wǐin wɛ nyí nǔɖogbɛ e hwe hú bǐ ɖo nǔ e nɔ́ zɔn lɛ́ɛ mɛ é,
lo ɔ́, wǐinmi e é nɔ́ ná é víví hú nǔ bǐ ɖo gbɛ ɔ́ mɛ.
4Ma nɔ gó ɖo avɔ towe ɖagbe ɖagbe lɛ́ɛ mɛ ó;
è kpa we hǔn, ma nɔ dó yí go ná ó;
nǔgbó ɔ́, Aklúnɔ nɔ́ dó nǔ sin bɔ é nɔ́ kpácá mɛ;
lo ɔ́, mɛɖé ká sixú tunwun yě bó to ɖ'ayǐ ǎ.
5Axɔ́sú gěgé wá mɔ yěɖée ɖo ayǐjínjɔ́n ɖo kɔ́ mɛ,
bɔ acɛkpikpa wá jɛ mɛ e è ma vɛdó ǎ é sí.
6Wi kɔ́n sín ta nú nukɔntɔ́ gěgé;
gbɛtɔ́ nukúnɖéjí gěgé húzú kannumɔ.
7È ma ko ɖɔ xó nú we ǎ hǔn,
ma ko mɔ nǔɖé bó ɖɔ d'é wú ó,
to lin tamɛ hwɛ̌ cóbó wá ɖɔ nǔ e a mɔ d'é wú é.
8A ma ko se xó ǎ hǔn, ma ko yí gbe ó.
Ma cí xó dó nu nú mɛ e ɖo xó ɖɔ wɛ é ó.
9Ma hú nu dó xó e má kan we ǎ é mɛ ó.
Ma yi dó nu hwɛhutɔ́ lɛ́ɛ sín hwɛgbedídó mɛ ó.
Dɔkunnɔ kpó wamamɔnɔ kpó
10Vǐ ce, ma zun fán nǔ gěgé zɛ̌ɛ́n ó;
a tɛ́ dó nǔ sukpɔ́ wú ɔ́, a nǎ sixú tɔ́n sín mɛ ǎ;
a na bo dó wezun ɔ́, é ná kpa we ǎ;
a na bo hɔn yi ɖisí amyɔ ɔ́, é ná ná nǔɖé we ǎ.
11Mɛ ɖé lɛ́ɛ nɔ́ ɖo azɔ̌ wa wɛ dɛ̌n kɔxɛ́,
kpó nǔcikɔ kpó, lobo nɔ ɖo hwlɛndó jí,
cóbɔ nǔ e ba wɛ yě ɖe ɔ́,
yě nɔ́ xwedéwú ɖó mɔ̌ wú ǎ.
12Mɛ ɖé lɛ́ɛ ká tíin, bó ɖó wǔyíyá ǎ,
bɔ yě nɔ́ ɖo alɔdó ba wɛ tɛgbɛ;
wamamɔnɔ ma ɖó nǔɖé wɛ yě nyí,
lo ɔ́, Aklúnɔ ka nɔ́ sɔ́ nukún ɖagbe dó kpɔ́n yě,
bó nɔ́ ɖe yě sín ya yětɔn lɛ́ɛ mɛ.
13É nɔ́ bló bɔ yě nɔ́ sɔ́ ta yi jǐ;
bɔ é nɔ́ kpácá mɛ gěgé.
14Nǔ ɖagbe kpó nǔ nyanya kpó, gbɛ kpó kú kpó, ya kpó dɔkun kpó bǐ ɔ́, Aklúnɔ gɔ́n wɛ é gosín.
17Nyɔ̌ná Aklúnɔ tɔn lɛ́ɛ ɔ́,
mɛ e nɔ se tónú n'i lɛ́ɛ é tɔn wɛ yě nyí;
xomɛnyínyɔ́ tɔn ná kplá yě gbɔn ali jlɔ́jlɔ́ jí tɛgbɛ.
18 Mɛ ɖé lɛ́ɛ tíin, bó nɔ́ tɛ fɛn nǔ jí bó nɔ́ dó jɛ dɔkun;
yě nɔ́ kplé nǔɖókan yětɔn ɖó fí ɖokpó.
Lo ɔ́, ajɔ e ɖo te kpɔ́n yě ɔ́ ɖíe:
19Gbe e gbe yě ná ɖɔ nú yěɖée ɖɔ:
“Un hɛn ɔ́, un ná gbɔjɛ́ din lo;
un hɛn ɔ́, un ná ɖu dɔkun e un kplé ɖ'ayǐ é sín gbɛ.”
Yě ká tunwun hwenu e yě ná nɔ mɔ̌ yi jɛ é ǎ;
yě ná kú, bó jó nyɔ̌ná énɛ́ lɛ́ɛ nú mɛ ɖěvo lɛ́ɛ.
