Jelemíi wlán 1
1
Lě e è ɖǒ ná cɔ́ mɛɖée dó nǔmɛsɛn Babilɔ́nu tɔn lɛ́ɛ wú gbɔn é
1 Mi hu hwɛ dó Mawu. Hwenɛ́nu ɔ́, Nabukodonɔzɔ́ɔ, Babilɔ́nu xɔ́sú ɔ́ ná wlí kannumɔ mitɔn hɛn yi Babilɔ́nu. 2Mi ná nɔ dɔ̌n tawun, mi ná nɔ dɔ̌n xɔ xwe mɔ̌kpán, káká yi jɛ jijimɛ tɛ́nwegɔ́ ɔ́ jí. Aklúnɔ ɖɔ jí: “Énɛ́ gúdo ɔ́, un ná ɖe mi tɔ́n sín fínɛ́ kpódó fífá kpó.”
3Ɖo Babilɔ́nu ɔ́, mi ná mɔ nǔmɛsɛn e è sɔ́ atín dó bló é; ée è sɔ́ kpatágan kpó siká kpó dó bló é. È nɔ ɖíɖá yě ɖó abɔ̌ta, Babilɔ́nunu lɛ́ɛ ká nɔ́ sí yě ɖésú. 4Énɛ́ wú wɛ mi ná cɔ́ miɖée. Mi ma húzú jɛ alɔ toɖévomɛnu énɛ́ lɛ́ɛ tɔn jí ó. 5Mi ma ɖi xɛsi nú nǔmɛsɛn yětɔn lɛ́ɛ, hwenu e mi ná mɔ mɛ gěgé ɖo kpolijijɛ, bo ɖo kɔ́ ɖe wɛ ɖo nukɔn yětɔn kpó gúdo yětɔn kpán é ó. Amɔ̌, mi ɖɔ kpowun dó ayi mɛ ɖɔ jí: “Mɛ̌si, hwi wɛ è ɖǒ ná sɛn.” 6Nǔgbó ɔ́, Aklúnɔ ɖɔ jí: “Wɛnsagun ce ɖo kpɔ́ xá mi, é wɛ ná kpé nukún dó gbɛ mitɔn wú.”
Étɛ́ nǔmɛsɛn nɛ́ lɛ́ɛ ká nyí?
7Alɔlyɛ́nzɔ́watɔ́ ɖé wɛ kpa atín dó bló ɖɛ̌ nǔmɛsɛn nɛ́ lɛ́ɛ tɔn ná. Siká kpó kpatágan kpó wɛ è sá dó atínkpavǐ nɛ́ lɛ́ɛ wú, lo ɔ́, nǔmɛsɛn nɛ́ lɛ́ɛ ɔ́, nǔmasɔgbe wɛ yě nyí, yě nɔ́ sixú ɖɔ xó ǎ. 8Mɛ ɖé lɛ́ɛ nɔ́ mɔ siká ɔ́ dó mɔ ɖyɔ̌vǐ e jɛ acɔ́ é ná nú yě. Yě nɔ́ sɔ́ dó bló gangbákún, bó nɔ́ sɔ́ xwe nú nǔmɛsɛn yětɔn lɛ́ɛ. 9Nǔ e nɔ lɛ́ jɛ é ɖíe: Sinsɛngán ɖé lɛ́ɛ nɔ fin siká nɛ́ ɔ́ kpó kpatágan nɛ́ ɔ́ kpó, bó nɔ́ zán akwɛ́ tɔn dó yě ɖésúnɔ wú, abǐ yě nɔ́ ná nyɔ̌nu e nɔ zán gbɛ gblégblé xá nǔmɛsɛn lɛ́ɛ é. 10È nɔ́ sɔ́ avɔ cyɔ́n nú nǔmɛsɛn nɛ́ lɛ́ɛ e è sɔ́ atín dó bló é, kpatágan kpó siká kpó dó bló é, ɖi nǔ ɖɔ gbɛtɔ́ wɛ yě nyí ɖɔhun. Lo ɔ́, yě sixú gɔn ko jɛ ǎ, wǎnvú lɛ́ɛ ká sixú gɔn yě ɖu ǎ. 11Hwenu e è nɔ sɔ́ avɔ vɔvɔ ɖagbe ɖagbe cyɔ́n nú yě ɔ́, è ɖǒ ná ɖe afúntúntún Sinsɛnxɔ mɛ tɔn e vun dó nukún yětɔn mɛ e síin. 12Nǔmɛsɛn nɛ́ lɛ́ɛ ɖokpó hɛn acɛkpikpa sín kpo, lě e togán ɖé nɔ́ hɛn é ɖɔhun. É ɖo mɔ̌ có é sixú hu mɛ e zun i é ǎ. 13Nǔmɛsɛn ɖěvo hɛn jǐví alɔ ɖisí ɔ́ mɛ kpódó asyɔ́ví kpó. É ɖo mɔ̌ có é sixú gló sɔ́ja lɛ́ɛ kpó ajotɔ́ lɛ́ɛ kpó ǎ. 14È nɔ mɔ ɖɔ yě kún nyí nǔmɛsɛn ó. Hǔn, mi ma ɖi xɛsi nú yě ó.
