Judíti 5
5
Holofɛ́ni kplé ahwan wěɖexámɛtɔ́ lɛ́ɛ tɔn ɔ́ bǐ
1Holofɛ́ni ahwangán Asilíi tɔn se xó élɔ́. Izlayɛ́li ví lɛ́ɛ ɖo nǔ sɔ́ wɛ ba fun ahwan; yě sú ali e yi sókan mɛ lɛ́ɛ, bó gbá atɔxwɛ dó só lɛ́ɛ ta; yě ɖó mɔ ɖó ayǐkúngban wɛnjɛ jí. 2Énɛ́ lo ɔ́, Holofɛ́ni wlí adǎn ɖaxó ɖé; é kplé Mɔwabu xɔ́sú lɛ́ɛ, ahwangán kannɔ Amumɔ́ɔnu lɛ́ɛ kpódó tokpɔnlagán e ɖo Mɛditɛlanɛ́ɛ tɔ ɔ́ tó lɛ́ɛ é kpó. 3É ɖɔ nú yě ɖɔ: “Kanáanu e mi, mi yi ba do nú nǔ nú mì: togun tɛ́ nɔ́ nɔ sókan mɛ fí? Toxo tɛ́ lɛ́ɛ mɛ wɛ yě nɔ́ nɔ? Ahwan yětɔn nyí ahwan nukúnɖéjí a? Ahwanfuntɔ́ yětɔn lɛ́ɛ dó hlɔ̌nhlɔ́n bó kpan akɔ́n nǔgbó a? Axɔ́sú tɛ́ wɛ kpa acɛ nú ahwan yětɔn? 4Yě wa nǔ to e ɖo gbadahwe jí lɛ́ɛ ɖɔhun a? Aniwú ka wɛ tawun?”
Xó e Akiyɔ́ɔ ɖɔ é
5Akiyɔ́ɔ, axɔ́sú Amumɔ́ɔnu lɛ́ɛ bǐ tɔn yí gbe n'i ɖɔ: “Ahwangán kannɔ ce, kɛnklɛ́n nyɔ́ xomɛ bó ɖótó mì, nyɛ mɛ e nyí mɛsɛntɔ́ towe é. Un ná ɖɔ xó nǔgbó nú we dó togun e ɖo sókan mɛ fí, ɖo ahwangɔnu towe kpá é wú. Un ná ɖó adingban nú we ǎ. 6Togun nɛ́ ɔ́, Kaludée tomɛnu wɛ yě nyí. 7-8Mɛzopotamíi to ɔ́ mɛ wɛ yě nɔ́ nɔ ɖ'ayǐ, bɔ yě gbɛ́ gbe nú tɔ́gbó yětɔn sín nǔmɛsɛn e ɖo Kaludée tomɛ lɛ́ɛ é. Yě jó tɔ́ yětɔn lɛ́ɛ sín walɔ dó bó jɛ Mawu e ɖo jǐxwé é sɛn jí. Yě kplɔ́n bó tunwun i. Ée è nya yě sín ayǐkúngban e nyí tɔ́gbó yětɔn lɛ́ɛ tɔn é jí ɔ́, yě tó hɔn wá yi Mɛzopotamíi tota ɔ́ mɛ hwɛ̌. Fínɛ́ wɛ yě nɔ tawun. 9 Mawu yětɔn ká wá ɖɔ nú yě ɖɔ yě ni gosín fínɛ́ bó yi Kanáa. Yě wá jɛ fínɛ́ bó mɔ kpatágan, siká kpó kanlin gěgé kpán. 10 Bɔ adɔ wá tɔ́n ɖo Kanáa to ɔ́ mɛ, bɔ yě wá yi Ejípu. Yě mɔ nǔɖuɖu ɖo to nɛ́ ɔ́ mɛ. Yě wá sukpɔ́ bó húzú togun maxamaxa. 11 Lo ɔ́, Ejípu xɔ́sú ɔ́ wá húzú kpan nukɔn yě. É ba ná hwín yě dó do, bó zɔ́n yě dandan ɖɔ yě ná mɛ kpe. É hwín yě dó do, bɔ yě húzú kannumɔ. 