Judíti 4
4
Jwifu lɛ́ɛ ɖo nǔ sɔ́ wɛ bó ná dó syɛ́n dɔn
1Izlayɛ́li ví e ɖo Judáa lɛ́ɛ se nǔ nɛ́ lɛ́ɛ bǐ. Holofɛ́ni ahwangán kannɔ Nabukodonɔzɔ́ɔ, axɔ́sú Asilíi tɔn gba to ɖě lɛ́ɛ bǐ; é vívá Sinsɛnxɔ yětɔn lɛ́ɛ. 2Izlayɛ́li ví lɛ́ɛ ɖo xɛsi ɖi wɛ taala dó Holofɛ́ni wú; ayi yětɔn j'ayǐ dó Jeluzalɛ́mu to ɔ́ kpó Sinsɛnxɔ Aklúnɔ Mawu yětɔn tɔn kpó wú ǎ. 3Nǔgbó ɔ́, yě gosín kannumɔgbénu, bó xo yěɖée kplé ɖo Judáa ɔ́, é lín ǎ. Ée è ɖu su nú Sinsɛnxɔ ɔ́ kpó vɔ̌sákpe ɔ́ kpó Sinsɛnxɔ sín agban lɛ́ɛ kpó ɔ́, yě vɔ́ wǔ slá nú nǔ nɛ́ lɛ́ɛ bǐ. 4Izlayɛ́li ví lɛ́ɛ gbɔ bó ɖe mɛ sɛ́ dó Samalíi to ɔ́ bǐ mɛ, Kanáa, Bɛtolɔ́ɔn, Avɛ́li-Mayimu, Jeliko, Kebáa, Asɔli kpódó Salɛmu sín dodomɛ kpó.
5Yě yi cí só ɖaxó ɖaxó lɛ́ɛ ta, bó mɛ dǒ lɛ́ dó gletoxo e ɖo xá ɔ́ mɛ lɛ́ɛ bǐ. Yě sɛ nǔɖuɖu xwe nú ahwan ɔ́, ɖó yě ya jinukún ɔ́, é lín ǎ. 6Hwe énɛ́ ɔ́ nu ɔ́, Jowakímu ɖu vɔ̌sánú-xwlémawutɔ́ ɖaxó ɖo Jeluzalɛ́mu. É wlán wěma sɛ́ dó Betúlinu lɛ́ɛ kpódó Bɛtomɛsitayímu lɛ́ɛ kpó. Toxo we ɖé lɛ́ɛ wɛ bó kpan nukɔn Izleyɛ́li ɖo Dotáni sín ayǐkúngban wɛnjɛ nukɔn. 7Yoyakímu zɔ́n yě ɖɔ yě nǐ cí sókan mɛ sín ali e yi Judáa tomɛ lɛ́ɛ jí. Ali swɛ́ɛ́n wɛ bɔ è hɛn ɔ́, è nǎ ɖó dǐndínwáyitɔ́ lɛ́ɛ te webɔ webɔ. 8Izlayɛ́li ví lɛ́ɛ nɔ́ xwedó nǔ e vɔ̌sánú-xwlémawutɔ́ ɖaxó ɔ́ ɖɔ é, kpódó nǔ e gbɛ̌ta tomɛxó Izlayɛ́li tɔn e kplé ɖo Jeluzalɛ́mu lɛ́ɛ bǐ kpó nɔ́ ɖɔ é. 9Izlayɛ́li ví lɛ́ɛ bǐ sú xó ylɔ́ Aklúnɔ, bó blá nu syɛ́nsyɛ́n.
10 Súnnu, nyɔ̌nu, yɔkpɔ́vú, kanlin, jǒnɔ, azɔ̌watɔ́ kpó kannumɔ kpó bǐ dó nǔwamɛwu. 11Súnnu, nyɔ̌nu kpódó yɔkpɔ́vú Jeluzalɛ́mu tɔn lɛ́ɛ kpó bǐ jɛ kpo ɖo Sinsɛnxɔ nukɔn, bó xwe agbɔ̌nnusú do. 12Mɔ̌ ɖokpó ɔ́, yě bú nǔwamɛvɔ dó vɔ̌sákpe ɔ́. Yě bǐ nɔ bǔ, bó jɛ xó sú ylɔ́ Mawu Izlayɛ́li tɔn jí syɛ́nsyɛ́n. Yě sa vo n'i, ní má lɔn gbeɖé nú kɛntɔ́ ní xo vǐ kpɛví yětɔn lɛ́ɛ sɔ́, bó kplá asi yětɔn lɛ́ɛ, bó vívá toxo yětɔn lɛ́ɛ ó; toxo e é ná togun tɔn lé. Yě lɛ́ jɛ kɔ n'i, ní má jó ahe lɛ́ɛ dó nú yě ɖu su nú Sinsɛnxɔ, bó ɖɔ nyɔmɛ wǔ tɔn ó. 13 Aklúnɔ ɖótó Izlayɛ́li ví lɛ́ɛ sín vosisa, bó mɔ awě e ɖo yě xo wɛ ɔ́, to ɔ́ bǐ blá nu xɔ azǎn gěgé ɖo Judáa kpó Jeluzalɛ́mu kpó ɖo Aklúnɔ Nǔbǐwúkpétɔ́ ɔ́ sín Sinsɛnxɔ nukɔn. 14 Vɔ̌sánú-xwlémawutɔ́ ɖaxó Yowakímu, vɔ̌sánú-xwlémawutɔ́ lɛ́ɛ bǐ kpó mɛsɛntɔ́ Aklúnɔ tɔn lɛ́ɛ bǐ kpán dó nǔwamɛwu. Yě xwlé Aklúnɔ vɔ̌sísá e è nɔ xwlé ɖo Sinsɛnxɔ mɛ ayǐhɔ́ngbe ayǐhɔ́ngbe, kpódó nǔxwléxwlé togun ɔ́ tɔn kpán. 15Yě vun afín blá awu yětɔn, bó sú xó ylɔ́ Aklúnɔ kpó hlɔ̌nhlɔ́n yětɔn bǐ kpán. Yě bǐ wɛ ɖɔ ní jɛ hun dó Izlayɛ́li to ɔ́ jí, bó wa ɖagbe n'i.
Currently Selected:
Judíti 4: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.