Silaki ví 2
2
È nǐ xwesɔ ɖo tagba lɛ́ɛ mɛ
1Vǐ ce, nú a jlǒ ná sɛn Aklúnɔ hǔn,
blǒ hwiɖée ɖó bó ná mɔ tagba e ɖ'é mɛ lɛ́ɛ.
2Kpan akɔ́n bó syɛ́n dɔn;
ma nú ado hu we awěxomɛ hwenu ó.
3Nɔ bǔ xá Aklúnɔ bó má ká jɛ zɔ n'i ó.
A nǎ wá mɔ le tɔn azǎn towe gúdo tɔn ɔ́ gbe.
4Nú gan e mɛ a nǎ jɛ ayǐ dó ɔ́ wɛ xo hǔn,
xwesɔ, bó yí gbe nú nǔ e ná xá we é bǐ.
5 Nǔgbó ɔ́, myɔ mɛ wɛ è nɔ sɔ́ siká dó bó nɔ́ kpɔ́n ɖɔ é nyɔ́ a jí.
Mɔ̌ ɖokpó ɔ́, mɛ e sín nǔ nyɔ́ Aklúnɔ nukún mɛ lɛ́ɛ ɔ́,
hwenu e yě ɖo wǔvɛ́ mɔ wɛ é wɛ è nɔ tunwun lě e yě nyí mɛjɔmɛ sɔ é.
6Ɖe ji dó Aklúnɔ wú, é ná wá gɔ́ alɔ nú we;
xwedó ali jlɔ́jlɔ́, bó ká ɖó nukún i.
7Mi mɛ e nɔ sí Aklúnɔ lɛ́ɛ ɔ́,
mi gán jɛ xomɛnyínyɔ́ tɔn wú.
Mi ma sɛ yi zɔ n'i ó,
é má nyí mɔ̌ ǎ ɔ́, mi ná j'ayǐ.
8Mi mɛ e nɔ sí Aklúnɔ lɛ́ɛ ɔ́,
mi ɖeji dó wǔ tɔn;
mi ná ba ajɔ mitɔn kpo ǎ.
9Mi mɛ e nɔ sí Aklúnɔ lɛ́ɛ ɔ́,
mi ɖó nukún ɖagbewiwa tɔn lɛ́ɛ,
ɖo awǎjijɛ maɖókpodó kpó xomɛnyínyɔ́ tɔn kpó mɛ.
10Mi nyi kɔ bó kpɔ́n kúnkan xóxó lɛ́ɛ;
mɛɖé ɖeji dó Aklúnɔ wú bɔ é wá vɛ́ n'i kpɔ́n gbeɖé a?
Mɛ ɖé sí Aklúnɔ bó nɔ gbejí n'i, bɔ é dó vɛ̌ n'i gbeɖé kpɔ́n a?
Abǐ mɛɖé sa vo nú Aklúnɔ bɔ é gbɛ́ bó gɔn tó ɖó e kpɔ́n a?
11Nǔgbó ɔ́, Aklúnɔ ɔ́, mɛ nú nɔ́ blá wǔ n'i bɔ é nyɔ́ xomɛ;
É nɔ́ sɔ́ hwɛ lɛ́ɛ kɛ mɛ, bó nɔ́ hwlɛ́n mɛ gán hwenu e awě ɖo mɛ xo wɛ é.
12Nyladó tɛ́ ká ɖíe nyí nú mɛ e akɔ́nkpinkpan hwedó lɛ́ɛ é,
mɛ e nɔ dó vɛ̌ nú nǔ lɛ́ɛ é,
mɛ e nɔ xwedó ali we ɖó kpɔ́ lɛ́ɛ é.
13Nyladó tɛ́ ká ɖíe nyí mɛ e jɛ mǔ lɛ́ɛ tɔn e!
Ɖó yě ɖeji dó Aklúnɔ wú ǎ.
É nɔ́ cyɔ́n alɔ yě jí ǎ.
14Nyladó tɛ́ ká ɖíe nyí mi mɛ e ma dɛ sún káká yi fífónu ǎ lɛ́ɛ tɔn e!
Ényí Aklúnɔ wá kan lě e mi bló gbɔn ɔ́ byɔ́ ɔ́,
nɛ̌ mi ka ná bló gbɔn?
15Mɛ e nɔ sí Aklúnɔ lɛ́ɛ nɔ́ dó asá xó tɔn lɛ́ɛ gbeɖé ǎ;
mɛ e yí wǎn n'i lɛ́ɛ nɔ́ xwedó ali tɔn lɛ́ɛ.
16Mɛ e nɔ sí Aklúnɔ lɛ́ɛ nɔ́ ba ná nyɔ́ nukún tɔn mɛ.
Mɛ e yí wǎn n'i lɛ́ɛ nɔ́ sɔ́ sɛ́n tɔn dó ɖó nǔɖuɖu ná.
17Mɛ e nɔ sí Aklúnɔ lɛ́ɛ nɔ́ ɖo gbesisɔ mɛ tɛgbɛ ɖo ayi mɛ.
Yě nɔ́ nyɔ́ yěɖée sɔ́ hwe ɖo nukɔn tɔn.
18Yě nɔ́ ɖɔ: “È jɛ ayǐ jɛ Aklúnɔ lɔ mɛ ɔ́, é nyɔ́ hú è jɛ gbɛtɔ́ lɛ́ɛ lɔ mɛ,
ɖó lě e é hú gǎn nǔ sɔ é ɔ́,
mɔ̌ wɛ é lɛ́ nyɔ́ xomɛ sɔ é nɛ́.”
Currently Selected:
Silaki ví 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.