15Nǔmɛsɛn e mɛ lɛ́ɛ nɔ sɔ́ ɖó Sinsɛnxɔ lɛ́ɛ mɛ é nyí nǔ yǎyá, lě e agbǎn gbigba ɖe é ɖɔhun. 16Afúntúntún e nǔɖɔdómɛtɔ́ lɛ́ɛ sín afɔ nɔ vun dó jǐ é wɛ nɔ́ kpé nukún yětɔn mɛ. 17Ényí mɛ ɖé zun axɔ́sú ɔ́, è nɔ sú i dó gankpá mɛ, mɛ e è ɖǒ kúhwɛ ná é ɖɔhun. Mɔ̌ ɖokpó ɔ́ wɛ sinsɛngán lɛ́ɛ nɔ sú Sinsɛnxɔ lɛ́ɛ kpó hɔn syɛ́nsyɛ́n kpó, sɛlí kpó cávi kpó, bó ná gló ajotɔ́ axánsúnxó lɛ́ɛ nú yě má wá fin nǔmɛsɛn lɛ́ɛ ó. 18Yě nɔ́ lɛ́ tá zogbɛ́n gěgé, bɔ é nɔ́ zɛ ée yě nɔ́ tá nú yěɖée lɛ́ɛ é wú. Lo ɔ́, nǔmɛsɛn yětɔn lɛ́ɛ nɔ sixú mɔ nǔɖé ǎ. 19Nǔmɛsɛn nɛ́ lɛ́ɛ cí Sinsɛnxɔ yětɔn sín azakpo lɛ́ɛ ɖokpó ɖɔhun. È nɔ ɖɔ é kó nyɔ ɖo xomɛ. Wǎnvú e nɔ tɔ́n sín do mɛ lɛ́ɛ nɔ́ ɖu yě; yě kpódó avɔ yětɔn lɛ́ɛ kpó, lo ɔ́, yě ká nɔ́ tunwun lɔ ǎ. 20Azizɔ e nɔ gba kpé Sinsɛnxɔ ɔ́ mɛ ɔ́ hɛn nukún mɛ yětɔn wi. 21Toké lɛ́ɛ, azɔnxɛ lɛ́ɛ kpó xɛ ɖěvo lɛ́ɛ kpó nɔ́ yí ɖó nyi wǔtu yětɔn kpó ta yětɔn kpó. Awǐi lɛ́ɛ lɔ ɖ'é mɛ. 22Mi ma mɔ ganjí a? Yě nyí nǔmɛsɛn ǎ. Hǔn, mi bo ma ɖi xɛsi nú yě ó.