12 Yě sú xó ylɔ́ Mawu yětɔn. É sɛ́ azɔn baɖabaɖa e ma sixú gbɔ ǎ lɛ́ɛ dó Ejípu. Mɔ̌ wɛ Ejípunu lɛ́ɛ gbɔ bó nya yě sín to yětɔn mɛ gbɔn. 13 Mawu ɖe gbe bɔ Xu Vɔvɔ ɔ́ xú ɖo nukɔn yětɔn. 14Bɔ é kplá yě yi Sinayíi só ɔ́ kpó Kadɛ́si Baanɛya kpó; yě nya mɛ e ɖo gbětótló mɛ lɛ́ɛ bǐ. 15Bɔ yě jɛ Amɔliti lɛ́ɛ tomɛ. Yě hu Ekeboninu lɛ́ɛ. Yě dó asá Judɛ́ɛn tɔ ɔ́, bɔ sókan mɛ sín xá lɛ́ɛ bǐ jɛ alɔ mɛ nú yě. 16Yě nya Kanáanu lɛ́ɛ, Pelezíti lɛ́ɛ, Jebuzinu lɛ́ɛ, Sikɛ́munu lɛ́ɛ kpó Gigaciti lɛ́ɛ bǐ kpó dó gbě. Yě nɔ́ to ɔ́ mɛ tawun. 17 Yě nɔ́ fínɛ́ bó vo, ɖó yě wa nǔ e nɔ́ gblé xomɛ nú Mawu yětɔn é ɖě ǎ. Nǔgbó ɔ́, Mawu e nɔ́ cyɔ́n alɔ yě jí ɔ́ nɔ́ ba nǔ nyanya xó ɖě ǎ. 18Lo ɔ́, ée yě dó vɛ̌ nú sɛ́n e è sɔ́ dó así nú yě ɔ́, yě gěgé cí ahwan, bó yi kannumɔgbénu. Kɛntɔ́ yětɔn lɛ́ɛ yí toxo yětɔn lɛ́ɛ, bó gba Mawu yětɔn sín xɔ. 19Din ɔ́, yě lɛ́ lɛ́ kɔ wá Mawu yětɔn gɔ́n, bó wá jɛ to e mɛ è nya yě sín ɖ'ayǐ é. Yě lɛ́ kɔ wá Jeluzalɛ́mu fí e Sinsɛnxɔ yětɔn ɖe é, bó nɔ sókan mɛ fí e mɛɖé má ɖe ɖ'ayǐ ǎ. 20Din ɔ́, ahwangán kannɔ ce, mi ná ɖɔ mɛ lɛ́ɛ jɛ agɔ dó Mawu yětɔn, bó wa nǔ nyi do nǔgbó. Hwe énɛ́ ɔ́ nu lo ɔ́, mi hɛn ɔ́, mi ná tɔ́n ahwan yě ba ɖu ɖo yě jí. 21Lo ɔ́, nú yě má wa nǔ nyi do ǎ hǔn, mi gbɔ bo jó yě dó xwíí ɔ́, é kpé hú mɛ ahwangán kannɔ ce. É má nyí mɔ̌ ǎ ɔ́, Aklúnɔ yětɔn ná jɛ ahwan yě jí, bɔ mi ná ɖu winnyá ɖésú ɖo gbɛ ɔ́ bǐ nukɔn.”
É ɖó hwɛ nú Akiyɔ́ɔ, bó zé e jó nú Izlayɛ́linu lɛ́ɛ
22Ée Akiyɔ́ɔ ɖɔ xó fó ɔ́, é nyɔ́ se nú mɛ e lɛ́ dó ahwangán kannɔ ɔ́ sín xɔ lɛ́ɛ é ɖěbǔ ǎ. Holofɛ́ni sín gǎn ahwan-yitɔ́ lɛ́ɛ kpó Mɛditɛlanɛ́ɛ tɔ tó nu lɛ́ɛ kpó Mɔwabunu lɛ́ɛ kpó jló ná hu Akiyɔ́ɔ. 23Yě nɔ́ ɖɔ: “Izlayɛ́li ví lɛ́ɛ dó xɛsi nú mǐ ǎ. Togun nɛ́ ɔ́ ɖó hlɔ̌nhlɔ́n ɖé ǎ; yě sixú gán ɖo ahwan nɛ́ ɔ́ mɛ ǎ. 24Ahwangán Holofɛ́ni, mǐ ná yi tɔ́n ahwan yě ba gblé nǔ ɖo fínɛ́.”
Currently Selected:
Judíti 5: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.