Aklúnɔ hɛn ɔ́, é ná húzú ninɔmɛ lɛ́ɛ
20Nɔ gbejí nú nǔ e wa wɛ a ɖe é;
sɔ́ hlɔ̌nhlɔ́n towe bǐ d'é mɛ,
bó ká wa azɔ̌ énɛ́ káká yi kpikpoxɔmɛ.
21Ma nú mɛ nyanya lɛ́ɛ sín nǔwiwa ní nɔ́ nyɔ́ kpɔ́n nú we ó;
ɖǒ jiɖiɖe dó Aklúnɔ wú, bó vlɔ́n kan dó azɔ̌ towe nu.
Nǔgbó ɔ́, nǔ bɔkun wɛ é nyí nú Aklúnɔ ɖɔ é ní dó dɔkun nú wamamɔnɔ zogbe ɖo tɛndo ɖokpó ɔ́ mɛ.
22Ɖɛxixo Aklúnɔ tɔn wɛ nyí ajɔ e é nɔ́ ná mɛ e nɔ se tónú n'i lɛ́ɛ é.
Ɖo hwenu yɔywɛ ɖé mɛ ɔ́, é nɔ́ ná nǔ e nɔ́ hu dó yě lɛ́ɛ é bǐ yě.
23Ma ɖɔ: “Étɛ́ ká hu dó mì?
Étɛ́ un ka hɛn ɔ́, un ná lɛ́ ɖó” ó.
24Ma ka lɛ́ ɖɔ: “Nǔ bǐ sɔgbe ɖo así ce;
din ɔ́, nǔ nyanya sɔ́ sixú xá mì ǎ” ó.
25Ényí nǔ bǐ ɖo yiyi wɛ ɖó ganjí ɔ́,
è sɔ́ nɔ́ lin tamɛ dó nǔ nyanya wú ǎ.
Ényí nǔ bǐ gblé ɔ́, è sɔ́ nɔ́ flín hwenu ɖagbe lɛ́ɛ ǎ.
26Ényí mɛ lɛ́ɛ kú ɔ́, é nɔ́ bɔkun nú Aklúnɔ ɖɔ é ní kpɔ́n nǔ e ɖokpó ɖokpó yětɔn wa é dó yí yě.
27Hwenu nyanya ɖokpó nɔ́ zɔ́n bɔ è nɔ wɔn nyɔ̌ná gbɛ ɖokpó ɔ́ bǐ tɔn.
Hwenu e mɛɖé kú é wɛ è nɔ wá mɔ lě e nǔwiwa tɔn lɛ́ɛ xɔ akwɛ́ sɔ é.
28Ényí mɛɖé má kó kú ǎ hǔn, ma ɖɔ é nyí nǔnyɔ́nánɔ ó;
hwenu e mɛɖé zán gbɛ tɔn fó é jɛ́n è nɔ tunwun mɛ e é nyí é.
È nǐ cɔ́ mɛɖée dó mɛ nyanya lɛ́ɛ wú
29Ayi kantɔn gban (150) wɛ ɖo mɛdídá lɛ́ɛ sí bɔ yě nɔ́ dó blɛ́ mɛ ná;
énɛ́ ɔ́ wú ɔ́, ma nɔ dɔn mɛɖé kpowun byɔ́ xwé towe gbe ó.
30Gbɛtɔ́ goyítɔ́ ɔ́ cí xɛ e è wlǐ dó aja mɛ bo ná dó dɔn xɛ ɖě lɛ́ɛ ná é ɖɔhun.
Ɖi xó yí ɖo mɛnutɔ́ ɖɔhun ɔ́, é ɖo te kpɔ́n hwenu e a nǎ jɛ ayǐ é.
31É nɔ́ ɖó mɔ gěgé, lobo nɔ sɔ́ nǔ ɖagbe dó húzú nyanya ná.
È wa nǔ ɖagbe ɖěbǔ ɔ́, è nɔ mɔ nyanya ɖɔ d'é wú jɛ́n wɛ.
32Zokán ɖokpó hɛn ɔ́, é ná flɔ́ myɔ ɖaxó;
mɔ̌ ɖokpó ɔ́, mɛ nyanya lɛ́ɛ nɔ́ ɖó mɔ e nɔ kplá mɛ yi kú lɛ́ɛ é.
33Cɔ́ hwiɖée dó mɛ nyanya lɛ́ɛ wú,
ɖó nǔ nyanya lin wɛ jɛ́n yě nɔ́ ɖe.
Yě hɛn ɔ́, yě ná kɔ́n wi towe nú tɛgbɛ gbe.
34Nú a hwě adɔ̌ nú mɛ e a ma tunwun ǎ é ɔ́,
é hɛn ɔ́, é ná dó nǔ nyanya sin ɖo xwé towe gbe,
bó ná fɔ́n hɛ̌nnumɔ towe lɛ́ɛ dó jǐ we.
Currently Selected:
Silaki ví 11: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.