23Ényí è ma klɔ́ siká e è kɔn dó yě, nú yě ná nyɔ́ ɖɛkpɛ é ǎ ɔ́, yědɛɛ lɛ́ɛ ná bló bɔ é ná kɔ́n ǎ. Ényí è ka sínsín yě ɔ́, yě nɔ́ tlɛ tunwun lɔ ǎ! 24Axivɛ́nu wɛ mɛ lɛ́ɛ xɔ yě. É ɖo mɔ̌ có gbɛ funfún ɖé ɖo yě wú ǎ. 25Yě nɔ́ sixú ɖi zɔnlin ǎ; abɔ̌ta jɛ́n wɛ è ɖǒ ná hɛn yě ɖó. Lě e yě nɔ́ xlɛ́ mɛ bǐ ɖɔ émí kún nyí nǔɖé wá nú ó gbɔn é nɛ́. Winnyá wɛ yě nɔ́ dó mɛ e nɔ kpé nukún yě wǔ lɛ́ɛ lɔ. 26Nǔgbó ɔ́, ényí nǔmɛsɛn nɛ́ lɛ́ɛ ɖě jɛ ayǐ ɔ́, è ɖǒ ná lɛ́ fɔ́n ɛ xwete. È ka lɛ́ sɔ́ ɛ ɖó te ɔ́, é ná sɛ tɛn é ɖóɖó ǎ. Ényí é jɛ kɛ́n ɔ́, è nɔ sixú jlɔ́ ɛ ǎ. É nɔ́ cí ɖɔ è ɖo vɔ̌sánú xwlé mɛkúkú wɛ ɖɔhun. 27Sinsɛngán lɛ́ɛ nɔ sa kanlin e mɛ lɛ́ɛ hɛn wá sá vɔ̌ ná nú nǔmɛsɛn lɛ́ɛ é. Abǐ asi yětɔn lɛ́ɛ nɔ hɛn akpá ɖokpó bó nɔ sá jɛ dó bó nɔ́ hɛn dó wú lobo nɔ gɔn nǐná wamamɔnɔ lɛ́ɛ kpó sékúnɔ lɛ́ɛ kpó. Nyɔ̌nu blíblí lɛ́ɛ ɖésú ɔ́, ɖó yě jɛ gle gbe abǐ yě ji vǐ yɔ̌yɔ́ wǔtu ɔ́, yě nɔ́ ɖó alɔ kanlin e dó sá vɔ̌ ná lɛ́ɛ é wú. 28Gbɔn kpɔ́ndéwú nɛ́ lɛ́ɛ gbla mɛ ɔ́, mi mɔ din ganjí ɖɔ yě kún nyí nǔmɛsɛn ó. Hǔn, mi ma ɖi xɛsi nú yě ó.
Mɛ e ylɔ́ yě ɖɔ nǔmɛsɛn lɛ́ɛ sín hwɛ jɔ ǎ
29Nɛ̌ è ka sixú ylɔ́ yě ɖɔ “Nǔmɛsɛn” gbɔn? Nǔgbó ɔ́, nyɔ̌nu lɛ́ɛ wɛ nɔ́ sɛn nǔmɛsɛn énɛ́ lɛ́ɛ e è sɔ́ siká, kpatágan kpó atín kpó dó bló é . 30Ɖo Sinsɛnxɔ nǔmɛsɛn énɛ́ lɛ́ɛ tɔn mɛ ɔ́, sinsɛngán lɛ́ɛ nɔ ɖo ayǐjínjɔ́n, bó nɔ́ cyɔ́n avɔ vúnvún. Yě nɔ́ xwlɛ́ ɖa kpó atán kpó, bɔ ta yětɔn nɔ ɖo vɔ̌. 31Yě nɔ́ ɖo xó sú wɛ kanlin ɖɔhun, ɖo nǔmɛsɛn yětɔn lɛ́ɛ nukɔn, ɖi nǔ ɖɔ nǔwamɛ sín nǔɖuɖu kɔn wɛ yě ɖe ɖɔhun. 32Hú mɔ̌ ɔ́, sinsɛngán lɛ́ɛ nɔ́ fin avɔ nǔmɛsɛn lɛ́ɛ tɔn, bó nɔ́ dó nú asi yětɔn lɛ́ɛ kpó vǐ yětɔn lɛ́ɛ kpán. 33Ényí mɛ ɖé wa nǔ ɖagbe abǐ nǔ nyanya nú nǔmɛsɛn nɛ́ lɛ́ɛ ɔ́, yě nɔ́ sixú wa ɖó tɛn tɔn mɛ ǎ. Yě ká nɔ́ lɛ́ sixú sɔ́ axɔ́sú ɖé jínjɔ́n zinkpo tɔn jí, abǐ yě nɔ́ sixú flí i sín jí ǎ. 34Mɔ̌ ɖokpó ɔ́, yě nɔ́ sixú dó dɔkun nú mɛ, abǐ yě nɔ́ ná akwɛ́ mɛ ǎ. Ényí mɛ ɖé dó kplí yě, bó má ɖe ǎ ɔ́, nǔmɛsɛn nɛ́ lɛ́ɛ nɔ́ sixú byɔ́ axɔ́ tɔn ǎ. 35Yě sixú hwlɛ́n mɛ ɖé ɖo kú sí ǎ, yě ká sixú tlɛ lɛ́ yí mɛ e nyí gǎnmaɖowǔnánɔ hú mɛ bǐ é sín mɛ e dó hlɔ̌nhlɔ́n hú mɛ bǐ é sí ǎ. 36Yě sixú gbɔ nukúnzɔn nú wunvanɔ ǎ; yě ká sixú lɛ́ hwlɛ́n mɛ ɖé sín ya mɛ ǎ. 37Yě ká sixú lɛ́ kú nǔbláwǔ nú asúkúsi lɛ́ɛ ǎ; yě ká sixú lɛ́ wa ɖagbe nú tɔ́cyɔvǐ lɛ́ɛ ǎ. 38Atínkpavǐ nɛ́ lɛ́ɛ e è kɔn siká kpó kpatágan kpó dó lɛ́ɛ cí awǐnnya e è ɖe sín só wú é ɖɔhun. Mɛ e nɔ kpé nukún yě wǔ lɛ́ɛ ná wá ɖu winnyá. 39Ényí nǔ ɖo mɔ̌ ɔ́, nɛ̌ è ka sixú linkpɔ́n, abǐ è sixú ɖɔ yě nyí nǔmɛsɛn gbɔn?
40Hú mɔ̌ ɔ́, sinsɛngán Babilɔ́nu tɔn lɛ́ɛ ɖésú nɔ ɖɔ winnyáxó dó yě wú. Nǔgbó ɔ́, ényí yě mɔ gbɛtɔ́ ɖé bɔ é má sixú ɖɔ xó ǎ ɔ́, yě nɔ́ kplá ɛ wá nǔmɛsɛn Bɛ̌li yětɔn gɔ́n, bó nɔ́ byɔ́ Bɛ̌li ɔ́ ɖɔ é ní bló nú ɖɛ̌títɛ́nɔ ɔ́ ní ɖɔ xó, ɖi nǔ ɖɔ nǔmɛsɛn yětɔn sixú mɔ nǔ jɛ nǔ mɛ ɖɔhun! 41 Yě mɛ énɛ́ lɛ́ɛ nɔ sixú lin tamɛ dó nǔ nɛ́ wú, bó jó nǔmɛsɛn yětɔn lɛ́ɛ dó ǎ, ɖó yě ɖésú ɖó nǔmɔjɛnǔmɛ ǎ. 42Nyɔ̌nu lɛ́ɛ nɔ sin kan dó wǔ, bó nɔ́ wá cí alixo, bó nɔ́ fyɔ́ cákítí . 43Ényí alitanu ɖé ylɔ́ mɛ ɖokpó ɖo yě mɛ, bó kpé xá ɛ ɔ́, nyɔ̌nu énɛ́ ɔ́ nɔ́ ɖɔ lɔ̌ya nyɔ̌nu ɖě ɔ́ wú, bó nɔ́ ɖɔ è kún ylɔ́ éyɛ́ ɖi émí ɖɔhun ó; è kún sɛ́n kan tɔn ó. 44Nǔ e kan nǔmɛsɛn nɛ́ lɛ́ɛ bǐ é wɛ nyí mɛblɛ́nú. Nǔ ɖo mɔ̌ ɔ́, nɛ̌ è ka sixú lin, abǐ è sixú ɖɔ yě nyí nǔmɛsɛn gbɔn?
45Alɔnuzɔ́watɔ́ lɛ́ɛ kpó ganzɔ́watɔ́ lɛ́ɛ kpó wɛ bló yě. Nǔ e azɔ̌watɔ́ nɛ́ lɛ́ɛ jló bó bló é wɛ yě nyí kpowun. 46Mɛ e bló yě lɛ́ɛ ná nɔ gbɛ dín ǎ. Ényí mɔ̌ ɔ́, nɛ̌ nǔblóbló lɛ́ɛ ná sixú nyí nǔmɛsɛn gbɔn? 47Adingban kpó winnyá kpó kɛ́ɖɛ́ jɛ́n azɔ̌watɔ́ nɛ́ lɛ́ɛ jó nyi ayǐ nú vǐ yětɔn lɛ́ɛ. 48Ényí ahwan ɖé abǐ nyladó ɖé lɛ́ɛ jɛ nǔmɛsɛn nɛ́ lɛ́ɛ jí ɔ́, sinsɛngán lɛ́ɛ nɔ ba lě e yě ná hɔn hwlá kpó nǔmɛsɛn nɛ́ lɛ́ɛ kpó gbɔn é. 49Atínkpikpa nɛ́ lɛ́ɛ sixú hwlɛ́n yě ɖésúnɔ sín ahwan mɛ alǒ nyladó lɛ́ɛ mɛ ǎ. Nǔ ɖo mɔ̌ ɔ́, nɛ̌ è ma ka ná mɔ nǔ jɛ wú ɖɔ yě kún nyí nǔmɛsɛn ó gbɔn? 50É lín káká ɔ́, è nǎ wa tunwun ɖɔ atínkpikpa nɛ́ lɛ́ɛ e è kɔn siká kpó kpatágan kpó dó é nɔ blɛ́ mɛ lɛ́ɛ ɖu. Togun lɛ́ɛ bǐ sésé kpó axɔ́sú yětɔn lɛ́ɛ kpó ná wá mɔ ɖɔ yě kún nyí nǔmɛsɛn ó. Lo ɔ́, gbɛtɔ́ sín alɔ wɛ bló yě. Nǔ ɖěbǔ ɖo yě wú bó gosín Mawu gɔ́n ǎ. 51Hǔn yě ma nyí nǔmɛsɛn ǎ ɔ́, gaan wɛ é ɖe. Mɛ̌ ká sixú ɖɔ flíjɛ tɔn?
52Yě sixú sɔ́ axɔ́sú ɖokpó ɖó to nu ǎ; yě ká sixú bló bɔ jǐ ja nú gbɛtɔ́ lɛ́ɛ ǎ. 53Yě sixú ɖɔ hwɛ dó nǔ e kan yě ɖésú é ǎ. Yě sixú lɛ́ d'alɔ mɛ e dó hwɛ agɔ ná wɛ è ɖe ɔ́ ǎ. Yě nyí nǔɖéwanú ǎ. Yě ɖó gǎn ɖé ǎ, lě e avǔnsákɔwó nɔ zɔn gbɔn jɔ mɛ é ɖɔhun. 54Nǔmɛsɛn nɛ́ lɛ́ɛ e è sɔ́ atín dó bló, bó kɔn siká kpó kpatágan kpó dó ɔ́, ényí myɔ jɛ Sinsɛnxɔ yětɔn jí ɔ́, sinsɛngán yětɔn lɛ́ɛ nɔ hɔn, bó nɔ́ hwlɛ́n gbɛ yědɛɛ lɛ́ɛ tɔn gán. Lo ɔ́, nǔmɛsɛn nɛ́ lɛ́ɛ nɔ́ nɔ fínɛ́, bó nɔ́ ji zo azakpo ɖɔhun ɖo myɔ mɛ. 55Ényí axɔ́sú ɖé abǐ kɛntɔ́ ɖé tɔ́n ahwan yě ɔ́, yě sixú kpé ahwan xá yě ǎ. 56Nǔ ɖo mɔ̌ ɔ́, nɛ̌ è ka sixú yí gbe, abǐ è sixú lin ɖɔ yě nyí nǔmɛsɛn gbɔn?
Nǔmɛsɛn maɖótaɖé lɛ́ɛ nyí nǔɖéwanú ǎ
57Nǔmɛsɛn nɛ́ lɛ́ɛ e è sɔ́ atín dó bló, bó kɔn siká kpó kpatágan kpó dó nɛ́ lɛ́ɛ sixú hɔn sín ajotɔ́ lɛ́ɛ abǐ jaguda lɛ́ɛ sín alɔ mɛ ǎ. Ényí mɛ nɛ́ lɛ́ɛ ɖo siká ɔ́ kpó kpatágan ɔ́ kpó xwlɛ́ sín yě wǔ wɛ gǎnnugǎnnu ɔ́, ényí yě ɖo avɔ e è bǔ dó yě lɛ́ɛ bɛ́ hɛn yi wɛ ɔ́, nǔmɛsɛn nɛ́ lɛ́ɛ nɔ́ sixú d'alɔ yěɖée ǎ. 58Axɔ́sú e glá ɖo ahwan nukɔn é, abǐ gannú e nyí mɛ ɖé tɔn, bɔ mɛ ɔ́ nɔ sɔ́ dó wa nǔɖé ná é, hɔn e nɔ hwlá nǔ e ɖo xwé ɖé gbe é, abǐ atínkpo e ɖo axɔ́sú ɖé sín hɔnmɛ é, nǔ nɛ́ lɛ́ɛ bǐ wɛ nyí nǔwanú bó hu dó mɛ hú nǔmɛsɛn nɛ́ lɛ́ɛ. 59Hwe, sun kpó sunví e nɔ kɔ́n, bó nɔ́ wa ɖagbe nú mǐ lɛ́ɛ é kpó ɖo azɔ̌ yětɔn wa wɛ. 60Ényí jǐkɛwun bó dó gbe ɔ́, é lɔmɔ̌ nɔ xlɛ́ ɖɔ émí nɔ́ wa nǔɖé; mɔ̌ wɛ é lɛ́ nyí nú jɔhɔn e nɔ nyi gbɔn fí bǐ é. 61Ényí Mawu ɖe gbe nú akpɔ́kpɔ́ lɛ́ɛ ɖɔ yě nǐ cyɔ́n ayǐkúngban ɔ́ bǐ sésé jí ɔ́, yě nɔ́ se gbe. Jǐkɛwun e Mawu nɔ sɛ́ dó sín jǐxwé kpó zǐngídi kpó, bónú é ná hánnyá só lɛ́ɛ kpó zungbó lɛ́ɛ kpó é nɔ́ wa nǔ e è zɔn ɛ é. 62Lo ɔ́, nǔmɛsɛn lɛ́ɛ ɖě cí gbɛmɛ sín nǔ nɛ́ lɛ́ɛ ɖě ɖɔhun ǎ. Yě ɖó ɖɛkpɛ yětɔn, abǐ nǔwúkpíkpé yětɔn ǎ. 63Yě sixú ɖɔ hwɛ ɖagbe ǎ, abǐ yě sixú wa ɖagbe nú gbɛtɔ́ lɛ́ɛ ǎ. Nǔ ɖo mɔ̌ ɔ́, nɛ̌ è ka sixú yí gbe, abǐ è sixú lin ɖɔ yě nyí nǔmɛsɛn gbɔn? 64Mi tunwun ganjí ɖɔ yě kún nyí nǔmɛsɛn ó. Hǔn, mi bo ma ɖi xɛsi nú yě ó.
65Nǔgbó ɔ́, yě sixú dó nu axɔ́sú lɛ́ɛ, abǐ yě sixú xo ɖɛ nú yě ǎ. 66Yě sixú ɖe wuntun baɖabaɖa ɖé xlɛ́ ɖo jǐxwé ɖo togun lɛ́ɛ nukɔn ǎ; yě ká sixú kɔ́n hwe ɖɔhun ǎ, abǐ yě sixú lɛ́ za wě sun ɖɔhun ǎ. 67Gběkanlin lɛ́ɛ hú gǎn yě, ɖó yě hɛn ɔ́, yě ná hɔn hwlá cí fí ɖé, bó dó hwlɛ́n yěɖée. 68Nǔ nɛ́ lɛ́ɛ ɖěbǔ xlɛ́ mǐ ɖɔ yě nyí nǔmɛsɛn ǎ. Hǔn, mi bo ma ɖi xɛsi nú yě ó.
69Ɖo mǎgle mɛ ɔ́, asɔblɛ́nú nɔ wa nǔ ɖěbǔ ǎ. Nǔ ɖokpó ɔ́ wɛ nyí nú nǔmɛsɛn mɛ énɛ́ lɛ́ɛ tɔn, atínkpikpa nɛ́ lɛ́ɛ e è kɔn siká kpó kpatágan kpó dó é. 70Yě lɛ́ cí zunkan wun ɖ'é mɛ ɖɔhun ɖo jikpá mɛ, fí e xɛ alɔkpa alɔkpa lɛ́ɛ nɔ wá ɖó nyí é, abǐ yě lɛ́ cí mɛkúkú e è sɔ́ nyi dó zǐnflú mɛ ɖo yɔdo mɛ é ɖɔhun. 71Ényí mi wá mɔ avɔ ɖagbe ɖagbe yětɔn lɛ́ɛ kpó awu fɛ́ɖɛ́fɛ́ɖɛ́ yětɔn e kó nyɔ lɛ́ɛ kpó ɖo kɔ yětɔn ɔ́, mi ná mɔ nǔ jɛ wú lo ɖɔ yě kún nyí nǔmɛsɛn ó. Wǎgbɔ wǎgbɔ tɔn ɔ́, wǎnvú lɛ́ɛ ná wá ɖu yě, bɔ é ná wá nyí winnyá nú yě ɖo to ɔ́ mɛ. 72È gbɔ bo se tónú nú Mawu, bó má ɖó atínkpikpa ǎ ɔ́, é nyɔ́ hú. Mɛ mɔ̌hun ná ɖu winnyá ǎ.
Currently Selected:
Jelemíi wlán 1: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.